1. Vim li cas ho zoo rau peb piav mus piav los txog qhov ua Yehauvas ib tug Tim Khawv?

 MUAJ ntau zaus lwm tus yuav nug koj tias: “Koj los ntseeg Yehauvas li cas?” Cov lus no yog thawj thawj cov lus peb nug ib tug kwv tij nkauj muam twg thaum peb ntsib nws. Peb nyiam nyiam mloog cov kwv tij nkauj muam qhia rau peb tias lawv los ntseeg Yehauvas li cas thiab peb ho qhia rau lawv tias peb los ntseeg li cas rau lawv. (Loos 1:11) Cov lus peb ib leeg tham rau ib leeg no qhia tau tias peb pom zoo ua Yehauvas Cov Tim Khawv. Tsis tas li ntawd, tej lus peb tham mus tham los no pab kom peb xyaum ua lub neej li Yehauvas siab nyiam thiaj nqa tau koob hmoov rau peb.​—3 Yauhas 4.

2. Nyob rau hauv zaj kawm no yuav piav txog dab tsi?

² Nyob rau hauv zaj kawm no, peb yuav piav seb vim li cas peb ho nyiam paub qhov tseeb. Tom qab ntawd, ho yuav piav seb peb ho ris txiaj ntsig li cas thaum peb ho los paub qhov tseeb lawm. Tej no yuav pab kom peb txawj ris Yehauvas tus txiaj ntsig uas cia peb los paub txog nws. (Yauhas 6:44) Tsis tas li ntawd, yuav pab kom peb muaj lub siab mus qhia lwm tus txog Yehauvas.

3. Vim li cas peb ho txaus siab ua Yehauvas ib tug Tim Khawv?

³ Tos peb xav paub qhov tseeb los yog vim muaj ntau yam. Thawj yam yog muaj Yehauvas ua peb tus Vajtswv thiab nws yog lub hauv paus rau txhua yam tseeb. Vim muaj phau Vajlugkub, peb thiaj los paub Yehauvas tus uas tsim ntuj tsim teb thiab nws zoo tam li ib Leeg Txi uas saib xyuas nws tej tub tej kiv. (1 Petus 5:7) Peb paub hais tias peb tus Vajtswv “muaj lub  siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees.” (Khiav Dim 34:6) Yehauvas nyiam txoj kev ncaj ncees. (Yaxayas 61:8) Nws tsis xav pom peb raug kev txom nyem thiab nws yeej tos tsis hnyu yuav muab txhua yam kev txom nyem tshem tawm mus huv tib si. (Yelemis 29:11) Peb tos tsis taus txog lub sij hawm ntawd li. Yog li ntawd, peb thiaj raug zoo nrog Yehauvas heev.

4-5. Vim li cas tus tub txib Paulus ho muab peb txoj kev vam kev cia siab piv rau tus tswg?

⁴ Peb xav paub qhov tseeb vim yeej pab tau peb ntau heev. Xws li, paub qhov tseeb pab tau peb muaj kev vam kev cia siab rau yav tom hauv ntej. Tus tub txib Paulus muab txoj kev vam kev cia siab ntawd piv txwv li no: “Qhov uas peb cia siab no zoo ib yam li tus tswg uas muaj hlua khi . . . kom nyob ruaj ruaj.” (Henplais 6:19) Yam li tus tswg khi lub nkoj cia rau ib qho chaw kom tsis txhob txav mus txav los, peb txoj kev vam kev cia siab kuj tuav tau peb cia thaum peb raug kev sim siab.

⁵ Paulus lub ntsiab lus yog hais txog txoj kev vam kev cia siab uas cov xaiv tseg tos ntsoov. Txawm li ntawd los, nws cov lus kuj yog hais rau cov muaj kev vam kev cia siab nyob mus ib txhis hauv lub ntiaj teb no tib yam nkaus. (Yauhas 3:16) Thaum peb paub txog txoj kev vam kev cia siab uas yuav muaj txoj sia mus ib txhis ces pab tau peb lub neej muaj ntsiab rau.

6-7. Thaum Ntsa Iab paub qhov tseeb txog yav tom hauv ntej, pab tau nws li cas?

⁶ Cia peb mus piav txog ib tug nkauj muam ntseeg npe hu ua Ntsa Iab. Nws niam thiab nws txiv tsis yog Yehauvas Cov Tim Khawv. Thaum nws loj hlob zuj zus tuaj, nws ntshai nyob tsam ib hnub twg cia li tag nws txoj sia lawm. Muaj ib zaug nws nyeem tau ib co lus uas hais tias: “Ib hnub twg, yuav tsis muaj tag kis.” Cov lus no khi nrees hauv nws nruab siab, nws thiaj hais tias: “Cov lus no ua rau kuv tsis tsaug zog ib hmos dhau ib hmos. Kuv xav hais tias lub neej no tsis yog lam tag li no xwb pob? Vim li cas kuv ho tshwm sim tau los ua neeg? Kuv tsis xav tuag li.”

⁷ Thaum Ntsa Iab tiav hluas nkauj, nws txawm ntsib Yehauvas Cov Tim Khawv. Nws hais tias: “Kuv txawm ntseeg hais tias ib hnub twg kuv yuav nyob tau mus ib txhis hauv lub ntiaj teb no.” Qhov uas tus nkauj muam no paub qhov tseeb pab tau nws li cas? Nws hais ntxiv li no: “Tam sim no, kuv tsis nyob ib hmos dhau ib hmos txhawj ntshai txog yav tom hauv ntej thiab nyob tsam ho txawj ploj tuag.” Raws li peb mloog Ntsa Iab piav no, nws zoo siab heev thaum nws paub qhov tseeb, thiab nws txaus siab coj mus piav rau lwm leej lwm tus txog txoj kev vam kev cia siab uas yuav muaj yav tom hauv ntej.​—1 Timautes 4:16.

8-9. (1) Nyob rau hauv Yexus zaj kwv huam, tus txiv neej ua li cas xwb thaum nws nrhiav tau hub nyiaj hub kub? (2) Qhov tseeb muaj nuj nqis npaum li cas rau koj?

⁸ Nyob hauv phau Vajlugkub, kuj qhia qhov tseeb txog Vajtswv txoj kev kav. Yexus muab Vajtswv txoj kev kav piv rau hub nyiaj hub kub uas muab zais cia lawm. Nyob rau hauv Mathais 13:44, Yexus tau hais tias: “Vajtswv txoj kev kav piv ib yam li hub nyiaj hub kub uas luag muab faus rau hauv ib daim teb. Muaj ib tug yawg mus pom ces nws txawm muab zais twj ywm cia. Nws zoo siab heev nws thiaj muab nws tej cuab txhiaj cuab tam muag huv si coj mus yuav daim teb ntawd.” Raws li hais no, tus txiv neej tsis yog mus khawb hub nyiaj hub kub ntawd tiam sis yog nws pom xwb. Nws txawm muab ib puas tsav yam uas nws muaj muag huv tib si kom mus yuav tau. Vim li cas nws ho ua li no? Rau qhov nws paub hais tias hub nyiaj hub kub nws pom  ntawd muaj nuj nqis heev. Tej yam nws muaj twb tsis muaj nuj nqis cuag li ntawd.

⁹ Peb yeej saib qhov tseeb zoo nkaus li ntawd ntag. Peb paub tias txhua yam hauv lub ntiaj teb no yeej tsis muaj ib yam yuav piv tau txoj kev zoo siab uas tau los teev tiam Yehauvas. Tsis tas li ntawd, tseem yuav tau nyob mus ib txhis thaum Vajtswv kav. Ntxiv ntawd, peb tseem tau nrog Yehauvas sib raug zoo uas tsis muaj ib yam yuav pauv tau li lawm. Qhov peb zoo siab tshaj yog “ua tej uas haum Vajtswv siab.”​—Kaulauxais 1:10.

10-11. Muaj dab tsi ua tau rau Mas hloov tau nws lub neej?

¹⁰ Muaj coob leej ntau tus tau hloov lawv lub neej kom ua tau haum Yehauvas siab. Muaj tej tug tau tso tej txoj hauj lwm zoo heev tseg. Lwm cov kuj tau tseg tsis mus caum kom muaj txiag nplua nuj. Hos muaj dua lwm cov kuj hloov hlo lawv lub neej thaum lawv los paub Yehauvas. Mas yog ib tug txiv neej ntawd ntag. Nws niam nws txiv tsis yog Yehauvas Cov Tim Khawv. Thaum nws tseem yog tub hluas, nws mus kawm ntaus tes taw. Nws hais tias: “Kuv nyiam tu ntshis kuv lub cev. Tsis pub muaj mob muaj nkeeg li.” Tiam sis thaum Mas los paub Yehauvas, nws pom tau hais tias Yehauvas tsis nyiam txoj kev ua nruj ua tsiv. (Phau Ntawv Nkauj 11:5) Mas hais li no txog ob niam txiv uas tuaj qhia nws tias: “Nkawv yeej tsis txwv kom kuv tsis txhob mus ntaus tes taw li. Nkawv tsuas qhia qhov tseeb uas nyob hauv phau Vajlugkub rau kuv xwb.”

¹¹ Thaum Mas yim kawm txog Yehauvas ces nws yim nyiam ntxiv zuj zus xwb. Qhov uas Yehauvas hmov tshua Nws cov tib neeg raug Mas siab kawg li. Ntev mus ntev tuaj, Mas paub hais tias nws yuav tau txiav txim siab hloov nws lub neej. Nws hais li no tias: “Qhov uas tso tseg tsis mus ntaus tes taw yog qhov uas nyuaj heev rau kuv. Tiam sis kuv paub hais tias yog kuv muab tso tseg lawm, yuav haum Yehauvas siab dua thiab qhov uas kuv teev tiam Yehauvas yeej raug hnyav dua tej kuv muab tso tseg.” Mas yeem tso ib puas tsav yam tseg ntawm nws lub neej thaum nws paub qhov tseeb.​—Yakaunpaus 1:25.

12-13. Tej lus tseeb nyob hauv phau Vajlugkub pab tau Maiv Hli li cas?

¹² Qhov tseeb uas nyob hauv phau Vajlugkub muab piv ib yam li lub teeb uas taws ci lam lug thaum tsaus ntuj. (Phau Ntawv Nkauj 119:105; Efexus 5:8) Nyob hauv lub teb chaws Ezawnpaizos (Azerbaijan), muaj ib tug nkauj muam ntseeg hu ua Maiv Hli. Nws niam thiab nws txiv nkawv nyias muaj nyias ib txoj kev ntseeg. Nws txiv ntseeg txoj kev cai Moxalees (Muslim) hos nws niam ntseeg txoj kev cai Yudais. Nws hais tias: “Txawm kuv paub hais tias muaj Vajtswv los haj tseem tshuav ntau yam uas kuv xav paub thiab. Kuv xav tias, ‘Vim li cas Vajtswv ho tsim tib neeg, thiab ua cas tib neeg ua neej txom nyem ntsuav xwb los thaum nws tuag lawm, ua cas nws tseem raug tsim txom hauv ntuj tawg thiab?’ Neeg pheej hais tias Vajtswv twb teem tseg yus lub neej cia lawm. Kuv thiaj pheej xav mus xav los tias, ‘Puas yog Vajtswv tswj tib neeg rau ub rau no thiab ho nyob ib cag ntsia lawv raug kev txom nyem?’”

¹³ Maiv Hli thiaj li mus tshawb nrhiav seb muaj li cas tiag. Ntev mus ntev tuaj, nws thiaj li kawm Vajlugkub nrog Yehauvas Cov Tim Khawv ces tom qab no nws kuj hloov los ua ib tug Tim Khawv lawm. Nws hais tias: “Tej yam uas hais nyob hauv phau Vajlugkub yeej muaj hauv paus hauv ntsis, ua rau kuv nkag nkag siab. Kuv thiaj li kaj siab lawm hov ntau. Zaum no kuv lub siab thiaj li nyob tus.” Zoo ib  yam li Maiv Hli, peb thiaj qhuas Yehauvas hais tias: “Vajtswv yog tus uas hu nej tawm hauv qhov tsaus ntuj los nyob hauv qhov pom kev.”​—1 Petus 2:9.

14. Yuav ua li cas peb thiaj paub qhov tseeb zoo zuj zus ntxiv? (Saib lub ntsiab “ Phau Vajlugkub Piv Txwv Tau Ntau Yam”)

¹⁴ Tej uas peb tham tas los no tsuas yog qho yam tseeb xwb. Haj tseem tshuav ntau tshaj no uas hais tsis txhij tsis txhua. Teem caij teem nyoog los tshawb nrhiav kom peb yim huab nkag siab zoo vim li cas peb ho xav paub qhov tseeb. Yog peb yim xav paub qhov tseeb ces peb yuav yim coj tau zoo rau hauv peb lub neej.

15. Ib yam uas qhia tias peb nyiam qhov tseeb yog dab tsi?

¹⁵ Yog peb kub siab lug nyeem thiab kawm phau Vajlugkub thiab tej ntaub ntawv lub koom haum luam tawm ces qhov ntawd qhia tias peb nyiam qhov tseeb. Txawm peb yuav ntseeg Yehauvas ntev npaum li cas los xij peem, peb yuav tau kawm kam tiag ntxiv mus li. Nyob rau hauv thawj thawj Phau Tsom Faj tau hais tias: “Qhov tseeb zoo yam li ib lub paj tawg rau tom tiaj nrag uas muaj tej nroj tsuag tuaj laum ntxoov nyos rau. Yog yuav kom koj nrhiav tau lub paj ntawd koj yuav tau  xawb xuav nrhiav tiag. Yog thaum koj pom dheev lawm, koj yuav tau khoov mus de nrho lub paj ntawd los yuav. Tsis txhob nres twj ywm rau ib qho chaw tiam sis yuav tau mus rau ub rau no, de txhua lub paj uas koj pom tawg ntawd.” Yog li ntawd, txoj kev kawm Vajlugkub yeej yuav tau lauj sij hawm. Tiam sis yog peb kawm, yuav tsav tau peb lub neej lawm hov ntau.

16. Koj kawm Vajlugkub li cas thiaj pab tau koj? (Pajlug 2:4-6)

¹⁶ Peb yeej paub ntsoov hais tias peb ib txhia yeej tsis tshua nyiam nyeem thiab kawm Vajlugkub pes tsawg. Tiam sis Yehauvas txhawb kom peb “cia li muab siab rau nrhiav,” peb thiaj li yuav paub qhov tseeb zoo zuj zus. (Nyeem Pajlug 2:4-6.) Thaum peb lauj sij hawm los kawm ces yuav pab tau peb. Muaj ib tug kwv tij npe hu ua Kaus. Nws nyiam kawm ib nqes Vajlugkub zuj zus. Nws hais tias: “Kuv nyeem tej lus hauv qab taw qhia, nyeem lwm nqe Vajlugkub los piav txog nqe ntawd, thiab mus tshawb nrhiav txuas ntxiv. Thaum kuv tshawb nrhiav li no, pab tau kuv kawg nkaus li. Txawm peb yuav kawm ib yam li tus kwv tij hais tas los no los sis ho kawm tsis thooj li ntawd, thaum peb lauj sij hawm los kawm ces qhia tau tias peb yeej ris txiaj ntsig rau tej uas peb kawm tau hauv phau Vajlugkub.​—Phau Ntawv Nkauj 1:1-3.

17. Qhov uas coj raws li tej yam peb kawm tau yog li cas tiag? (Yakaunpaus 1:25)

¹⁷ Peb paub hais tias tsis yog cia li kawm kom paub qhov tseeb hauv phau Vajlugkub nkaus nkaus xwb. Yuav kom pab tau peb, peb yuav tau muab coj rau hauv peb lub neej. Yog peb coj li no ces yuav pab kom peb txaus siab rau peb lub neej. (Nyeem Yakaunpaus 1:25.) Ua cas peb thiaj paub hais tias peb ua tau lub neej raws li tej lus tseeb hauv phau Vajlugkub? Muaj ib tug kwv tij tau hais tias kom peb tshuaj seb qhov twg peb ua tau zoo lawm hos tseem tshuav qhov twg peb tseem ua tsis tau zoo ces peb yuav tau hloov qhov ntawd. Tus tub txib Paulus tau hais tias: “Txawm peb paub Vajtswv zoo npaum li cas los cia peb ua tiag dhia lawm tom ntej kom peb yim huab paub Vajtswv ntxiv.”​—Filipis 3:16.

18. Vim li cas peb yuav tau ua peb “lub neej raws li qhov tseeb”?

¹⁸ Yog peb xyaum coj “lub neej raws li qhov tseeb,” yuav tsav tau peb lub neej ntxiv zuj zus. Tsis tas li ntawd, Yehauvas thiab cov kwvtij nkauj muam yuav nrog peb muaj kev zoo siab rau peb lub neej. (Pajlug 27:11; 3 Yauhas 4) Raws li tau hais tag los no, peb thiaj xav paub qhov tseeb thiab nyiam coj lub neej raws li qhov tseeb.