1. Vim li cas Yehauvas thiaj muab nws piv rau ib leej niam?

PUAG THAUM UB nyob rau Yaxayas tiam, Yehauvas hais rau nws cov neeg tias: “Puas muaj ib leej niam twg uas tsis nco qab nws tus menyuam mos? . . . Txawm yog leej niam tsis nco qab nws tus menyuam los xij, kuv yuav nco ntsoov nej thiab tsis tso nej tseg ib zaug li.” (Yaxayas 49:15) Yehauvas yeej tsis tshua muab nws piv rau ib leej niam tiamsis zaum no nws ua li ntawd. Yog vim li cas? Yehauvas xav kom nws cov tub qhe paub tias nws hlub lawv npaum li ib leej niam hlub nws tus menyuam. Cov niam yeej xav ib yam li tus muam hu ua Ntsaximees (Jasmin) hais no: “Koj yeej hlub tus menyuam uas koj tu thaum mos mos liab los.”

2. Yehauvas xav li cas thaum nws ib tug tub qhe tso tseg tsis mus tshaj tawm thiab tsis mus kev sib txoos lawm?

² Yehauvas yeej paub thaum nws ib tug tub qhe tso tseg tsis mus tshaj tawm * thiab tsis mus kev sib txoos lawm. Sim xav seb thaum nws pom nws cov tub qhe coob tus ua li ntawd txhua txhua xyoo, ua rau nws tu siab npaum li cas.

3. Yehauvas puas xav kom cov uas tso tseg tsis mus tshaj tawm lossis tsis mus kev sib txoos lawm rov los?

³ Cov kwvtij nkauj muam uas tso tseg tsis mus tshaj tawm lossis tsis mus kev sib txoos, muaj coob tus kuj rov los rau hauv lub koom txoos lawm. Thaum lawv rov los peb yeej zoo siab kawg li. Yehauvas xav kom lawv txhua tus rov los, peb los kuj xav ib yam li ntawd thiab. (1 Petus 2:25) Peb yuav pab kom lawv rov los li cas? Ua ntej peb teb lo lus nug no, zoo rau peb paub  tias yog vim li cas lawv ib txhia thiaj li tso tseg tsis mus kev sib txoos thiab tsis mus tshaj tawm lawm.

4. Vim lawv txoj haujlwm, ua li cas rau ib txhia lawm?

⁴ Muaj ib txhia, lawv pheej rau rau siab mus khwv noj khwv haus xwb lawv thiaj tso tseg tsis teev tiam Yehauvas lawm. Muaj ib tug kwvtij hu ua Huas * uas nyob sab Axia hais tias: “Kuv siv tag nrho kuv lub dag lub zog mus khwv noj khwv haus. Kuv xav tias yog kuv muaj nyiaj muaj txiaj ces kuv yuav teev tiam tau Yehauvas zoo dua. Tiamsis kuv xav yuam kev lawm. Kuv txawm pib ua haujlwm ntau zuj zus ces kuv txawm pib mus kev sib txoos tsawg zuj zus mus txog ntua thaum kuv tso tseg tsis mus kev sib txoos kiag li lawm. Xatas yeej siv lub qab ntuj no los tab kaum peb kom peb nrug deb zuj zus ntawm Vajtswv.”

5. Tej kev nyuaj siab uas tus muam no raug txo tau nws li cas?

⁵ Muaj ib txhia kwvtij nkauj muam qaug zog vim lawv muaj kev nyuaj siab ntau yam. Ib leej niam hu ua Anis hauv tebchaws Askiv uas muaj 5 tug menyuam hais tias: “Kuv tus tub ntxawg thaum yug tau los lub cev yeej tsis meej xeeb. Kuv ib tug ntxhais los tseem raug rho tawm lawm thiab. Kuv tus tub hlob los kuj muaj ib tug mob loj thiab. Kuv nyuaj siab kawg li, kuv thiaj tsis mus kev sib txoos thiab mus tshaj tawm li lawm.” Peb yeej nrog Anis tsev neeg thiab cov uas raug ib yam li lawv nyuaj siab kawg li.

6. Tus uas tsis ua li Kaulauxais 3:13 hais, yuav ua li cas rau nws?

⁶ Nyeem Kaulauxais 3:13. Yehauvas cov tub qhe ib txhia tso tseg tsis teev tiam Yehauvas vim muaj tej tug hauv lub koom txoos ua rau lawv tu siab. Tus tubtxib Paulus hais tias muaj tej thaud peb cov kwvtij nkauj muam ‘ib tug yuav ua txhaum rau ib tug.’ Tej zaum lawv ua tsis ncaj rau peb los muaj thiab. Tiamsis yog peb tsis ceev faj ces peb yuav khaws chim lossis tu siab rau lawv. Thaum muaj li no ces peb yuav tso tseg zuj zus tsis mus koom nrog Yehauvas cov neeg. Muaj ib tug kwvtij hu ua Phanplaum (Pablo) nyob Amelikas qab teb raug luag iab liam tias nws ua txhaum, nws thiaj plam nws tes haujlwm hauv lub koom txoos lawm. Nws ua li cas xwb? Phanplaum hais tias: “Kuv chim kawg li. Kuv thiaj pib txav deb zuj zus ntawm lub koom txoos.”

7. Yog ib tug neeg lub siab pheej tshum nws, yuav ua tau li cas rau nws?

⁷ Yog muaj ib tug ho ua txhaum loj yav tas los, tej thaud nws yuav nyuaj siab heev rau qhov nws xav tias Vajtswv tsis hlub nws lawm. Txawm nws twb tso nws txojkev txhaum tseg thiab Yehauvas twb zam txim rau nws lawm los tej zaum nws tseem xav tias nws tsis tsim nyog ua Vajtswv ib tug tub qhe lawm. Ib tug kwvtij hu ua Falaxikaus (Francisco) xav ib yam li ntawd. Nws hais tias: “Kuv raug ntuas vim kuv mus ua kev plees kev yi. Tom qab ntawd kuv yeej mus kev sib txoos thiab, tiamsis kuv txawm cia li nyuaj siab heev thiab xav tias tsis tsim nyog kuv mus nrog Yehauvas cov neeg ua ke. Kuv lub siab pheej tshum kuv thiab kuv xav tias Yehauvas tsis tau zam txim rau kuv. Ntev mus ntev tuaj kuv cia li tsis mus tshaj tawm thiab tsis mus kev sib txoos li lawm.” Koj xav li cas xwb, txog cov kwvtij nkauj muam uas peb tham tas los no? Koj puas nrog lawv nyuaj siab thiab? Yehauvas xav li cas txog lawv xwb?

8. Yehauvas puas tseem nco ntsoov txog cov uas tso tseg tsis teev tiam nws tau ib ntus?

⁸ Yehauvas yeej nco ntsoov cov uas tso tseg tsis teev tiam nws tau ib ntus. Nws kuj tseem  nco txog tes haujlwm uas lawv tau ua rau nws thiab. (Henplais 6:10) Yaxayas sau ib zaj lus piv txwv zoo heev los qhia rau peb tias Yehauvas saib xyuas nws cov neeg li cas. Yaxayas hais tias: “[Vajtswv] yuav tu nws pab yaj ib yam li tus tswv yug yaj, nws yuav sau zog tej menyuam yaj los puag rau ntawm nws ob txhais npab, nws yuav muab lawv puag hlo rau hauv nws lub xubntiag.” (Yaxayas 40:11) Yehauvas xav li cas xwb thaum nws ib tug tub qhe tso tseg tsis teev tiam nws lawm? Yexus hais tias: ‘Nej xav li cas? Muaj ib tug txivneej muaj 100 tus yaj, yog ib tug ploj lawm, nws yeej yuav tso 99 tug rau pem ntav toj, thiab mus nrhiav tus uas ploj lawm. Kuv qhia rau nej hais tias, thaum nws nrhiav tau lawm, nws zoo siab rau tus uas ploj lawm heev dua li nws zoo siab rau 99 tug uas tsis ploj.’​—Mathais 18:12, 13.

9. Phau Vajlugkub qhia tias cov tswv yug yaj thaum ub saib xyuas lawv cov yaj li cas? (Saib daim duab ntawm lub khaum.)

⁹ Yehauvas zoo li ib tug tswv yug yaj li cas? Phau Vajlugkub qhia tias cov tswv yug yaj thaum ub hlub thiab saib xyuas lawv cov yaj zoo heev. Xws li Daviv tiv thaiv nws pab yaj ntawm ib tug tsov ntxhuav thiab ib tug dais. (1 Xamuyees 17:34, 35) Tus tswv yug yaj uas saib xyuas nws pab yaj zoo yeej paub thaum muaj ib tug ploj lawm. (Yauhas 10:3, 14, 15) Nws yuav muab nws cov yaj kaw rau hauv ib lub nkuaj lossis thov lwm tus tswv yug yaj pab saib xyuas lawv thaum nws mus nrhiav tus uas ploj lawm. Yexus piav zaj lus piv txwv no los qhia peb tias: “Nej Leej Txiv tus uas nyob saum ntuj Ceebtsheej yeej tsis xav kom cov menyuam [yaj] no ib tug puastsuaj li.”​—Mathais 18:14.

10. Raws li Exekees 34:11-16, Yehauvas cog lus tias nws yuav ua li cas thaum nws ib tug tub qhe ploj lawm?

¹⁰ Yehauvas hlub peb txhua leej txhua tus, txawm tus uas nrug deb ntawm nws lawm los nws yeej tseem hlub. Hauv phau Exekees, Vajtswv cog lus tias nws yuav mus nrhiav nws cov tub qhe uas ploj lawm thiab pab kom lawv rov los muaj kev sib raug zoo nrog nws.  Vajtswv qhia tias nws yuav ua li cas los cawm lawv thiab nws yuav cawm lawv ib yam li tus tswv yug yaj Yixalayees cawm nws tus yaj uas ploj lawm. (Nyeem Exekees 34:11-16.) Thaum tus tswv yug yaj mus nrhiav nws tus yaj, nws yuav siv dag zog thiab sijhawm ntau heev. Thaum nws nrhiav tau tus yaj uas ploj lawd nws yuav coj tus yaj ntawd rov los nrog nws pab yaj. Yog nws tus yaj tshaib plab lossis raug mob li cas los nws yuav tu tus yaj ntawd kom zoo. Cov txwj laus hauv lub koom txoos yog cov ‘yug pab yaj uas Vajtswv muab tso rau lawv saib.’ Thaum ib tug hauv lub koom txoos tsis tuaj kev sib txoos lossis tsis mus tshaj tawm lawm, cov txwj laus yuav ua ib yam li cov tswv yug yaj. (1 Petus 5:2, 3) Lawv yuav mus nrhiav tus ntawd, pab nws rov los rau hauv lub koom txoos, thiab pab nws rov los ua Yehauvas ib tug phoojywg. *

11. Tus tswv yug yaj yeej paub li cas txog nws cov yaj?

¹¹ Tus tswv yug yaj yeej paub tias muaj tej zaud nws cov yaj ib tug yuav poob zoo. Yog ib tug yaj pla ntawm pab yaj mus los tus tswv yug yaj yuav tsis ua phem rau tus yaj ntawd. Cia peb kawm seb Yehauvas pab nws cov tub qhe li cas thaum lawv tsis muaj siab ua nws tes haujlwm.

12. Yehauvas puas kav liam Yaunas thaum nws tsis mloog Yehauvas lus?

¹² Txawm tus cev Vajtswv lus Yaunas tsis mloog Yehauvas lus thiab tsis kam mus cev lus hauv lub nroog Nineves los, Yehauvas tsis kav liam nws. Yehauvas zoo li ib tug tswv yug yaj, Yehauvas cawm Yaunas thiab pab nws ua nws tes haujlwm kom tiav. (Yaunas 2:7; 3:1, 2) Yehauvas siv ib tsob taub hwb los qhia Yaunas tias neeg txojsia muaj nqis npaum li cas. (Yaunas 4:10, 11) Peb kawm tau li cas? Cov txwj laus yuav tsum tsis txhob kav liam cov uas tso tseg tsis mus kev sib txoos lossis tsis mus tshaj tawm lawm. Tiamsis lawv yuav tsum ua zoo xyuas seb yog vim li cas tus ntawd thiaj nrug deb ntawm lub koom txoos. Thiab thaum nws rov los, cov txwj laus yuav tsum ua tib zoo pab thiab txhawb nws.

13. (1) Yehauvas puas chim rau tus sau Phau Ntawv Nkauj 73? (2) Peb kawm tau li cas xwb?

 ¹³ Tus sau Phau Ntawv Nkauj 73 qaug zog heev thaum nws pom cov neeg phem vam meej. Nws xav tias puas tsim nyog nws ua Vajtswv tes haujlwm. (Phau Ntawv Nkauj 73:3, 13, 16) Yehauvas puas chim rau nws? Nws tsis chim. Yehauvas muab tus sau zaj nkauj no cov lus sau cia rau hauv phau Vajlugkub. Tus sau zaj nkauj no kuj ras tias tsis muaj ib yam dabtsi yuav pauv tau txojkev sib raug zoo nrog Yehauvas. (Phau Ntawv Nkauj 73:23, 24, 26, 28) Peb kawm tau li cas xwb? Thaum ib tug pib xav tias puas tsim nyog nws pe hawm Yehauvas lawm, cov txwj laus yuav tsum tsis txhob rawm maj xav yuam kev txog nws thiab ntuas nws. Lawv yuav tsum xyuas seb yog vim li cas nws thiaj hais li ntawd. Thaum lawv to taub nws lawm ces lawv thiaj li paub siv phau Vajlugkub los txhawb nws.

14. (1) Vim li cas Eliyas nyuaj siab ua luaj? (2) Yehauvas pab Eliyas li cas?

¹⁴ Tus uas cev Vajtswv lus Eliyas khiav ntawm tus Poj Vajntxwv Yexenpees. (1 Vajntxwv 19:1-3) Eliyas xav tias tsis muaj lwm tus cev lus rau Yehauvas lawm, tsuas tshuav nws tib leeg xwb. Nws kuj xav tias txhua yam nws ua rau Yehauvas nkim nws lub zog xwb. Eliyas nyuaj siab kawg li thiab xav tias yog nws tuag yuav zoo dua. (1 Vajntxwv 19:4, 10) Yehauvas tsis chim rau Eliyas tiamsis Yehauvas txhawb nws tias yeej tseem tshuav cov cev Vajtswv lus thiab, kom nws tso siab rau Vajtswv lub hwjchim. Yehauvas mloog Eliyas piav nws tej kev txhawj xeeb thiab muab haujlwm ntau ntxiv rau nws ua. (1 Vajntxwv 19:11-16, 18)  Peb kawm tau li cas xwb? Peb txhua tus, tsis hais cov txwj laus xwb, yuav tsum hlub Yehauvas cov tub qhe. Txawm Yehauvas ib tug tub qhe chim siab lossis xav tias Yehauvas yuav tsis zam nws lub txim li lawm los cov txwj laus yuav tsum ua siab ntev mloog nws thaum nws qhia siab rau lawv. Lawv yuav tau txhawb tus uas ncaim ntawm Yehauvas tias Yehauvas yeej tseem hlub nws heev.

15. Raws li Yauhas 6:39, Yexus saib Yehauvas cov tub qhe zoo li cas?

¹⁵ Yehauvas xav kom peb saib cov uas ncaim ntawm nws lawm li cas? Yexus ua qauv qhia tias peb yuav tsum saib lawv li cas. Yexus paub tias Yehauvas saib nws cov tub qhe txhua tus muaj nqis, Yexus thiaj siv dag siv zog mus nrhiav “pab yaj uas ploj lawm” kom rov los cuag Yehauvas. (Mathais 15:24; Lukas 19:9, 10) Yexus zoo li ib tug tswv yug yaj rau qhov nws ua li nws ua tau kom Yehauvas cov tub qhe tsis muaj ib tug ploj li.​—Nyeem Yauhas 6:39.

16, 17. Cov txwj laus xav li cas xwb, txog cov uas nrug deb ntawm Yehauvas mus lawm? (Saib lub ntsiab me “ Tus Uas Ncaim Ntawm Yehauvas Lawd Xav Li Cas.”)

¹⁶ Tus tubtxib Paulus txhawb kom cov txwj laus hauv lub koom txoos Efexus xyaum Yexus tus qauv. Nws hais tias: ‘Peb yuav tsum ua haujlwm pab cov neeg uas tsis muaj zog. Thiab peb yuav tsum nco ntsoov tej lus uas tus Tswv Yexus qhia hais tias, “Thaum yus pub rau luag yus zoo siab heev dua thaum yus tau luag li.”’ (Tes Haujlwm 20:17, 35) Nqi Vajlugkub no qhia tias cov txwj laus lub luag haujlwm yog saib xyuas Yehauvas cov neeg. Ib tug txwj laus hauv tebchaws Xapee hu ua Xavadaus (Salvador) hais tias: “Thaum kuv xav tias Yehauvas hlub tshua nws cov tub qhe uas ncaim nws lawd npaum li cas, ua rau kuv hajyam xav pab lawv. Thiab kuv paub tias Yehauvas yeej xav kom kuv mus pab lawv.”

¹⁷ Txhua tus hauv zaj no uas nrug ntawm Yehauvas mus lawm puavleej tau txais kev pab thiab rov los cuag Yehauvas. Nimno los tseem muaj coob tus uas xav rov los thiab. Zaj tom ntej peb yuav tham ntxiv seb peb yuav ua li cas pab lawv rov los cuag Yehauvas.