ZAJ KAWM 23
“Thov Kom Sawvdaws Hwm Koj Lub Npe”
‘Yehauvas koj lub npe yuav nyob mus ibtxhis.’—PHAU NTAWV NKAUJ 135:13.
ZAJ NKAUJ 10 Cia Li Qhuas Peb Tus Vajtswv Yehauvas!
ZAJ NO THAM TXOG DABTSI? *
1, 2. Yehauvas Cov Timkhawv nyiam tham txog 2 lub ntsiab tseem ceeb twg?
TXHUA leej txhua tus yuav tsum paub tias tsuas yog Vajtswv Yehauvas xwb thiaj muaj cai kav ib puas tsav yam thiab sawvdaws yuav tsum hwm Yehauvas lub npe. Yehauvas Cov Timkhawv nyiam tham txog 2 lub ntsiab tseem ceeb no heev.
2 Peb paub tias Yehauvas lub npe yuav tsum tsis muaj chaw thuam thiab sawvdaws yuav tsum paub tias Yehauvas txojkev kav yog txoj uas zoo tshaj plaws. Ob lub ntsiab no puavleej tseem ceeb ib yam nkaus.
3. Yehauvas lub npe qhia li cas txog nws?
3 Yehauvas lub npe qhia tias nws yog tus Vajtswv zoo li cas. Nws lub npe kuj qhia txog nws txojkev kav thiab. Yog li ntawd thaum peb mus qhia tibneeg kom lawv hwm Yehauvas lub npe ces yeej yog peb qhia rau lawv tias Yehauvas txojkev kav yog txoj zoo tshaj plaws thiab.—Saib lub ntsiab me “ Tej Yam Ntsig Txog Qhov Uas Hwm Vajtswv Lub Npe.”
4. (1) Phau Ntawv Nkauj 135:13 piav li cas txog Vajtswv lub npe? (2) Peb yuav teb cov lus nug twg hauv zaj no?
4 Tsis muaj ib lub npe uas zoo npaum li Yehauvas lub. (Nyeem Phau Ntawv Nkauj 135:13.) Vim li cas Vajtswv lub npe tseem ceeb ua luaj? Nws lub npe raug xyav li cas? Yehauvas ua li cas los daws nws lub npe? Thiab peb yuav tiv thaiv nws lub npe li cas? Peb yuav teb cov lus nug no hauv zaj kawm no.
LUB NPE TSEEM CEEB NPAUM LI CAS
5. Muaj ib txhia yuav xav li cas txog qhov uas hwm Vajtswv lub npe?
5 Yexus hais tias thaum peb thov Vajtswv, peb yuav tsum “thov kom sawvdaws hwm [Vajtswv] lub npe.” (Mathais 6:9) Yexus hais tias qhov no yog qhov tseem ceeb tshaj plaws uas peb yuav tsum thov txog. Vim li cas? Muaj ib txhia xav tias, ‘Peb twb hwm Vajtswv lub npe lawm ne?’ Cia peb mus tham seb lub npe tseem ceeb npaum li cas.
6. Ua li cas lub npe zoo thiaj tseem ceeb ua luaj?
6 Lub npe tsis yog rau peb hu lossis sau rau hauv ntaub ntawv xwb. Phau Vajlugkub hais tias: “Lub koob lub npe zoo, zoo dua tej roj tsw qab uas muaj nqis.” (Tej Lus Qhia 7:1; Pajlug 22:1) Ua li cas lub npe zoo thiaj tseem ceeb ua luaj? Rau qhov tus neeg lub npe qhia tias nws zoo li cas. Qhov uas luag paub hais ib tug lub npe lossis paub sau nws lub npe tsis tseem ceeb luaj twg. Qhov tseem ceeb tshaj yog qhov uas luag xav li cas txog tus neeg ntawd thaum luag hnov nws lub npe.
7. Tibneeg ua li cas kom Vajtswv puas koob puas npe?
7 Thaum tibneeg hais lus xaiv lus dag txog Yehauvas ces twb yog lawv xav kom luag xav phem txog nws thiab kom nws puas koob puas npe. Thawj zaug uas luag hais lus xaiv lus dag txog Yehauvas yog nyob hauv lub Vaj Edees. Cia peb kawm txog qhov no.
THAWJ ZAUG UAS LUAG DAG TXOG YEHAUVAS LUB NPE
8. (1) Adas thiab Evas paub dabtsi txog Vajtswv? (2) Muaj lus nug dabtsi ntxiv thiab?
8 Adas thiab Evas paub tias Vajtswv lub npe hu ua Yehauvas, thiab nkawd paub ntau yam zoo txog nws. Nkawd paub tias nws yog tus tsim txhua yam, tus muab txojsia rau nkawd, muab ib qho chaw zoo nkauj heev rau nkawd nyob, thiab muab nkawd txis ua txij nkawm. (Chivkeeb 1:26-28; 2:18) Vajtswv tsim nkawd zoo tiav log, tiamsis nkawd puas xav txog txhua yam uas Vajtswv tau muab rau nkawd? Nkawd puas nco Yehauvas txiaj ntsig thiab hlub nws? Peb yuav paub tias nkawd xav li cas tiag txog Yehauvas thaum nws tus yeeb ncuab los sim nkawd.
9. (1) Raws li Chivkeeb 2:16, 17, Yehauvas hais li cas rau Adas thiab Evas nkawd? (2) Raws li Chivkeeb 3:1-5, Xatas ntxeev lus li cas?
9 Nyeem Chivkeeb 2:16, 17 thiab 3:1-5. Xatas ua kom zoo li ib tug nab nrog Evas tham thiab nug Evas tias: “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?” Lo lus nug no yog lus dag ntxias xwb tiamsis Evas txawm pib xav tsis zoo txog Vajtswv lawm. Vajtswv hais li cas rau nkawd? Vajtswv hais tias nkawd noj tau txhua tsob txiv ntoo tsuas yog tib tsob xwb nws thiaj tsis pub nkawd noj. Yehauvas yeej siab dawb siab zoo kawg li uas nws pub txiv hmab txiv ntoo ntau heev rau nkawd. (Chivkeeb 2:9) Tiamsis Xatas ntxeev lus thiab iab liam tias Vajtswv qia dub. Tej zaum Evas kuj pib xav tias, ‘Ntshe Vajtswv zais tsis pub qhov zoo rau kuv lawm tiag.’
10. (1) Xatas xyav Vajtswv lub npe li cas? (2) Thaum kawg Adas thiab Evas nkawd ua li cas?
10 Evas tseem mloog Yehauvas lus thaum Xatas los sim nws. Evas teb ntua Xatas tias Vajtswv tsis pub nkawd noj tsob txiv ntoo uas nyob hauv plawv vaj. Nws tseem hais ntxiv tias nkawd twb kov tsis tau tsob txiv ntoo ntawd. Nws paub Vajtswv ceeb toom tias yog nkawd noj ces nkawd yuav tuag. Tiamsis Xatas teb Evas tias: “Neb yuav tsis tuag ib zaug li.” (Chivkeeb 3:2-4) Zaum no Xatas tsis zais lus li lawm. Nws xyav kiag Vajtswv lub npe tias Vajtswv dag nkawd. Evas txawm cia li ntseeg Xatas tej lus dag ntxias. (1 Timautes 2:14) Twb yog vim li no Xatas thiaj tau lub npe hu ua Ntxwg Nyoog lossis tus niag dag. Vim Evas ntseeg Xatas dua li nws ntseeg Yehauvas, Xatas thiaj dag tau Evas. Evas thiaj tsis mloog Yehauvas lus thiab noj tsob txiv uas Yehauvas txwv tsis pub noj. Tom qab ntawd Evas kuj muab rau Adas noj thiab.—Chivkeeb 3:6.
11. Tsim nyog Adas thiab Evas ua li cas thaum Xatas sim nkawd?
11 Sim xav seb tsim nyog Evas hais li cas rau Xatas. Kheev lam nws hais tias: “Kuv tsis paub koj yog leejtwg tiamsis kuv paub kuv txiv Yehauvas zoo. Kuv hlub nws thiab kuv ntseeg nws. Nws yog tus pub ib puas tsav yam rau Adas wb. Koj yuav hais phem txog kuv txiv li ko tsis tau nawb! Koj cia li khiav mus kiag tamsim no!” Ntshe Yehauvas yuav zoo siab heev yog nws hnov nws tus ntxhais hais li no txog nws. (Pajlug 27:11) Tiamsis Evas tsis hlub Yehauvas kawg siab kawg ntsws. Nws tus txiv los tsis txawv ntawd thiab. Vim nkawd tsis npuab siab rau nkawd Txiv, nkawd thiaj tsis tiv thaiv Yehauvas lub npe.
12. (1) Xatas ua li cas Evas thiaj tsis ntseeg Vajtswv? (2) Adas thiab Evas puas tiv thaiv Yehauvas lub npe?
12 Raws li peb kawm no, Xatas pib xyav Yehauvas lub koob lub npe thaum nws ntxias Evas tias Yehauvas tsis yog ib leej txiv zoo. Adas thiab Evas tsis tiv thaiv Yehauvas lub npe thiaj yoojyim heev rau nkawd qaug quav rau Xatas tej lus dag ntxias thiab fav xeeb rau Yehauvas. Xatas tseem niaj hnub dag ntxias tibneeg kom Yehauvas puas koob puas npe thiab. Cov uas ntseeg Xatas tej lus dag ntxias yuav tsis kam lees yuav Yehauvas txojkev kav uas ncaj ncees.
YEHAUVAS DAWS NWS LUB NPE
13. Exekees 36:23 pab peb pom tias lub ntsiab hauv phau Vajlugkub yog li cas?
13 Yehauvas puas cia li kav liam xwb thaum luag xyav nws lub koob lub npe? Nws yeej tsis ua li ntawd ib zaug li! Phau Vajlugkub qhia tias Yehauvas tau ua li cas los daws nws lub npe uas Xatas xyav hauv lub vaj Edees. (Chivkeeb 3:15; nyeem Exekees 36:23. *) Lub ntsiab hauv phau Vajlugkub yog li no: Yehauvas siv lub Nceeg Vaj uas nws tus Tub kav los daws nws lub npe dawb huv thiab coj kev ncaj ncees thiab kev thaj yeeb rov rau lub ntiajteb.
14. Yehauvas ua li cas los daws nws lub npe uas Xatas xyav hauv lub vaj Edees?
14 Txawm Xatas ua ib puas tsav yam los tav kom Yehauvas ua tsis tau tiav raws li nws lub ntsiab los Xatas yeej tav tsis tau. Phau Vajlugkub qhia txog tej uas Yehauvas tau ua thiab qhia tias nws yog ib Leej Txiv uas muaj kev hlub thiab nws txojkev kav yeej zoo tshaj. Txawm Xatas thiab cov uas tuaj nws tog yeej ua rau Yehauvas tu siab heev los Yehauvas ua siab ntev siv nws lub tswvyim thiab kev ncaj ncees los daws nws lub npe uas dawb huv. (Phau Ntawv Nkauj 78:40) Tsis tas li ntawd xwb nws kuj ua nws lub hwjchim rau sawvdaws pom ntau zaus. Qhov tseem ceeb tshaj yog txhua yam uas nws ua qhia tias nws muaj kev hlub. (1 Yauhas 4:8) Yehauvas yeej ua txhua yam kom sawvdaws hwm nws lub npe.
Xatas xyav Vajtswv lub npe thaum nws iab liam rau Evas tias Vajtswv dag Evas lawm. Xatas yeej tseem xyav Vajtswv lub npe niaj hnub nimno (Saib nqi 9-10, 15) *
15. (1) Niaj hnub no Xatas xyav Vajtswv lub npe li cas? (2) Yog tibneeg ntseeg Xatas tej lus dag ntxias ces lawv yuav ua li cas xwb?
15 Niaj hnub nimno los Xatas tseem xyav Vajtswv lub npe qees. Nws dag ntxias kom neeg ntseeg tias Vajtswv tsis muaj hwjchim, tsis ncaj ncees, tsis muaj tswvyim thiab tsis muaj kev hlub. Nws dag ntxias tibneeg li cas? Xatas ntxias kom neeg ntseeg tias Yehauvas tsis yog tus tswv tsim ib puas tsav yam. Txawm cov ntseeg tias muaj Vajtswv los Xatas dag tias Vajtswv tej kevcai nruj heev thiab tsis ncaj. Xatas kuj dag tibneeg tias Yehauvas siab phem heev thiab muab neeg hlawv hauv ntuj tawg. Yog lawv ntseeg li no ces lawv yuav tsis kam yuav Yehauvas ua tus kav lawv. Yog tseem muaj Xatas nyob ces nws yeej yuav dag ntxias tibneeg tas mus li thiab tseem yuav dag ntxias kom tau koj thiab. Ua li, nws puas yuav dag tau koj?
KOJ YUAV UA LI CAS
16. Qhov uas Adas thiab Evas nkawd tsis ua tiamsis koj ua tau, yog dabtsi?
16 Txawm peb yog neeg txhaum xwb los Yehauvas tseem siv peb mus pab tibneeg los hwm nws lub npe. Koj ua tau qhov uas Adas thiab Evas nkawd tsis ua. Txawm muaj coob leej ntau tus xyav Vajtswv lub koob lub npe los koj yeej muaj cuab kav qhia rau lawv tias Vajtswv Yehauvas yog tus Vajtswv uas dawb huv, ncaj ncees, zoo, thiab muaj kev hlub. (Yaxayas 29:23) Koj txhawb tau Yehauvas txojkev kav thaum koj mus qhia lwm tus tias nws txojkev kav yog txoj ncaj ncees thiab yuav coj kev thaj yeeb nyab xeeb los rau sawvdaws.—Phau Ntawv Nkauj 37:9, 11; 146:5, 6, 10.
17. Yexus ua li cas sawvdaws thiaj paub nws Txiv lub npe?
17 Thaum peb tiv thaiv Vajtswv Yehauvas lub npe ces twb yog peb ua li Yexus Khetos ua. (Yauhas 17:26) Yexus tsis yog qhia kom sawvdaws paub nws txiv lub npe xwb tiamsis nws kuj qhia lawv tias Yehauvas zoo li cas thiab. Xws li thaum cov Falixais ua rau sawvdaws ntseeg tias Yehauvas siab phem, yuav nws siab xwb, tsis hlub thiab tsis khuvleej lwm tus li los Yexus pab kom sawvdaws pom tias nws Txiv yeej mloog peb, ua siab ntev rau peb, hlub thiab zam txim rau peb. Yexus tus yam ntxwv los kuj qhia tias Vajtswv zoo li cas thiab.—Yauhas 14:9.
18. Peb yuav ua li cas lwm tus thiaj tsis ntseeg tej lus dag txog Yehauvas?
18 Peb kuj ua tau li Yexus es mus qhia lwm tus txog Yehauvas thiab. Yog peb ua li no ces lawv yuav paub hwm Yehauvas lub npe dawb huv. Peb qhia tau tias Yehauvas muaj kev hlub thiab muaj lub siab zoo. Yog peb ua li no ces luag tej yuav tsis ntseeg tej lus dag txog Yehauvas lawm. Tsis tas li ntawd xwb txawm peb zoo tsis tiav los peb yeej xyaum tau Yehauvas tus yam ntxwv ib yam li Yexus thiab. (Efexus 5:1, 2) Tej peb hais thiab tej peb ua pab tau tibneeg los hwm Vajtswv lub npe. Thaum peb muab siab npuab Vajtswv los peb kuj hwm Yehauvas lub npe thiab.—Pajlug 26:1.
Thaum peb qhia Vajlugkub, peb xav pab tus kawm Vajlugkub paub txog Yehauvas tus yam ntxwv zoo (Saib nqi 18-19) *
19. Raws li Yaxayas 63:7, thaum peb qhia Vajlugkub peb lub hom phiaj yog dabtsi?
19 Peb hwm tau Yehauvas lub npe li cas ntxiv thiab? Peb hwm nws lub npe thaum peb mus qhia Vajlugkub rau lwm tus. Thaum qhia Vajlugkub peb qhia tias Yehauvas muaj cai kav ib puas tsav yam. Thiab yeej zoo rau peb qhia txog Yehauvas tej kevcai tiamsis peb lub hom phiaj yog kom lawv paub hlub peb Leej Txiv Yehauvas thiab muab siab npuab nws. Yog li ntawd, peb yuav tsum qhia lawv txog Yehauvas tus yam ntxwv thiab qhia lawv tias nws zoo li cas tiag. (Nyeem Yaxayas 63:7.) Yog peb qhia li ntawd ces peb yuav pab tau lawv muab siab npuab Yehauvas vim lawv hlub nws thiab xav mloog nws lus.
20. Zaj tom ntej peb yuav kawm txog dabtsi?
20 Peb yuav tau coj li cas thiab qhia li cas thiaj pab tau lwm tus xav zoo txog Yehauvas thaum lawv hnov nws lub npe thiab xav los paub nws? Zaj tom ntej yuav teb lo lus nug no.
ZAJ NKAUJ 2 Koj Hu Ua Yehauvas
^ nqe 5 Muaj 2 lub ntsiab uas tseem ceeb heev rau tibneeg thiab cov tubtxib saum ntuj. Ob lub ntsiab ntawd yog dabtsi? Vim li cas thiaj tseem ceeb ua luaj? Peb yuav tau ua li cas xwb? Cov lus teb rau tej lus nug no yuav pab peb txojkev sib raug zoo nrog Yehauvas kom ruaj khov ntxiv.
^ nqe 13 Exekees 36:23 (NWT ): “‘Kuv yuav ua kom sawvdaws paub tias kuv lub npe loj kawg nkaus thiab dawb huv. Yog lub npe uas nej coj mus ua puas tsuas tag rau ib tsoom tebchaws. Thaum lawv pom tej uas kuv ua rau nej, lawv yuav paub tias kuv yog Yehauvas.’ Tus Tswv Yehauvas uas kav ib puas tsav yam hais li no ntag.”
^ nqe 62 COV DUAB: Dab Ntxwg Nyoog xyav Vajtswv lub npe thaum nws iab liam rau Evas tias Vajtswv dag Evas lawm. Txij thaum ntawd los Xatas qhia tej tswvyim dag txog Vajtswv tias nws siab phem thiab nws tsis yog tus tsim tibneeg.
^ nqe 64 COV DUAB: Thaum tus kwvtij no qhia Vajlugkub nws qhia txog Vajtswv tus yam ntxwv.
