“Vim ib tug xub ua txhaum, neeg ntiajteb txhua tus thiaj ua txhaum.”​—LOOS 5:12.

Vajtswv tsim tau thawj nkawm niam txiv Adas thiab Evas zoo tiav log. Nws muab nkawd tso rau hauv ib lub vaj zoo zoo nkauj hu ua Edees. Vajtswv pub nkawd noj txhua tsob txiv ntoo hauv lub vaj, tsuas txwv tib tsob xwb. Tiamsis Adas thiab Evas tseem noj kiag tsob uas Vajtswv txwv, nkawd thiaj ua txhaum. (Chivkeeb 2:15-17; 3:1-19) Yog li Vajtswv thiaj muab nkawd ntiab tawm hauv lub vaj. Txij hnub ntawd los, nkawd ua neej txom nyem ntsuav. Nkawd tej menyuam los kuj ua neej txom nyem ntsuav thiab txawj laus txawj tuag ib yam li nkawd. (Chivkeeb 3:23; 5:5) Peb txawj laus txawj tuag vim peb yog nkawd tej xeeb leej xeeb ntxwv.

‘Lub ntiajteb huvsi nyob hauv tus uas phem qab hwjchim.’​—1 YAUHAS 5:19, TT.

Muaj ib tug tub txib saum ntuj ntxeev siab rau Vajtswv. Nws yog Xatas. (Yauhas 8:44; Tshwmsim 12:9) Kuj muaj lwm cov tub txib saum ntuj nrog Xatas ntxeev siab rau Vajtswv thiab. Cov plig phem no siv lawv lub hwjchim los ntxias tibneeg tawm tsam tus  Tswv Tsim. Lawv haub ntxias tibneeg mus ua ntau yam kev phem. (Phau Ntawv Nkauj 106:35-38; 1 Timautes 4:1) Xatas thiab nws cov dab kuj ua rau tibneeg muaj mob thiab raug kev txom nyem.

“Txhua tus nyias yuav tau sau raws li tej uas nyias tseb.”​—KALATIAS 6:7.

Peb txhua tus raug ntau yam kev txom nyem vim peb yog neeg txhaum thiab raug Xatas haub ntxias. Tiamsis qee zaus tibneeg rov lob teeb meem los rau lawv tus kheej vim lawv txiav txim siab ua tej yam ruam ntsuav. Yog peb txiav txim siab ua tej yam zoo ces peb yuav zam teeb meem. Piv txwv li no, ib tug txiv tsev uas coj ncaj rau txhua fab thiab rau siab ntso khwv los yug nws tsev neeg yuav ua rau nws lub cuab lub yig muaj kev kaj siab. Tiamsis tus uas tsuas pom twv nyiaj twv txiaj, quav dej quav cawv lossis tub nkeeg, yuav ua rau nws tsev neeg kob huam. Yog li peb yuav tsum mloog tus uas tsim peb lus, peb thiaj yuav ua neeg txawj neeg ntse. Nws tsuas xav kom peb “nyob kaj siab lug” xwb.​—Phau Ntawv Nkauj 119:165.

‛Thaum lub sijhawm uas ntiajteb yuav kawg . . . , tej neeg nyias yuav xav txog nyias xwb, lawv yuav ntshaw nyiaj, . . . tsis mloog niam txiv lus, . . . tsis tswj lawv lub siab, ua neeg tsiv tsaim thiab tsis nyiam ua zoo.’​—2 TIMAUTES 3:1-5.

Niaj hnub no coob leej coj raws nkaus li nqe Vajlugkub no hais. Lawv tej cwj pwm ua pov thawj qhia tias peb nyob rau ‘lub sijhawm kawg’ lawm tiag. Phau Vajlugkub qhia ntxiv tias lub sijhawm kawg yuav muaj kev tsov kev rog, kev tshaib nqhis, av qeeg, thiab kab mob kev nkeeg. (Mathais 24:3, 7, 8; Lukas 21:10, 11) Tej no kuj ua rau tibneeg raug kev txom nyem thiab kev ploj kev tuag.