1. Yexus hais li cas rau 4 tug neeg ntaus ntses thiab lawv ua li cas xwb?

PETUS, Adales, Yakaunpaus, thiab Yauhas lawv yog neeg ntaus ntses. Thaum Yexus hais rau lawv tias: ‘Nej cia li nrog kuv mus, kuv yuav qhia kom nej paub mus nrhiav neeg,’ lawv ua li cas xwb? Phau Vajlugkub hais tias: ‘Tamsim ntawd lawv txawm tso plhuav lawv lub vas tseg thiab nrog Yexus mus.’ (Mathais 4:18-22) Lawv paub tias thaum lawv txiav txim siab nrog Yexus “mus nrhiav neeg” ces lawv yuav tsis muaj sijhawm mus ntaus ntses lawm. (Lukas 5:10) Niaj hnub nimno los Yexus tseem nrhiav cov uas nyiam Vajtswv Txojlus mus tshaj tawm txoj xov zoo. (Mathais 28:19, 20) Koj puas tau ua ib tug tshaj tawm thiab?

2. Vim li cas cov uas xav ua ib tug tshaj tawm yuav tsum ua zoo xav ua ntej tso?

² Tej zaum koj twb kawm Vajlugkub ntev lawm thiab hloov koj lub neej raws li tej koj kawm lawm. Tiamsis koj tseem xav tias koj puas yuav ua ib tug tshaj tawm txoj xov zoo los tsis ua. Yog koj tseem tsis tau paub los tsis txhob poob siab. Vim qhov no tsis yog ib yam uas koj yuav lam tau lam ua. Phau Vajlugkub hais tias thaum Yexus hais kom Petus lawv nrog nws mus, lawv tso plhuav lawv lub vas tseg “tamsim ntawd.” Tiamsis 6 lub hlis ua ntej ntawd lawv twb paub tias Yexus yog tus Mexiyas lawm. (Yauhas 1:35-42) Yog li ntawd, lawv yeej muab coj los xav zoo zoo lawm ua ntej lawv txiav txim siab nrog Yexus mus. Zoo ib yam li ntawd, tej zaum koj twb paub Yehauvas thiab Yexus nkawd zoo lawm thiab xav muaj kev sib raug zoo nrog Yehauvas ntxiv. Tiamsis ua ntej koj yuav ua ib tug tshaj tawm koj yuav tsum muab coj los ua zoo xav.  Ua li cas Petus lawv thiaj kam mus tshaj tawm txoj xov zoo?

3. Dabtsi yuav pab tau koj los ua ib tug tshaj tawm txoj xov zoo?

³ Yexus cov thwjtim thaum ub muaj siab mus tshaj tawm, ua lawv tes haujlwm zoo, ua siab loj siab tawv, thiab tsis tos leejtwg hais lawv. Twb yog vim li ntawd lawv thiaj li txawj tshaj tawm txoj xov zoo. Zaj no, peb yuav tham seb koj yuav ua li cas koj thiaj txawj tshaj tawm thiab txawj qhia lwm tus.

4. Ua cas Petus thiaj mus ntaus ntses?

⁴ Petus tsis yog mus ntaus ntses los yug nws tsev neeg xwb tiamsis nws yeej nyiam ntaus ntses. (Yauhas 21:3, 9-15) Thaum nws ua Yexus ib tug thwjtim los nws kuj nyiam mus tshaj tawm txoj xov zoo. Thiab nws txawj mus tshaj tawm los twb yog vim muaj Yehauvas pab nws.​—Tes Haujlwm 2:14, 41.

5. (1) Raws li Lukas 5:8-11, vim li cas Petus thiaj ntshai? (2) Yuav ua li cas peb thiaj tsis ntshai ua ib tug tshaj tawm?

⁵ Txawm peb xav hais tias peb tsis txawj mus tshaj tawm los yog peb hlub Yehauvas ces peb yuav muaj siab xav mus tshaj tawm. Thaum Petus ua li Yexus hais es lawv ntaus tau ntses ntau ntau, Petus xav tsis thoob li. Yexus hais rau Petus tias “koj tsis txhob ntshai” thaum nws yaum Petus nrog nws mus tshaj tawm txoj xov zoo. (Nyeem Lukas 5:8-11.) Petus yeej tsis ntshai tias yuav ua li cas rau nws yog nws los ua Yexus ib tug thwjtim. Nws tsuas xav tias nws tsis tsim nyog nrog Yexus mus tshaj tawm vim rau qhov nws paub tias qhov uas lawv ntaus tau ntses ntau heev los twb yog Yexus ua txuj ci xwb. Zoo ib yam li Petus tej zaum koj yeej ntshai mentsis. Tej zaum koj txhawj txog tej haujlwm koj yuav tau ua yog koj los ua Yexus ib tug thwjtim. Yog koj txhawj li ntawd ces rau siab ntso ua kom koj muaj kev hlub rau Yehauvas, Yexus, thiab rau  neeg zej zog. Yog koj ua li ntawd ces koj yuav xav ua ib tug tshaj tawm.​—Mathais 22:37, 39; Yauhas 14:15.

6. Yog vim li cas peb thiaj muaj siab mus tshaj tawm?

⁶ Yog vim li cas peb thiaj muaj siab mus tshaj tawm? Cia peb tham txog yam puav. Peb muaj siab mus tshaj tawm vim peb xav ua li Yexus sam hwm no: ‘Cia li mus qhia txhua haivneeg kom lawv los ua kuv cov thwjtim.’ (Mathais 28:19, 20) Thiab peb mus tshaj tawm rau qhov niaj hnub nimno tibneeg muaj kev “ntxhov siab thiab tsis muaj leejtwg pab lawv.” (Mathais 9:36) Peb paub tias tsuas yog Vajtswv lub Nceeg Vaj xwb thiaj li pab tau lawv. Tsis tas li ntawd xwb Yehauvas xav kom txhua haiv neeg los paub qhov tseeb thiab dim lawv lub txim.​—1 Timautes 2:4.

7. Raws li Loos 10:13-15, vim li cas peb thiaj yuav tau mus tshaj tawm?

⁷ Peb yuav muaj siab mus tshaj tawm thaum peb xav txog qhov uas txoj xov zoo yuav cawm tau tibneeg txojsia. Peb tsis zoo li cov neeg mus ntaus ntses los noj lossis los muag. Tiamsis peb mus coj neeg los ua Yexus cov thwjtim vim peb xav cawm lawv txojsia.​—Nyeem Loos 10:13-15; 1 Timautes 4:16.

8, 9. Tus neeg ntaus ntses yuav tsum paub dabtsi thiab yog vim li cas?

⁸ Nyob rau Yexus tiam cov Yixalayees uas ntaus ntses yuav tsum paub tias lawv yuav ntaus hom ntses twg thiab cov ntses ntawd muaj nyob qhovtwg vim ntses nyiam nyob tej qhov chaw uas cov dej haum lawv thiab muaj tej uas lawv nyiam noj xwb. (Levis Kevcai 11:9-12) Lub sijhawm uas lawv mus ntaus ntses los tseem ceeb heev thiab. Ib tug tubtxib tshaj tawm txawv tebchaws nyob hauv ib lub pov txwv ntawm dej hiav txwv Paxifiv kawm tau tias tsuas muaj tej lub caij xwb thiaj ntaus tau ntses. Thaum ib tug Timkhawv caw nws mus ntaus ntses, nws hais tias, “Kuv mam li tuaj ntsib koj tagkis thaum 9 teev sawv ntxov.” Tus kwvtij teb tias, “Tsis yog li ko. Peb yuav tsum mus rau lub caij uas peb ntaus tau ntses, tsis yog mus thaum peb khoom xwb.”

⁹ Zoo ib yam li ntawd, Yexus cov thwjtim thaum ub los yuav tsum paub tias qhovtwg thiaj muaj neeg thiab lub sijhawm twg thiaj ntsib lawv. Yexus cov thwjtim mus tshaj tawm rau hauv lub Tuamtsev, lub tsev sablaj, ntawm tibneeg tej vaj tse, thiab tom tej kiab tej khw. (Tes Haujlwm 5:42; 17:17; 18:4) Peb los yuav tsum paub seb cov neeg hauv peb thaj tsam nyob tsev thaum twg thiab nyiam ua dabtsi. Peb yuav tsum mus tshaj tawm rau tej qho chaw thiab tej lub sijhawm uas peb yuav ntsib neeg.​—1 Kauleethaus 9:19-22.

10. Yehauvas lub koom haum npaj tau cov twj twg rau peb?

¹⁰ Tus neeg ntaus ntses yuav tsum muaj cuab yeej ntaus ntses thiab paub siv nws cov cuab yeej. Thaum peb mus tshaj tawm los peb yuav tsum muaj tej twj pab peb tshaj tawm thiab paub siv tej twj ntawd. Thaum Yexus xa nws cov thwjtim mus tshaj tawm nws qhia rau lawv tias lawv yuav nqa dabtsi nrog lawv, lawv yuav tshaj tawm rau qhovtwg thiab yuav tshaj tawm li cas. (Mathais 10:5-7; Lukas 10:1-11) Niaj hnub no Yehauvas lub koom haum npaj tau Cov Twj Mus Ua Vajtswv Tes Num thiab pab kom peb paub siv cov twj ntawd. * Qhov no kuj pab kom peb tsis ntshai mus tshaj tawm thiab txawj qhia txoj xov zoo.​—2 Timautes 2:15.

11. Vim li cas cov tshaj tawm txoj xov zoo yuav tau ua siab loj siab tawv?

¹¹ Cov neeg ntaus ntses yuav tsum ua siab loj siab tawv vim lawv tsis paub xyov yuav muaj cua daj cua dub thaum twg. Tsis tas li ntawd xwb lawv niaj zaus mus ntaus ntses thaum yav  tsaus ntuj. Cov mus tshaj tawm txoj xov zoo los yuav tau ua siab loj siab tawv. Thaum peb mus tshaj tawm thiab qhia tias peb yog Yehauvas Cov Timkhawv, tej zaum peb tsev neeg yuav tawm tsam peb, peb cov phoojywg yuav thuam yuav luag peb, thiab muaj ib co neeg yuav tsis kam mloog txoj xov zoo. Tiamsis peb tsis ntshai rau qhov Yexus twb qhia rau peb lawm tias nws yuav xa nws cov thwjtim mus tshaj tawm rau cov neeg uas yuav tawm tsam lawv.​—Mathais 10:16.

12. Raws li Yausuas 1:7-9, peb yuav ua li cas peb thiaj ua tau siab loj siab tawv?

¹² Yuav ua li cas koj thiaj ua tau siab loj siab tawv? Koj yuav tsum ntseeg tias Yexus nyob saum ntuj ceeb tsheej saib xyuas peb txojkev tshaj tawm. (Yauhas 16:33; Tshwmsim 14:14-16) Thiab koj yuav tsum ntseeg tias Yehauvas yeej yuav saib xyuas koj li nws tau cog lus tseg. (Mathais 6:32-34) Koj txojkev ntseeg ruaj khov npaum li cas ces koj yuav ua tau lub siab loj siab tawv npaum li ntawd. Petus thiab nws cov phoojywg los muaj kev ntseeg heev thaum lawv tso lawv tes haujlwm ntaus ntses tseg mus tshaj tawm txoj xov zoo nrog Yexus. Koj los muaj kev ntseeg ib yam li ntawd thiab thaum koj qhia koj tsev neeg thiab phoojywg tias koj pib kawm Vajlugkub nrog Yehauvas Cov Timkhawv thiab pib mus kev sib txoos. Koj hloov koj lub neej kom haum Yehauvas tej kevcai. Koj ua tau li no los twb yog vim koj muaj kev ntseeg thiab muaj lub siab tawv. Thaum koj rau siab ntso ua kom koj muaj lub siab loj siab tawv, koj yeej tso siab tau tias Vajtswv Yehauvas “yuav nrog nraim koj txhua qhov uas koj mus.”​—Nyeem Yausuas 1:7-9.

13. Vim li cas qhov uas koj ua tib zoo xav txog tej uas Yehauvas ua thiab qhov uas koj thov Vajtswv yuav pab koj ua tau siab loj siab tawv?

 ¹³ Koj yuav ua li cas ntxiv koj thiaj ua tau siab loj siab tawv? Koj yuav tau thov Yehauvas pab koj. (Tes Haujlwm 4:29, 31) Yehauvas yuav teb koj cov lus thov thiab yuav tsis tso koj tseg ib zaug li. Ua tib zoo xav seb Yehauvas tau pab nws cov neeg yav tas los li cas. Xav seb nws pab koj li cas thaum koj muaj teeb meem lossis muaj kev nyuaj siab, thiab nws pab koj hloov tau koj lub neej li cas. Yog Yehauvas twb coj tau nws cov neeg hla dej Hiavtxwv Liab ces nws yeej yuav pab tau koj los ua Yexus Khetos ib tug thwjtim thiab. (Khiav Dim 14:13) Koj yeej ntseeg tau Yehauvas ib yam li tus sau nkauj hais no: “Tus TSWV [“Yehauvas,” NWT ] nrog nraim kuv nyob, kuv yuav tsis ntshai li; leejtwg muaj peevxwm ua tau li cas rau kuv?”​—Phau Ntawv Nkauj 118:6.

14. Koj kawm tau li cas los ntawm Maxa-es thiab Tomauyaus nkawd 2 tug qauv?

¹⁴ Thaum koj hnov txog tej tug uas thaum ub txaj txaj muag tiamsis nimno ua tau siab loj siab tawv lawm, yuav pab tau koj ua li ntawd thiab. Xws li tus muam hu ua Maxa-es (Masae). Thaum ub nws yog ib tug neeg txaj muag thiab nws yeej tsis xav tias nws yuav muaj cuab kav mus tshaj tawm li. Nyuaj heev rau nws mus nrog tibneeg tham, cuag li nws nce ib sab phab ntsa siab siab uas yuav nce tsis nto li. Yog li ntawd nws thiaj rau siab ntso ua kom nws muaj kev hlub ntau zuj zus rau Vajtswv thiab cov neeg zej zog. Nws ua tib zoo xav tias tseem ceeb npaum li cas rau nws mus tshaj tawm tamsim no thiab nws thov Vajtswv pab kom nws muaj siab xav mus tshaj tawm. Nws tsis ntshai mus tshaj tawm lawm thiab tseem ua tau ib tug tho kev. Yehauvas los yuav pab tau cov tshaj tawm tshiab kom lawv ua tau siab loj siab tawv thiab. Hos tus muam hu ua Tomauyaus (Tomoyo) hais tias thaum nws nyuam qhuav pib mus tshaj tawm ib lub tsev rau ib lub tsev, thawj thawj lub tsev nws mus txog, ib tug niam tsev nthe nws tias: “Kuv tsis xav nrog Yehauvas Cov Timkhawv tham!” thiab cia li ntsawm kiag qhov rooj. Tomauyaus tsis ntshai li, nws hais rau tus muam uas nrog nws tias: “Koj puas pom? Kuv twb tsis tau hais ib lo li los nws twb paub hais tias kuv yog Yehauvas ib tug Timkhawv lawm. Kuv zoo siab ua luaj li os!” Nimno Tomauyaus yog ib tug tho kev lawm.

15. Yog tsis yoojyim rau peb mus tshaj tawm, peb yuav xyaum ua li cov neeg ntaus ntses li cas? Thiab vim li cas thiaj tseem ceeb rau cov Khixatia ua li ntawd?

¹⁵ Cov neeg ntaus ntses uas ntaus tau tau ntses yog cov uas paub lawv tes haujlwm thiab tsis tos lwm tus hais lawv. Lawv sawv ntxov ntxov thiab nyob lig lig ua lawv tes haujlwm kom tiav, txawm huab cua tsis zoo los lawv yeej ua tiag ua. Peb los kuj ib yam, peb yuav tsum tau yuam peb tus kheej peb thiaj ua tau siab ntev ua peb tes haujlwm kom tiav.​—Mathais 10:22.

16. Peb yuav ua li cas yog tias nyuaj heev rau peb ua ib yam dabtsi?

¹⁶ Peb yeej nyiam ua tej uas yoojyim rau peb xwb tiamsis tej thaud muaj tej yam uas peb yuav tsum tau ua uas tsis yoojyim. Yog li ntawd peb yuav tsum tau yuam peb tus kheej peb thiaj ua tau thiab Yehauvas yuav pub nws lub hwj huam dawb huv los pab kom peb ua tau li ntawd.​—Kalatias 5:22, 23.

17. Hauv 1 Kauleethaus 9:25-27, Paulus ua li cas nws thiaj ua tau haum Vajtswv siab?

¹⁷ Tus tubtxib Paulus yeej paub haujlwm zoo thiab tsis tos leejtwg hais nws. Tiamsis nws hais tias muaj tej thaud nws yuav tsum ‘tswj rawv nws lub cev’ nws thiaj ua tau haum Vajtswv siab. (Nyeem 1 Kauleethaus 9:25-27.) Nws hais rau cov Khixatia thaum ub tias: “Txhua yam uas nej ua, nej yuav tsum ua kom zoo thiab tsis txhob lam ua dog ua dig.” (1 Kauleethaus 14:40) Yog li ntawd peb yuav tsum rau siab ntso teev tiam Yehauvas es mus tshaj tawm thiab qhia txoj  xov zoo rau lwm tus tsis tu ncua.​—Tes Haujlwm 2:46.

18. Peb yuav tsum ua li cas yog peb xav kom Yehauvas txaus siab rau peb tes haujlwm?

¹⁸ Tus neeg ntaus ntses tsuas zoo siab thaum nws ntaus tau ntses ntau ntau xwb. Tiamsis peb tsis zoo li ntawd, txawm peb coj tau neeg los rau hauv Vajtswv lub koom haum thiab tsis tau los tsuav peb rau siab ntso mus tshaj tawm thiab qhia lwm tus xwb ces Yehauvas yeej txaus siab rau peb tes haujlwm lawm. (Lukas 8:11-15) Vim li cas Yehauvas thiaj txaus siab rau peb? Vim rau qhov peb rau siab ua peb tes haujlwm li Yehauvas thiab nws tus Tub hais kom peb ua.​—Malakaus 13:10; Tes Haujlwm 5:28, 29.

19, 20. Vim li cas peb yuav tsum mus tshaj tawm tamsim no?

¹⁹ Nyob tej lub tebchaws, luag tsuas pub mus ntaus ntses tej lub caij xwb. Yog li ntawd thaum lub caij ntaus ntses yuav dua, cov neeg ntaus ntses haj yam kub siab mus ntaus ntses. Zoo ib yam li cov neeg ntaus ntses ntawd, peb yuav tsum kub siab lug mus tshaj tawm tamsim no rau qhov lub sijhawm kawg twb los yuav txog! Tshuav sijhawm tsawg tsawg rau peb mus cawm tibneeg txojsia lawm xwb. Tsis txhob laug sijhawm lossis tos kom tsis muaj dabtsi tab kaum koj lub neej, koj mam li ua tes haujlwm tseem ceeb no.​—Tej Lus Qhia 11:4.

²⁰ Tamsim no koj yuav tsum rau siab ntso ua kom koj muaj siab mus tshaj tawm, kom koj paub Vajtswv Txojlus zoo, kom koj ua tau siab loj siab tawv, thiab ua koj tes haujlwm tsis tos leejtwg hais koj. Niaj hnub nimno muaj li 8 plhom tawm tus tibneeg thoob qab ntuj tshaj tawm txoj xov zoo. Yog koj mus tshaj tawm txoj xov zoo thiab, ces koj yuav tau txojkev zoo siab uas los ntawm Yehauvas los. (Nehemis 8:10) Rau siab ntso tshaj tawm mus txog thaum Yehauvas hais tias tes haujlwm no tiav lawm. Zaj tom ntej, peb yuav tham txog 3 yam uas yuav pab tau peb kub siab lug mus tshaj tawm txoj xov zoo txog Vajtswv lub Nceeg Vaj.