1, 2. (1) Ua cas peb thiaj paub tias nom tswv yuav txwv peb tes haujlwm? (2) Hauv zaj no peb yuav kawm txog dabtsi?

XYOO 2018, muaj tshaj li 223,000 tus tshaj tawm nyob hauv tej tebchaws uas nom tswv txwv hlo tsis pub pe hawm Yehauvas lossis txwv peb tes haujlwm ib txhia. Txawm peb yuav nyob rooj teb twg los, peb tsis paub xyov tej nom tswv yuav txwv tsis pub peb pe hawm Vajtswv Yehauvas thaum twg. Tiamsis zoo li zaj uas peb tau kawm tas los no, cov tseem Khixatia twb paub lawm tias lawv yuav raug kev tsim txom.​—2 Timaute 3:12.

² Thaum nom tswv cia li txwv tsis pub pe hawm Yehauvas lawm, ntshe ib txhia yuav xav li no: ‘Puas yog Vajtswv tsis txaus siab rau peb es peb thiaj raug kev tsim txom? Nom tswv puas txiav tau peb txojkev pe hawm Yehauvas? Puas zoo rau kuv khiav mus nyob lwm lub tebchaws uas nom tswv tsis txwv?’ Hauv zaj no, peb yuav kawm txog 3 lo lus nug ntawd. Peb yuav kawm ntxiv tias thaum nom tswv txwv, peb yuav pe hawm Yehauvas li cas thiab peb yuav tau zam tej yam twg.

3. Hauv 2 Khaulee 11:23-27, Povlauj tau raug kev tsim txom li cas? Povlauj tus qauv qhia tau peb li cas?

³ Yog nom tswv txwv peb txojkev pe hawm, peb yuav xav tias tej zaum Vajtswv tsis txaus siab rau peb lawm. Tiamsis tsis txhob xav li ntawd. Xav txog tus tubtxib Povlauj.  Yehauvas yeej txaus siab heev rau Povlauj, nws thiaj cia Povlauj sau Khixatia Cov Nqe Lus Kili 14 phau thiab cia Povlauj mus tshaj tawm rau ntau haiv neeg. Txawm li ntawd los, Povlauj tseem raug tsim txom ntau heev. (Nyeem 2 Khaulee 11:23-27.) Qhov no qhia rau peb tias txawm cov uas muab siab npuab Yehauvas los, tej thaud Yehauvas yeej cia lawv raug kev tsim txom.

4. Vim li cas lub qab ntuj neeg thiaj ntxub peb?

⁴ Yexus hais tias peb yuav raug luag tsim txom vim peb tsis yog ntiajteb li. (Yauhas 15:18, 19) Yog li ntawd, tsis yog tias Yehauvas tsis txaus siab rau peb, tiamsis twb yog peb ua haum Yehauvas siab es peb thiaj raug kev tsim txom xwb.

5. Tibneeg puas muaj peevxwm txwv tau txojkev pe hawm Yehauvas? Piav txog cov qauv.

⁵ Tibneeg xwb yeej tsis muaj peevxwm txwv tau txojkev pe hawm Yehauvas tus uas muaj hwjchim loj kawg nkaus. Yav tas los, twb muaj coob tus txwv tiamsis txwv tsis tau. Thaum muaj Ntsuj Rog Thoob Qab Ntuj Zaum 2, tej nom tswv coob tus tawm tsam Vajtswv cov tibneeg heev. Tsis yog cov Natxi (Nazi) hauv tebchaws Ntsaws Mes Nis (Germany) txwv peb tes haujlwm xwb, tiamsis tej nom tswv hauv tebchaws Auxitalia, Kanada, thiab lwm lub tebchaws los ua ib yam nkaus. Tiamsis lawv txwv puas tau? Thaum tsov rog pib rau xyoo 1939, cov tshaj tawm thoob ntiajteb muaj li 72,475 tus. Tiamsis thaum tsov rog xaus rau xyoo 1945, cov tshaj tawm muaj li 156,299 tus. Vim Yehauvas foom koob hmoov rau nws cov tibneeg lawv thiaj huaj vam tshaj li 2 npaug!

6. Vim li cas qhov uas nom tswv txwv kuj muaj qhov zoo thiab? Piav txog tus qauv.

⁶ Txhob cia kev tawm tsam ua rau peb ntshai, tiamsis cia qhov ntawd ua kom peb hajyam xav teev tiam Yehauvas ntxiv xwb. Xws li ob niam txiv uas muaj ib tug menyuam tub, lawv nyob hauv ib lub tebchaws uas nom tswv txwv. Thaum nom tswv pib txwv, nkawd kuj pib tho kev. Tus pojniam tso nws txoj haujlwm zoo heev tseg. Tus txiv hais tias qhov uas nom tswv txwv peb tes haujlwm ua rau tibneeg xav paub ntxiv txog Yehauvas Cov Timkhawv. Vim li no thiaj tsis nyuaj rau nws pib kawm Vajlugkub nrog tibneeg. Thaum nom tswv txwv peb tes haujlwm kuj muaj qhov zoo thiab. Ib tug txwj laus hauv lub tebchaws ntawd hais tias  coob tus uas tau tso tseg tsis teev tiam Yehauvas kuj rov tuaj tej kev sib txoos thiab rov mus tshaj tawm dua.

7. (1) Levi Tej Kevcai 26:36, 37 qhia li cas rau peb? (2) Thaum nom tswv txwv koj, koj yuav ua li cas?

⁷ Thaum peb cov yeeb ncuab txwv peb txojkev pe hawm, lawv xav ua kom peb ntshai thiab tso Yehauvas tseg. Lawv yuav hais lus dag txog peb, xa neeg tuaj tshawb peb vaj tse, coj peb mus tom tsev hais plaub, lossis coj peb ib txhia mus kaw hauv tsev loj cuj. Lawv xav tias yog lawv muab peb ib co kwvtij kaw ces yuav ua rau peb ntshai. Yog peb ntshai ces tej zaum peb tseem yuav “txwv” peb tus kheej es tso peb tes haujlwm tseg thiab. Peb tsis xav zoo li cov uas hais hauv Levi Tej Kevcai 26:36, 37. (Nyeem.) Cia li tso siab plhuav rau Yehauvas thiab txhob cia lawv ua rau peb ntshai. (Yaxaya 28:16) Cia li thov Yehauvas coj peb txoj hau kev. Nws yog tus pab peb. Yuav tsis muaj ib tug nom tswv twg yuav txiav tau peb txojkev pe hawm Yehauvas hlo li!​—Henplais 13:6.

8, 9. (1) Nyias yuav tsum txiav txim siab nyias li cas rau nyias tsev neeg? (2) Yuav ua li cas peb thiaj paub txiav txim siab zoo?

⁸ Yog tej nom tswv hauv lub tebchaws uas koj nyob txwv tsis pub pe hawm Yehauvas, puas zoo rau koj tsiv mus nyob lwm lub tebchaws uas nom tswv tsis txwv? Nyias yuav tau txiav txim siab rau nyias tus kheej. Ua ntej koj txiav txim siab, zoo rau koj kawm txog cov Khixatia nyob thawj 100 xyoo seb lawv tau ua li cas thaum lawv raug tsim txom. Tom qab lawv cov yeeb ncuab xuas pob zeb ntaus Xatefanau tuag lawd, cov Khixatia khiav ua sab ua sua mus nyob thoob plaws lub xeev Yudia thiab Xamali mus txog ntua lub xeev Finikia, Xaipla, thiab lub moos Athi-au. (Mathai 10:23; Tubtxib Tes Haujlwm 8:1; 11:19) Tiamsis thaum cov Khixatia rov raug kev tsim txom dua, tus tubtxib Povlauj ho ua li cas? Nws txiav txim siab tias nws yuav tsis khiav mus nyob lwm qhov. Txawm luag yuav ua phem rau nws los, nws yeem nyob tshaj tawm txoj xov zoo thiab txhawb cov kwvtij hauv tej nroog uas tabtom raug luag tawm tsam hnyav heev.​—Tubtxib Tes Haujlwm 14:19-23.

⁹ Ob tug qauv no qhia peb li cas? Txhua tus txiv tsev nyias yuav tau txiav txim siab rau nyias tsev neeg seb yuav khiav los tsis khiav. Ua ntej nws yuav txiav txim siab, nws yuav tsum thov Vajtswv thiab ua tib zoo xav txog nws tsev neeg seb yog lawv nyob yuav zoo li cas, yog lawv khiav ho yuav zoo li cas. Txawm tus yuav txiav txim siab li cas los, peb tsis txhob hais lossis thuam lawv rau qhov “nyias yuav tsum ris nyias lub nra.”​—Kalatia 6:5.

10. Ceg Npe-ee thiab cov txwj laus yuav pab peb li cas?

¹⁰ Thaum nom tswv txwv, peb yuav ua li cas pe hawm Yehauvas? Ceg Npe-ee yuav qhia cov txwj laus hauv koj lub koom txoos tias yuav mus nqa peb tej ntaub ntawv qhovtwg, yuav sib txoos thiab mus tshaj tawm li cas. Yog ceg Npe-ee nrog tsis tau cov txwj laus tham los cov txwj laus yeej yuav pab txhua tus hauv lub koom txoos pe hawm Yehauvas tsis tseg. Lawv yuav siv phau Vajlugkub thiab peb tej ntaub ntawv los cob qhia peb.​—Mathai 28:19, 20; Tubtxib Tes Haujlwm 5:29; Henplais 10:24, 25.

11. Peb puas yuav tu ncua tej zaub mov uas txhawb peb txojkev ntseeg? Peb yuav ua li cas rau phau Vajlugkub thiab peb tej ntaub ntawv thaum nom tswv txwv?

¹¹ Yehauvas cog lus tias nws cov tub qhe yuav tsis tu ncua tej zaub mov uas txhawb lawv txojkev ntseeg. (Yaxaya 65:13, 14; Luka  12:42-44) Yog li ntawd, lub koom haum yeej yuav ua li lawv ua tau los pab peb. Muaj tej yam uas peb yuav tsum tau ua thiab. Thaum raug nom tswv txwv, nrhiav ib qho chaw zoo zoo los zais phau Vajlugkub thiab peb tej ntaub ntawv, tsis hais tej ntaub ntawv luam tawm lossis hauv tej twj. Tsis txhob lam tau lam muab zais dog dig rau tej chaws uas yoojyim rau luag tshawb tau. Peb yuav tsum ua li peb ua tau los txhawb peb txojkev ntseeg kom ruaj khov.

12. Cov txwj laus yuav npaj kev sib txoos rau peb li cas kom luag thiaj tsis paub?

¹² Yuav ua li cas rau tej kev sib txoos? Cov txwj laus mam xaiv qhov chaws thiab lub caij sib txoos kom cov tawm tsam peb txhob paub. Tej zaum cov txwj laus yuav kom peb sib txoos ua tej pab me me xwb, thiab yuav ib sij hloov chaws thiab sijhawm ib zaug. Thaum mus sib txoos thiab rov qab los tsev, peb yuav tau ua twjywm mus ua twjywm los luag thiaj tsis hnov peb. Tsis tas li ntawd, tej zaum peb yuav tau hnav tej tsoos tsho kom luag txhob paub tias peb mus sib txoos.

13. Peb cov kwvtij hauv tebchaws Xauviaj tus qauv qhia tau peb li cas?

¹³ Hais txog kev tshaj tawm, ib qho chaw nyias txawv nyias. Vim peb hlub Yehauvas peb xav qhia lwm tus txog nws lub Nceeg Vaj. Yog li ntawd, txawm nom tswv txwv los peb yuav nrhiav kev mus tshaj tawm. (Luka 8:1; Tubtxib Tes Haujlwm 4:29) Ib tug pojniam sau keeb kwm hu ua Emolis Npalees (Emily Baran) qhia txog Yehauvas Cov Timkhawv kev tshaj tawm hauv tebchaws Xauviaj (Soviet Union). Nws hais tias: “Thaum nom tswv txwv tsis pub Yehauvas Cov Timkhawv mus tshaj tawm, lawv nrhiav kev mus nrog cov neeg zej zog, cov nrog lawv ua haujlwm, thiab lawv cov phoojywg tham txog phau Vajlugkub. Lawv thiaj raug kaw hauv tej yeej ua qhev. Thaum lawv raug kaw, los lawv tseem tshaj tawm rau cov nyob hauv lub yeej thiab.” Txawm nom tswv txwv npaum cas los, peb cov kwvtij hauv tebchaws Xauviaj yeej tsis tso tseg. Cia li xyaum lawv tus qauv thaum nom tswv txwv peb!

14. Cov lus hauv Ntawv Nkauj 39:1 yuav pab peb ceev faj li cas?

¹⁴ Ceev faj txog tej uas peb tham. Thaum nom tswv txwv, muaj tej thaud peb yuav tau “nyob twjywm” tsis txhob hais dabtsi. (Laj Lim Tswvyim 3:7) Peb yuav tsum tsis txhob qhia leejtwg paub txog tej yam xws li peb cov kwvtij nkauj muam tej npe, peb tej chaw sib txoos, peb tej kev tshaj tawm, thiab seb peb tau peb tej ntaub ntawv li cas. Peb yuav tsis qhia tej no rau nom tswv lossis peb cov phoojywg thiab nruab ze hauv lub tebchaws peb nyob lossis lwm lub tebchaws. Yog peb qhia rau luag tej paub ces yuav tsim tau teeb  meem rau peb cov kwvtij.​—Nyeem Ntawv Nkauj 39:1.

15. Xatas xav ua li cas rau peb? Peb yuav tsum ua li cas xwb?

¹⁵ Txhob cia tej yam me me los ua rau peb sib tawg sib faib. Xatas paub tias tsev neeg twg tsis sib haum ces tsev neeg ntawd yuav tawg. (Malakau 3:24, 25) Nws xav ua kom peb sib tawg sib faib. Yog peb sib tawm tsam peb ces peb yuav tsis nco qab tawm tsam Xatas lawm.

16. Tus muam Nkawtshus Photxinkaw tso tau tus qauv zoo twg rau peb xyaum?

¹⁶ Txawm cov Khixatia paub tab los, yuav tsum ceev faj tsis txhob cia tej yam me me ua rau lawv sib cais. Cia peb kawm txog 2 tug muam xaiv tseg. Ib tug hu ua Nkawtshus Photxinkaw (Gertrud Poetzinger) thiab ib tug yog Aufide Lauv (Elfriede Löhr). Nkawd raug kaw nrog lwm cov muam Khixatia hauv cov Natxi ib lub yeej. Thaum Aufide cev lus qhia los txhawb cov muam, ua rau Nkawtshus khib heev. Tom qab ntawd Nkawtshus txaj muag heev nws thiaj thov Yehauvas pab nws. Nws sau tias: “Peb yuav tsum lees paub tias lwm tus yuav txawj tshaj yus thiab yuav tuav tau haujlwm ntau dua yus.” Nkawtshus ua li cas nws thiaj tsis khib lawm? Nws xav txog Aufide lub siab zoo, nws thiaj rov nrog Aufide sib raug zoo. Nkawd ob leeg dim lub yeej ntawd thiab rau siab ntso teev tiam Yehauvas mus txog thaum nkawd tag sim neej. Yog peb rau siab ntso kho peb tej teeb meem kom muaj kev sib haum xeeb ces peb yuav tsis cia ib yam dabtsi los ua rau peb sib tawg sib faib.​—Khaulauxi 3:13, 14.

17. Vim li cas peb yuav tsum mloog lus?

¹⁷ Txhob ua neeg tsis mloog lus. Yog peb mloog cov kwvtij uas saib xyuas peb ces peb yuav zam tau teeb meem. (1 Petus 5:5) Xws li nyob hauv ib lub tebchaws uas nom tswv txwv, cov kwvtij saib xyuas hais rau cov tshaj tawm tias thaum mus qhia Vajlugkub, tsis txhob tseb ntaub ntawv rau leejtwg li. Tiamsis ib tug kwvtij tho kev xav tias yog nws tseb daim puav xwb nyaj yuav tsis ua cas. Thaum kawg zoo li cas xwb? Nom tswv tau xa neeg tuaj soj lawv thiab mus nqa cov ntaub ntawv uas tus kwvtij tseb. Tom qab lawv qhia Vajlugkub tas, cov tub ceev xwm txawm tuaj thom lawv. Qhov no qhia peb li cas? Txawm peb yuav xav li cas los xij, peb yuav tsum ua neeg mloog lus. Yog peb mloog cov kwvtij uas Yehauvas tsa los coj peb, ces peb yuav ua rau nws zoo siab.​—Henplais 13:7, 17.

18. Vim li cas peb yuav tsum tsis txhob lam tau lam tsa kevcai?

¹⁸ Txhob lam tau lam tsa kevcai. Yog cov txwj laus lam tau lam tsa ntau txoj kevcai ces lawv yuav ua nyuaj rau cov kwvtij xwb. Kwvtij  Yulais Khameexiki (Juraj Kaminský) piav txog thaum cov nom tswv txwv peb tes haujlwm hauv tebchaws Tshej Xalau Vakia (Czechoslovakia) uas yog lub npe qub thaum ub. Nws hais tias: “Tom qab coob tus txwj laus raug ntes lawd, cov kwvtij uas tseem nyob saib xyuas cov koom txoos thiab cov uas saib thaj tsam txawm tsa kevcai ntau ntau rau cov tshaj tawm coj. Lawv muab sau cia ib qhov zuj zus tias yam twg lawv ua tau yam twg lawv ua tsis tau.” Yehauvas tsis tau hais kom peb tsa kevcai rau peb cov kwvtij taug. Tus uas tsa kevcai rau nws cov kwvtij taug, tsuas xav tswj lawv txojkev ntseeg xwb. (2 Khaulee 1:24) Lawv ua li no yeej tiv thaiv tsis tau leejtwg li.

19. Raws li 2 Vaj Keeb Kwm 32:7, 8, vim li cas peb yuav ua tau siab loj siab tuab?

¹⁹ Peb tus yeeb ncuab uas loj kawg nkaus yog Xatas Ntxwg Nyoog. Nws yuav tawm tsam Yehauvas cov tub qhe tas zaj tas zog. (1 Petus 5:8; Qhia Tshwm 2:10) Xatas thiab cov uas tuaj nws tog yuav ua ib puas tsav yam los txwv kom peb tsis txhob teev tiam Yehauvas. Txawm peb ntshai los peb yuav tsis tso Yehauvas tseg! (Kevcai 7:21) Txawm nom tswv yuav txwv peb los Yehauvas yeej nrog nraim peb, pab peb pe hawm nws tsis tseg.​—Nyeem 2 Vaj Keeb Kwm 32:7, 8.

20. Koj yuav txiav txim siab ua li cas?

²⁰ Cia peb xyaum peb cov kwvtij uas nyob thawj 100 xyoo. Thaum nom tswv txwv lawv, lawv hais tias: “Nej sim xav saib, nyob ntawm Vajtswv xubntiag tsim nyog mloog nej hais zoo dua li mloog Vajtswv hais lov? Rau qhov peb tseg tsis tau qhov uas hais txog tej uas peb pom thiab tej uas peb hnov.”​—Tubtxib Tes Haujlwm 4:19, 20.