PEB nyob rau “tiam kawg,” peb lub neej yeej tsis yoojyim li. Peb yuav tsum yimhuab rub peb lub siab kom ntev. (2 Timaute 3:1-5) Cov uas nyob ib ncig peb coob tus siab luv heev. Lawv xam pom lawv tus kheej xwb, nyiam sib cav sib ceg, thiab tsis paub tswj lawv lub siab. Yog li ntawd, peb yuav tsum xav txog cov lus nug no: ‘Kuv puas xyaum coj li cov neeg siab luv ntawd? Kev ua siab ntev yog li cas tiag? Yuav ua li cas kuv thiaj ua taus siab ntev?’

Hauv phau Vajlugkub, lo lus “ua siab ntev” txhais li cas? Tsis yog txhais tias yus yuav uv kom dhau teeb meem xwb. Ib tug neeg siab ntev yog ib tug uas thev taus vim nws muaj kev vam tias yav tom ntej nws txojkev nyuaj siab yuav ploj mus. Nws xam pom lwm tus, tsis hais cov ua rau nws meem txom thiab ua tsis ncaj rau nws. Nws vam tias nkawd yuav rov qab muaj kev sib raug zoo. Phau Vajlugkub thiaj hais tias lub siab ntev yog los ntawm kev hlub los. * (Saib cov lus hauv qab taw qhia.) (1 Khaulee 13:4) Lub siab ntev kuj yog ib feem ntawm tej uas lub hwj huam dawb huv txi rau hauv peb thiab. (Kalatia 5:22, 23) Yog li ntawd, yuav ua li cas peb thiaj ua taus siab ntev?

Yuav kom peb ua taus siab ntev, peb yuav tsum thov Vajtswv pub nws lub hwj huam dawb huv rau peb. Nws yeej pub nws lub hwj haum dawb huv rau cov uas tso siab plhuav rau nws thiab vam khom nws. (Luka 11:13) Txawm lub hwj huam dawb huv muaj hwjchim heev los, peb yuav tau ua raws li peb tej lus thov thiab. (Ntawv Nkauj 86:10, 11) Qhov no yog li cas tiag? Peb yuav tsum niaj hnub xyaum rub peb lub siab kom ntev. Tiamsis peb yuav tau ua dabtsi ntxiv xwv peb thiaj hloov tau los ua tus neeg siab ntev?

Peb yuav tsum kawm thiab xyaum Yexus tus qauv. Thaum tus tubtxib Povlauj hais txog “tus neeg tshiab,” uas muaj lub siab ntev, nws txhawb kom peb “cia txojkev siab tus uas Khetos pub coj [peb] lub siab.” (Khaulauxi 3:10, 12, 15) Yuav kom peb ua tau li no, peb yuav tsum xyaum Yexus tus qauv es tso siab plhuav rau Yehauvas tias Nws yuav kho peb tej teeb meem raws caij raws nyoog. Yog peb tso siab rau Vajtswv ces txawm peb yuav ntsib dabtsi los, peb yuav ua taus siab ntev.​—Yauhas 14:27; 16:33.

Peb sawvdaws xav kom lub qab ntuj tshiab los sai li sai tau. Tiamsis yog peb nco ntsoov tias Yehauvas twb ua siab ntev rau peb ces peb yuav ua tau siab ntev thiab. Phau Vajlugkub hais tias: “[Yehauvas] ua siab ntev rau nej, vim nws tsis xav cia leejtwg puam tsuaj, tiamsis xav kom txhua tus ntxeev dua siab tshiab.” (2 Petus 3:9) Yog li ntawd, Yehauvas ua siab ntev rau peb li cas lawd, peb yuav tsum xyaum ua siab ntev ib yam li ntawd rau lwm tus. (Loos 2:4) Dabtsi yuav sim seb peb puas muaj lub siab ntev tiag?

Muaj ntau zaus peb yuav tau ua siab ntev. Xws li, thaum peb nrog lwm tus tham. Yog lawv tseem tabtom hais lus, peb yuav tsum tsis txhob txiav lawv lus vim peb xav tias tej uas peb hais tseem ceeb dua. (Yakaunpau 1:19) Peb kuj yuav tau ua siab ntev rau cov uas ua rau peb meem txom. Tsis txhob npau taws rau nws tiamsis peb yuav tsum nco ntsoov tias Yehauvas thiab Yexus nkawd ua siab ntev li cas rau peb, peb yuav tau ua siab ntev li ntawd rau lwm tus thiab. Yehauvas thiab Yexus yeej tsis xam pom tej peb ua yuam kev, tiamsis nkawd xam pom tej yam zoo peb ua tau, thiab tseem cia sijhawm rau peb kho peb lub siab.​—1 Timaute 1:16; 1 Petus 3:12.

Peb yuav tau ua siab ntev rau thaum twg thiab? Thaum luag ntuas peb. Tej zaum yog peb tsis ceev faj peb yuav cia li chim rau lawv lossis nrog lawv sib cam. Tiamsis phau Vajlugkub hais tias: “Ua lub siab ntev zoo dua li lub siab khav theeb. Tsis txhob chim sai, tsuas yog tus tsis thoob tsib thiaj khaws qhov chim rau hauv lub siab mus li.” (Laj Lim Tswvyim 7:8, 9) Yog li ntawd, thaum lwm tus hais peb, txawm nws hais yog thiab tsis yog los, peb yuav tau ua siab ntev, ua tib zoo xav ua ntej tso. Yexus tau ua li no thaum muaj neeg liam tias nws ua txhaum.​—Mathai 11:19.

Cov niam txiv kuj yuav tau ua siab ntev cob qhia menyuam kom paub coj thiab paub txiav txim siab zoo. Ib tug kwvtij uas ua haujlwm hauv ib ceg Npe-ee nyob sab Yus Luv niam thiab txiv tau ua siab ntev cob qhia nws li ntawd. Thaum nws tseem yog ib tug tub hluas, cov tub kawm ntawv pheej thab thiab thuam nws vim nws txojkev ntseeg. Thaum ntej nws niam nws txiv tsis paub tias muaj li no. Tiamsis nkawd pom tias ua cas nws kev ntseeg cia li pib tsuag zuj zus lawm. Leej txiv hais tias: “Kuv pojniam wb ua siab ntev heev thiaj pab tau nws. Nws nug txog ntau yam, xws li: ‘Vajtswv yog leejtwg? Tsam phau Vajlugkub tsis yog Vajtswv Txojlus ne? Ua li cas peb thiaj paub tias tej uas peb ua yeej yog tej uas Vajtswv xav kom peb ua?’” Tus tub kuj nug nws txiv tias: “Vim kuv tsis ntseeg li koj, koj txawm txiav txim rau kuv lod?”

Leej txiv piav ntxiv tias: “Tej thaud wb tus tub npau taws heev nws thiaj hais twm wb xwb. Nws  tsis yog npau taws rau nws niam wb tiamsis nws npau taws vim nws xav tias qhov tseeb nruj dhau nws ua tsis tau.” Leej txiv thiaj ua li cas xwb? Nws piav tias: “Kuv tus tub wb zaum ua ke tham tau ntau txoos teev.” Ntau zaus leej txiv tsuas zaum mloog nws tus tub piav xwb nws thiaj paub tej uas nyob hauv nws tus tub lub siab. Tej thaud leej txiv piav ib qho rau nws tus tub thiab hais kom nws muab xav 1 hnub tso nkawd mam li rov los tham. Hos tej thaud tus tub ho nug tej lo uas leej txiv yuav tau muab xav 1 hnub tso mam teb rau. Qhov uas nkawd sib txuas lus li no pab tau tus tub pom tias tus nqe txhiv muaj nqes heev, thiab Yehauvas hlub noob neej kawg li, yeej tsim nyog Nws ua tus kav peb. Leej txiv hais tias: “Yeej siv sijhawm ntev kawg li thiab yeej nyuaj heev tiamsis ntev mus ntev tuaj nws txojkev hlub rau Yehauvas pib loj hlob. Kuv pojniam wb zoo siab kawg uas wb ua siab ntev pab wb tus tub thaum nws tseem hluas, tej uas nws kawm thiaj raug nws siab.”

Tus tub ntawd niam thiab txiv ua siab ntev cob qhia nws, nkawd tso siab plhuav tias Yehauvas yuav pab nkawd. Leej txiv hais tias: “Ntau zaus kuv hais rau nws tias nws niam wb hlub nws tshaj plaws li, wb thiaj siv zog thov Yehauvas kom pab nws nkag siab.” Ob niam txiv no yeej zoo siab kawg li uas nkawd ua siab ntev pab nkawd tus menyuam!

Thaum peb pab tu ib tug hauv peb tsev neeg lossis ib tug phoojywg uas muaj mob loj, peb kuj yuav tau ua siab ntev thiab. Zoo li Elees (Ellen) uas nyob sab Yus Luv. *​—Saib cov lus hauv qab taw qhia.

Muaj li 8 lub xyoos tas los no, Elees tus txiv hlwb ntsha tawg 2 zaug, ua rau nws paj hlwb tsis zoo lawm, txawm tu siab, zoo siab los nws tsis paub li. Elees thiaj nyuaj siab ntxhov siab heev. Nws hais tias: “Kuv yuav tsum ua siab ntev thev, thiab rau siab ntso thov Vajtswv. Ib nqe Vajlugkub uas pab tau kuv heev yog Filipi 4:13. Nqe ntawd hais tias: ‘Kuv yeej ua tau txhua yam vim muaj Vajtswv uas txhawb kuv lub zog.’” Yehauvas txhawb thiab pub zog rau Elees, nws thiaj ua taus siab ntev thev.​—Ntawv Nkauj 62:5, 6.

Tus uas ua tau qauv zoo tshaj plaws rau peb xyaum yog Yehauvas. Nws siab ntev dua txhua leej txhua tus huvsi. (2 Petus 3:15) Phau Vajlugkub qhia ntau zaus txog thaum Yehauvas ua siab ntev. (Nehemi 9:30; Yaxaya 30:18) Koj puas nco qab thaum Yehauvas yuav muab lub moos Xaudoo rhuav tshem es Aplahas pheej nug Yehauvas tias nws puas yuav muab cov ncaj ncees rhuav tshem nrog cov tsis ncaj ncees? Yehauvas tsis txiav Aplahas lus. Nws ua siab ntev mloog Aplahas thiab qhia tias nws hnov tej uas Aplahas nug txog. Nws thiaj hais rau Aplahas tias yog muaj 10 tus txivneej ncaj ncees hauv lub moos Xaudoo, Nws yeej yuav tsis muab ua puam tsuaj li. (Chiv Keeb 18:22-33) Yehauvas siab ntev heev, nws yeej tsis chim sai!

Cov Khixatia txhua tus yuav tau muab tus neeg tshiab coj los hnav. Tus neeg tshiab yeej ua siab ntev. Yog peb ua siab ntev ces yuav qhia tias peb hwm peb Leej Txiv Yehauvas tus uas hlub peb thiab ua siab ntev rau peb. Thiab peb yuav muaj feem nrog cov uas muaj kev ntseeg “ua siab ntev thev [peb] thiaj tau tej uas cog lus cia lawd ua [peb] tug.”​—Henplais 6:10-12.