Nkauj See * hais tias: “Kuv ib txwm yog neeg txaj muag thiab siab yau. Kuv thiaj tsis nyiam nrog cov hais taus taus thiab heev heev ua ke. Tiamsis kuv tsis ntshai thaum kuv nrog cov siab mos siab muag ua ke. Kuv kuj tsis ntshai qhia siab rau lawv thiab nrog lawv tham txog kuv tej teeb meem. Kuv cov phoojywg zoo yog cov uas siab mos siab muag xwb.”

Tej uas Nkauj See hais no qhia tias yog peb ua siab mos siab muag tibneeg yuav ncawg peb dua. Peb kuj ua rau Yehauvas zoo siab thiab. Vajtswv Txojlus hais tias: “Nej yuav tsum . . . muaj lub siab mos siab muag.” (Kaulauxais 3:12) Tus neeg siab mos siab muag zoo li cas? Yexus ua siab mos siab muag li cas? Ua cas cov uas siab mos siab muag thiaj zoo siab dua?

Tus neeg siab mos siab muag nyiam kev sib haum xeeb. Thaum lwm tus ua txob nws siab nws ua tau siab tus thiab ua zoo hais luag.

Luag hais tias tus neeg siab mos siab muag yog neeg tais caus tiamsis tsis yog li ntawd. Phau Vajlugkub siv lo lus Kilis “siab mos siab muag” los piav txog tus nees qus uas cob tau seej lawm. Tus nees yeej tseem muaj zog li qub tiamsis nws paub tswj nws lub zog. Zoo ib yam li ntawd thaum peb ua siab mos siab muag ces peb paub tswj peb lub siab thiab ua kom muaj kev sib haum xeeb nrog lwm tus.

Tej zaud peb yuav xav tias, ‘Kuv tsis yog ib tug neeg siab mos siab muag.’ Vim li cas? Vim peb nyob xyaw cov neeg siab luv thiab ua nruj ua tsiv ces tej zaud yuav tsis yoojyim rau peb ua siab mos siab muag. (Loos 7:19) Twb yog li ntawd peb yuav tsum siv zog tiag peb thiaj ua tau siab mos siab muag. Yehauvas lub hwj huam dawb huv yuav pab peb ua tau siab mos siab muag thiab. (Kalatias 5:22, 23) Vim li cas peb yuav tsum muaj lub siab mos siab muag?

Neeg nyiam tus uas ua siab mos siab muag. Zoo li Nkauj See nyuam qhuav hais tas, peb tsis muaj qhov ntshai thaum peb nrog cov neeg siab mos siab muag ua ke. Yexus tso tau ib tug qauv zoo kawg rau peb xyaum. Nws muaj lub siab mos siab muag thiab hlub lwm tus. (2 Kauleethaus 10:1) Txawm menyuam yaus los tsis ntshai los cuag nws.​—Malakaus 10:13-16.

 Lub siab mos siab muag pab tau peb thiab cov uas nrog peb. Yog peb ua siab mos siab muag ces peb yuav tsis chim sai. (Pajlug 16:32) Peb thiab cov nrog peb yuav kaj siab dua vim peb paub tswj peb tus kheej thiab tsis lam tau lam hais mob lwm tus thiab cov uas peb hlub.

Txawm Yexus muaj haujlwm ntau thiab tsis khoom li los nws ua siab mos siab muag rau txhua tus. Nyob rau Yexus tiam muaj coob tus ua haujlwm khwv heev thiab ris lub nra hnyav. Lawv xav tau kev nplig siab. Yexus thiaj hais rau lawv tias: “Cia li los cuag kuv . . . rau qhov kuv siab mos siab muag tsis muab hlob.” (Mathais 11:28, 29, TT ) Sim xav seb Yexus cov lus no txhawb tau lawv lub zog npaum li cas.

Peb yuav xyaum ua siab mos siab muag li Yexus li cas? Peb yuav tsum kawm hauv Vajtswv Txojlus seb Yexus coj li cas nrog lwm tus. Ces thaum peb raug kev sim siab peb thiaj ua tau siab mos siab muag li nws. (1 Petus 2:21) Cia peb kawm txog 3 yam uas pab Yexus ua tau siab mos siab muag.

Yexus yog ib tug neeg txo hwjchim. Yexus hais tias nws yog ib tug “siab mos siab muag tsis muab hlob [lossis txo hwjchim].” (Mathais 11:29, TT ) Phau Vajlugkub hais 2 lo lus no ua ke vim peb yuav tsum txo hwjchim peb thiaj ua tau siab mos siab muag.​—Efexus 4:1-3.

Yog peb txo hwjchim ces peb yuav tsis chim sai thaum luag hais tsis haum peb siab. Yexus ua li cas xwb thaum neeg thuam nws tias nws “noj loj haus loj”? Nws ua siab mos siab muag rau lawv thiab coj tus cwjpwm rau lawv pom tias nws tsis zoo li lawv hais.​—Mathais 11:19.

Thaum muaj ib tug hais tsis zoo txog koj haiv neeg lossis hais thuam koj, cia li ua siab mos siab muag ua zoo teb nws. Ib tug txwj laus nyob Afika Qab Teb hu ua Petus hais tias: “Thaum lwm tus hais tsis haum kuv siab, kuv xav seb yog Yexus no Yexus yuav teb li cas. Kuv xyaum ua siab ntev thiab tsis khaws chim rau tej uas luag hais rau kuv.”

Yexus paub tias peb yog neeg zoo tsis tiav. Yexus cov thwjtim yeej xav ua qhov yog xwb tiamsis vim lawv yog neeg zoo tsis tiav muaj tej thaud lawv thiaj ua tsis tau li lawv lub siab xav. Xws li hmo ua ntej Yexus tuag, Yexus hais kom Petus, Yakaunpaus, thiab Yauhas nrog nws nyob tsis txhob tsaug zog tiamsis tib pliag xwb lawv twb tsaug zog tag lawm. Yexus thiaj hais tias: “Lub siab mas kub lug, tiamsis cev nqaij daim tawv qaug zog kawg li.” (Mathais 26:40, 41) Yexus to taub lawv zoo thiab tsis chim rau lawv.

Ib tug muam hu ua Maiv hais tias yav tas los yeej tsis muaj leejtwg ua haum nws siab li. Tiamsis nws ua tiag xyaum ua siab mos siab muag li Yexus. Nimno, Maiv hais tias: “Kuv yuav tsum nco ntsoov tias peb sawvdaws puavleej yog neeg zoo tsis tiav. Kuv yuav tsum saib tej uas lawv ua tau zoo xwb ib yam li Yehauvas.” Koj puas yuav ua tau siab mos siab muag thiab hlub lwm tus ib yam li Yexus txawm hais tias lawv yog neeg zoo tsis tiav?

Yexus tso siab rau Yehauvas. Thaum Yexus nyob hauv ntiajteb no neeg ua tsis ncaj rau nws. Nws raug luag thuam, raug luag ntxub thiab raug luag tsim txom. Txawm li ntawd los nws ua siab ntev thiab ua siab mos siab muag rau qhov “nws muab tej ntawd tso rau Vajtswv tus uas txiav txim ncaj ncees.” (1 Petus 2:23) Yexus paub tias nws Leej Txiv saum ntuj yuav pab nws ua siab ntev thev tej uas nws raug thiab yuav txiav txim rau cov uas ua tsis ncaj rau nws.

Yog peb nrog lwm tus sib cav sib ceg vim lawv ua tsis ncaj rau peb ces hajyam yuav ua rau peb chim siab xwb. Vajtswv Txojlus thiaj hais tias: “Peb tej kev chim yeej pab tsis tau kom peb ua tau neeg ncaj ncees raws li Vajtswv lub siab nyiam.” (Yakaunpaus 1:20) Txawm tias tsim nyog peb chim kawg los peb yuav tau ua siab ntev, tsis li ntawd ces thaum peb chim peb yuav ua yuam kev.

Ib tug muam nyob tebchaws Ntsaws Mes Nis hu ua Khatis (Cathy) ib txwm xav tias yog yus tsis tiv thaiv yus tus kheej ces yeej tsis muaj leejtwg yuav tiv thaiv yus li. Tiamsis thaum nws xyaum tso siab rau Yehauvas nws hloov nws lawm. Nws hais tias: “Nimno kuv ua tau siab mos siab muag lawm vim kuv paub tias Yehauvas yeej yuav kho txhua yam phem hauv ntiajteb no.” Yog luag ua tsis ncaj rau koj ces xyaum tso siab rau Yehauvas ib yam li Yexus. Yog koj ua li no yuav pab tau koj ua tau siab ntev.

Yexus hais tias yog peb xav muaj kev kaj siab peb yuav tsum ua neeg siab mos siab muag. (Mathais 5:5) Ua neeg siab mos siab muag pab tau peb li cas?

Lub siab mos siab muag pab tau yus ob niam txiv muaj kev sib haum xeeb. Ib tug kwvtij nyob tebchaws Auxitalia hu ua Riam hais tias: “Kuv tau hais ntau yam mob kuv tus pojniam siab. Tiamsis kuv thim tsis tau cov lus uas kuv hais thaum kuv chim siab lawm. Kuv tu siab uas kuv tau hais lus mob nws siab heev.”

“Peb txhua tus . . . hais lus yuam kev.” (Yakaunpaus 3:2) Yog ob niam txiv tsis ua zoo hais lus ces yuav ua rau nkawd tsis muaj kev sib haum xeeb. Tej lub sijhawm, peb yuav tau ua siab ntev thiab ceev peb tus nplaig.​—Pajlug 17:27.

Riam xyaum ua neeg siab ntev thiab xyaum tswj nws tus kheej. Nws hais tias: “Nimno thaum twg kuv pojniam wb hais lus tsis sib haum los kuv ua zoo mloog nws, kuv ua zoo hais rau nws, thiab tswj kuv tus kheej kom tsis txhob npau taws. Nimno kuv pojniam wb sib raug zoo dua qub lawm.”

Lub siab mos siab muag pab tau peb sib raug zoo nrog lwm tus. Cov neeg chim taus tsis muaj phoojywg coob. Tiamsis cov neeg ua siab mos siab muag rub tau peb “los nyob ua ke sib haum.” (Efexus 4:2, 3) Khatis hais tias, “Thaum kuv nrog lwm tus es kuv ua siab mos siab muag kuv muaj kev zoo siab dua. Txawm yog cov neeg uas tsis yoojyim sib raug zoo nrog los kuv ua tau siab ntev rau.”

Lub siab mos siab muag pab tau yus muaj kev kaj siab dua. Phau Vajlugkub hais tias “lub tswvyim uas los saum ntuj los” pab tau peb ua siab mos siab muag thiab muaj kev sib haum xeeb. (Yakaunpaus 3:13, 17, TT ) Tus siab mos siab muag muaj “lub siab uas kaj nrig.” (Pajlug 14:30) Ib tug kwvtij hu ua Tub Mos xyaum kom nws muaj lub siab mos siab muag. Nws hais tias, “Nimno kuv muaj kev zoo siab thiab kev kaj siab dua vim kuv paub yoog lwm tus thiab tsis yuav kuv siab xwb.”

Yeej muaj tseeb tias tsis yoojyim rau peb ua siab mos siab muag. Ib tug kwvtij hais li no: “Kuv hais ncaj qha tias niaj hnub nimno los muaj tej thaud kuv yeej tseem npau taws kawg li.” Tiamsis Yehauvas yog tus pab kom peb ua tau lub siab mos siab muag. (Yaxayas 41:10; 1 Timautes 6:11) Nws yuav pab peb thiab ‘nws yuav txhawb peb lub zog’ kom peb nyob ruaj khov. (1 Petus 5:10) Zoo ib yam li Paulus, yog peb kam tiag xyaum ces peb yuav ua tau “lub siab mos siab muag thiab [muaj] lub siab hlub ib yam li [Khetos].”​—2 Kauleethaus 10:1.