Txaus Siab Rau Peb Lub Neej
Peb txhua tus laus thiab hluas, muaj txij nkawm thiab tsis muaj los yeej xav muaj kev zoo siab txaus siab rau peb lub neej. Tus uas tsim peb yeej xav kom peb muaj kev zoo siab thiab, yog li nws thiaj nrhiav kev los cob qhia peb.
Ua Neeg Nquag
‘Nws khwv ntawm nws tes zoo dua, nws thiaj li yuav muaj yam ub yam no pab cov neeg txom nyem.’—EFEXUS 4:28.
Tus Tswv Tsim xav kom peb xyaum ua neeg nquag. Vim li cas? Vim tias tus neeg nquag yuav rau siab khwv los yug nws thiab nws tsev neeg. Yog lwm tus tu ncua ib yam dabtsi los nws thiaj yuav cev tau rau luag. Tsis tas li ntawd xwb, yog nws nquag nws lub haujlwm thiaj xav yuav nws. Phau Vajlugkub thiaj hais tias ‘tej uas peb khwv tau yog tej uas Vajtswv muab pub rau peb.’—Tej Lus Qhia 3:13.
Ua Neeg Ncaj Ncees
“Peb ruaj siab tias peb muaj lub siab dawb paug, xav xyaum zoo rau txhua fab.”—HENPLAIS 13:18, TT.
Yog peb ua neeg ncaj peb yuav muaj kev kaj siab thiab tsaug taus zog dua, vim tsis muaj dabtsi txob siab. Tsis tas li ntawd, lwm tus yuav ntseeg peb siab thiab saib taus peb. Cov neeg dag yuav tsis tau qhov zoo. Lawv lub siab yuav rov nkaug lawv, thiab lawv yeej ntshai rwg tsam lwm tus ntes tau lawv.
Txhob Muab Nyiaj Txiag Saib Hlob
“Nej tsis txhob qaug rau nyiaj rau kub, nej muaj npaum li cas nej cia li zoo siab rau tej uas nej muaj.”—HENPLAIS 13:5.
Nyiaj txiag pab tau peb yuav zaub yuav mov thiab lwm yam uas peb cheem tsum. Tiamsis kev ‘ntshaw nyiaj txiag’ kuj coj tau peb mus yuam kev thiab, vim peb yuav siv tag nrho peb lub sijhawm mus khwv nyiaj. Tus uas nrhiav nrhw kev nplua nuj yuav tsim tau teeb meem rau nws txojkev txij nkawm, thiab yuav tsis muaj sijhawm nrog nws tej me tub menyuam. Tej zaum yuav ua rau nws muaj mob los kuj muaj. (1 Timautes 6:9, 10) Tsis tas li ntawd, tus uas ntshaw nyiaj yuav ua txhua yam los dag noj dag haus. Ib tug txivneej uas thoob tshib tau hais tias: ‘Cov neeg uas muaj lub siab ncaj yuav tau txais lub neej kaj siab, tiamsis yog koj xav nplua nuj sai koj yuav raug txim ntag.’—Pajlug 28:20.
Xaiv Txojkev Kawm Uas Zoo Tshaj Plaws
“Tuav rawv koj lub tswvyim thiab kev txawj ntse cia.”—PAJLUG 3:21.
Kev kawm ntaub kawm ntawv yeej pab tau peb saib xyuas peb tsev neeg tiamsis yuav pab tsis tau peb muaj kev zoo siab mus li. Yog peb xav muaj kev zoo siab tiag tiag hauv peb lub neej peb yuav tsum kawm los ntawm Vajtswv. Phau Vajlugkub hais tias tus uas mloog Vajtswv lus: ‘Txhua yam uas nws ua nws yuav vam meej.’—Phau Ntawv Nkauj 1:1-3, TT.
Tej Yam No Yuav Pab Tau Koj Thiab
PHAU TSOM FAJ
Txaus Siab Hlo Siv Zog Ua Haujlwm
Phau Vajlugkub kuj muaj tej lus qhuab qhia uas yuav pab tau peb txaus siab ua peb tes haujlwm.
TSIM DHEEV!
Lub Neej Kaj Siab Lug—Txaus Siab Rau Lub Neej Thiab Ua Siab Dav
Coob leej ntau tus xav tias yus yimhuab muaj nyiaj, yus yimhuab zoo siab. Tiamsis kev muaj txiag nplua nuj puas ua rau peb zoo siab tiag? Tibneeg tau tshawb pom li cas?
NTSIG TXOG PEB
Rau Npe Kawm Vajlugkub
Kav tsij rau npe yog koj muaj dab tsi xav nug Yehauvas Cov Tim Khawv los sis xav paub seb Yehauvas Cov Tim Khawv ntseeg li cas.
