KEV NTSEEG ua kom peb sawv khov kho. Xws li thaum Xatas xav rhuav peb txojkev sib raug zoo nrog Yehauvas, peb txojkev ntseeg “yuav tua tau dab Ntxwgnyoog xibxub hluavtaws uas nws tua tuaj.” (Efexus 6:16) Yog peb muaj kev ntseeg ces txawm peb tej teebmeem loj cuag li lub roob los peb yeej yuav nyiaj dhau. Yexus hais rau nws cov thwjtim tias: “Yog nej muaj kev ntseeg luaj lub noob zaub, nej hais rau lub roob no hais tias, ‘Cia li txav ntawm no mus rau tod!’ Ces lub roob ntawd yeej yuav txav mus.” (Mathais 17:20) Peb paub tias kev ntseeg yuav pab kom peb txojkev sib raug zoo nrog Yehauvas ruaj khov, thiaj zoo rau peb xav txog cov lus nug no: (1) Kev ntseeg yog dabtsi tiag? (2) Vim li cas qhov tseeb yuav tsum muaj nqis rau peb, peb thiaj muaj kev ntseeg? (3) Peb yuav tsav peb txojkev ntseeg li cas? (4) Peb yuav tsum ntseeg leejtwg?​—Loos 4:3.

Kev ntseeg tsis yog lam ntseeg lossis lees tias tej uas phau Vajlugkub hais yog qhov tseeb xwb. Rau qhov txawm “dab los kuj ntseeg ib yam nkaus li ntawd, thiab dab ntshai Vajtswv ua ibce tshee hnyo.” (Yakaunpaus 2:19) Yog li ntawd, kev ntseeg yog li cas tiag?

Phau Vajlugkub qhia tias kev ntseeg muaj 2 feem. Feem 1 “yog qhov uas peb paub tseeb hais tias peb yuav tau tej uas peb cia siab rau.” (Henplais 11:1, thawj kab) Yog koj muaj kev ntseeg ces koj yeej ntseeg tias txhua yam uas Yehauvas hais lawd yeej yuav muaj tiav. Xws li thaum Yehauvas hais rau cov Yixalayees tias “Kuv coglus rau nruab hnub thiab hmo ntuj, kom nyias muaj raws li nyias lub caij; lo lus cog tseg ntawd tsis muaj leejtwg rhuav tau li.” (Yelemis 33:20, 21) Koj puas ntshai tsam lub hnub yuav tsis tuaj lossis yuav tsis poob kom tsis muaj nruab hnub thiab hmo ntuj lawm? Koj yeej tsis ntshai. Yog koj tsis ntshai tsam yuav tsis muaj nruab hnub thiab hmo ntuj, puas tsimnyog koj ntshai tsam tus uas tsim tej no yuav tsis muaj peevxwm ua kom nws cov lus cog tseg muaj tiav?​—Yaxayas 55:10, 11; Mathais 5:18.

Feem 2 “yog qhov uas peb cia siab ntsoov rau tej uas peb qhovmuag tsis pom.” (Henplais 11:1, kab kawg) Yog peb muaj kev ntseeg ces txawm peb lub qhovmuag tsis pom los peb yuav “cia siab ntsoov rau” qhov ntawd vim muaj povthawj tias muaj tiag. Puas muaj tej yam uas txawm qhovmuag tsis pom los peb yeej ntseeg tau? Muab piv txwv li no, muaj ib tug menyuam nug koj tias, ‘Ua cas peb ho paub tias muaj cua?’ Koj yuav piav li cas rau nws? Koj yeej tsis tau pom cua dua ib zaug, tiamsis koj yuav nrhiav ib yam los qhia kom nws pom tias yeej muaj cua tiag. Xws li thaum cua tuaj peb yeej hnov thiab pom nplooj xyoob nplooj ntoos co. Tej no yuav ua povthawj rau tus menyuam tias txawm qhovmuag tsis pom cua los, yeej muaj tiag. Zoo ib yam li ntawd, peb txojkev ntseeg yuav tsum muaj povthawj thiab.​—Loos 1:20.

Yuav tsum muaj povthawj peb thiaj ntseeg tau. Yog li ntawd peb yuav tsum kawm seb muaj povthawj li cas peb thiaj “paub qhov tseeb.” (1 Timautes 2:4) Tiamsis qhov peb paub xwb yuav pab tsis tau peb. Tus timthawj los yog tus tubtxib Paulus hais tias: “Tus uas ntseeg hauv nws lub siab” yog tus uas muaj kev ntseeg. (Loos 10:10) Tsis yog peb yuav ntseeg qhov tseeb xwb, tiamsis peb yuav tsum saib qhov tseeb muaj nqis. Thaum ntawd peb thiaj li yuav ua peb lub  neej raws li Vajtswv lub siab nyiam. (Yakaunpaus 2:20) Txawm yuav muaj povthawj los tus neeg uas tsis ntseeg qhov tseeb hauv nws lub siab yuav tsis kam hloov nws txojkev ntseeg lossis yuav ua li nws lub siab nyiam xwb. (2 Petus 3:3, 4; Yudas 18) Twb yog vim li no txawm cov uas pom kiag Vajtswv tej txujci puag thaum ub los, ib txhia tseem tsis muaj kev ntseeg. (Teev Npe 14:11; Yauhas 12:37) Vajtswv lub hwj huam dawb huv yuav tsav kev ntseeg rau cov uas nyiam qhov tseeb xwb.​—Kalatias 5:22; 2 Thexalaunikes 2:10, 11.

Vajntxwv Daviv yog ib tug uas muaj kev ntseeg ruaj heev. (Henplais 11:32, 33) Tiamsis tsis yog txhua tus hauv nws tsev neeg muaj kev ntseeg li nws, xws li Eli-as uas yog Daviv tus tijlaug hlob. Thaum Nkauli-am tuaj twv cov Yixalayees ua rau Daviv npautaws heev, tiamsis Eli-as txawm muab nws cem. Qhov no qhia tias Eli-as tsis ntseeg tias Yehauvas yuav cawm tau lawv. (1 Xamuyees 17:26-28) Yeej tsis muaj ib tug twg uas muaj kev ntseeg nruab thiab lossis tau ntawm nws niam nws txiv los. Yog li ntawd, Daviv muaj kev ntseeg vim nws muaj kev sib raug zoo nrog Yehauvas.

Hauv Phau Ntawv Nkauj 27 Daviv qhia tias yog vim li cas nws txojkev ntseeg thiaj ruaj khov ua luaj. (Nqe 1) Daviv ua tib zoo xav txog nws lub neej tias Yehauvas tau pab nws li cas thiab tau ua li cas rau nws cov yeebncuab. (Nqe 2, 3) Nws saib Yehauvas lub Tuamtsev rau nqi heev. (Nqe 4) Nws mus nrog sawvdaws pehawm Yehauvas hauv lub Tuamtsev. (Nqe 6) Nws taij thov Vajtswv. (Nqe 7, 8) Thiab nws xav kom Vajtswv qhuab qhia nws kom nws paub ua raws li Vajtswv lub siab nyiam. (Nqe 11) Daviv saib nws txojkev ntseeg tseemceeb tshaj plaws nws thiaj nug li no: “Kuv lub neej yuav zoo li cas yog tias kuv tsis muaj kev ntseeg?”​—Nqe 13, NWT.

Yog koj ua li Phau Ntawv Nkauj 27 hais, koj yuav muaj txojkev ntseeg ruaj khov ib yam li Daviv thiab. Peb yuav tsum kawm qhov tseeb peb thiaj muaj kev ntseeg. Yog li ntawd, peb yim kawm phau Vajlugkub thiab peb tej ntaub ntawv Vajlugkub peb yim paub qhov tseeb. Thaum peb ua li no, Vajtswv lub hwj huam dawb huv yuav pab tsav txojkev ntseeg rau peb. (Phau Ntawv Nkauj 1:2, 3) Lauj sijhawm los ua tib zoo xav txog tej uas koj kawm. Yog koj ua li ntawd, koj yuav paub ris Yehauvas txiaj ntsig. Thaum koj ris Yehauvas txiaj ntsig, yuav ua rau koj xav mus tej kev sib txoos pehawm nws thiab xav mus tshaj tawm rau lwm tus txog koj txojkev cia siab. (Henplais 10:23-25) Tsis tas li ntawd xwb, thaum peb “thov Vajtswv tsis tseg li thiab tsis txhob qaug zog,” yuav qhia tias peb muaj kev ntseeg thiab. (Lukas 18:1-8, TT) Yog li ntawd, cia li “thov Vajtswv tsis tseg tsis tu” thiab tso siab plhuav tias nws “niaj hnub tsomkwm” koj. (1 Thexalaunikes 5:17; 1 Petus 5:7) Peb txojkev ntseeg yuav ua kom peb ua qhov zoo ces thaum peb ua qhov zoo, peb txojkev ntseeg yuav yimhuab nyob ruaj khov.​—Yakaunpaus 2:22.

Hmo ua ntej Yexus tuag, nws hais rau nws cov thwjtim tias: “Nej cia li ntseeg Vajtswv thiab ntseeg  kuv.” (Yauhas 14:1) Yog li ntawd, tsis yog peb yuav ntseeg Yehauvas tib leeg xwb, tiamsis peb yuav tsum ntseeg Yexus thiab. Peb yuav ntseeg Yexus li cas? Cia peb kawm txog 3 qho uas yuav pab tau peb ua li no.

Qhov 1, koj yuav tsum muab qhov uas Yexus Khetos tuag txhiv peb lub txim saib tias yog Vajtswv pub rau koj ntag. Tus tubtxib Paulus hais tias: “Qhov uas nimno kuv muaj txojsia nyob twb yog vim kuv ntseeg Vajtswv tus Tub, tus uas hlub kuv thiab muab nws txojsia los txhiv kuv.” (Kalatias 2:20) Thaum koj ntseeg Yexus ces koj yuav ntseeg tias nws tus nqi txhiv yeej pab tau koj, yeej daws tau koj lub txim txhaum, yeej qhib kev rau koj tau txais txojsia ib txhis tsis kawg, thiab ua povthawj tias Vajtswv hlub koj tiag. (Loos 8:32, 38, 39; Efexus 1:7) Yog koj ntseeg tias Yexus Khetos tuag txhiv koj lub txim ces koj yuav tsis tu siab dhau txog tej uas koj tau ua txhaum.​—2 Thexalaunikes 2:16, 17.

Qhov 2, rau siab thov Vajtswv koj thiaj li txav ze rau nws. Twb yog muaj Yexus tus nqi txhiv peb thiaj li thov tau Vajtswv. Yog li ntawd, cia peb “mus cuag Vajtswv . . . rau qhov nws yog tus uas hlub peb. Nws yuav pab peb thiab foom koob hmoov rau txhua tus uas thov nws.” (Henplais 4:15, 16; 10:19-22) Yog peb thov Vajtswv, ces txawm muaj kev sim siab los peb yuav tsis mus ua txhaum.​—Lukas 22:40.

Qhov 3, mloog Yexus lus. Tus tubtxib Yauhas hais tias: “Tus uas ntseeg Leej Tub yuav tau txojsia ntev dhawv mus ibtxhis, tiamsis tus uas tsis mloog Leej Tub tej lus yuav tsis tau txojsia; Vajtswv yuav rau txim rau tus ntawd.” (Yauhas 3:36) Nqe no, Yauhas hais tias tus uas muaj kev ntseeg yog tus uas mloog lus hos tus tsis muaj kev ntseeg yog tus tsis mloog lus. Yog li ntawd, yog koj muaj kev ntseeg ces koj yuav mloog Yexus lus. Yog koj mloog Yexus lus ces koj yuav coj raws nraim li “Yexus Khetos txoj kevcai,” uas yog tag nrho tej uas Yexus qhuab qhia thiab samhwm. Koj kuj yuav mloog tej uas “tus qhev ncaj thiab ntse” hais thiab. (Mathais 24:45, TT) Thaum peb mloog Yexus lus ces txawm peb yuav raug teebmeem loj thiab txaus ntshai heev cuag nag xob nag cua ntsawj los peb yeej yuav thev taus.​—Lukas 6:47, 48.

Muaj ib zaug ib tug txivneej hais rau Yexus tias: “Kuv ntseeg tiamsis tsis txaus, thov koj pab kom kuv muaj kev ntseeg ntxiv!” (Malakaus 9:24) Tus txivneej no yeej muaj kev ntseeg tiamsis nws paub tias tsis txaus. Ib yam li tus txivneej no, tej thaud peb kuj muaj kev ntseeg tsis txaus thiab. Peb txhua leej txhua tus yuav tsum muab siab rau ntseeg heev zuj zus tamsim no. Zoo li peb tau kawm, peb yuav tsav tau peb txojkev ntseeg thaum peb kawm phau Vajlugkub thiab ua tib zoo xav txog tej uas peb kawm. Thaum peb ua li no, yuav ua rau peb paub ris Yehauvas txiaj ntsig. Yog peb nrog peb cov kwvtij nkauj muam pehawm Yehauvas, tshaj tawm rau lwm tus txog peb txojkev cia siab, thiab thov Vajtswv tsis tu ncua ces peb txojkev ntseeg yuav nyob ruaj khov. Thiab thaum peb txojkev ntseeg ruaj khov lawd, peb yuav tau txais tus nqi zog uas zoo tshaj plaws. Vajtswv Txojlus hais tias: “Cov phoojywg, nej yuav tsum muab siab rau ntseeg heev zuj zus ntxiv” kom nej thiaj nyob hauv Vajtswv txojkev hlub.​—Yudas 20, 21.