RAU COV TXIJ NKAWM
2: Koom Siab
YOG LI CAS?
Yog ob niam txiv sib koom siab ces nkawd zoo li ob tug neeg uas sib pab tsav dav hlau. Nkawd txawj sib pab lub dav hlau thiaj ya mus txog chaw. Txawm muaj teeb meem los ib tug xam pom ib tug, tsis yog xam pom nws tus kheej xwb.
VAJLUGKUB TEJ HAUV PAUS NTSIAB LUS: “Ob tug thiaj tsis ua ob lub cev tiamsis koom ua ib lub cev xwb.”—Mathai 19:6.
Tub Fwm tau hais tias: “Thaum yus muaj txij nkawm, tsis yog yus ib leeg lawm xwb. Yus ob niam txiv yuav tsum koom ib lub siab tsav lub neej thiaj mus taus.”
VIM LI CAS TSIM NYOG UA?
Yog ob niam txiv tsis koom siab ces thaum muaj teeb meem ib tug yuav muab liam rau ib tug. Nkawd tseem yuav muab tej teeb meem me ua loj thiab.
Paj Nra tau hais tias: “Kev txij nkawm yog kev koom siab ua neej ntag. Yog kuv tus txiv wb tsis sib koom siab ces zoo li wb lam nyob ua ke sib pab them nqe tsev xwb. Thaum muaj tej yam tseem ceeb hauv lub neej ces yuav tsis sib haum.”
KOJ YUAV UA LI CAS?
TSHUAJ KOJ TUS KHEEJ
-
Kuv puas suav tias cov nyiaj uas kuv khwv tau los yog wb ob leeg li?
-
Puas yog kuv yuav tsum txav deb ntawm kuv tus txij nkawm kuv thiaj tau so?
-
Kuv tus txij nkawm ncawg nws tsev neeg heev, tiamsis puas yog kuv txhob txwm tsis kam mus xyuas lawv?
NROG KOJ TUS TXIJ NKAWM THAM
-
Hauv wb lub neej wb txawj sib pab li cas xwb?
-
Puas muaj tej yam uas wb tu ncua tsis tshua sib pab?
-
Wb yuav tsum hloov li cas wb thiaj hajyam koom siab dua qub?
KEV PAB
-
Muab piv txwv tias neb ob niam txiv tabtom ncaws kab tob, ib leeg tuaj ib tog sib tw ncaws. Tiamsis neb yuav hloov li cas neb thiaj nyob tau ib tog?
-
Txhob xav li no, ‘Kuv yuav cam kom yeej nws!’ Tiamsis xav li no: ‘Kuv yuav hais li cas thiaj zoo rau wb ob leeg?’
Tub Lwm tau hais tias: “Txhob sib cam kom muaj yeej muaj swb. Qhov ntawd tsis tseem ceeb npaum li yus ob niam txiv nyob sib haum xeeb.”
VAJLUGKUB TEJ HAUV PAUS NTSIAB LUS: “Nej tsis txhob nyias xam pom nyias tus kheej xwb yuav tsum xam pom lwm tus thiab.”—Filipi 2:3, 4.
