Hauv lub qab ntuj khwb no txhua yam nyias muaj nyias chaw. Ib phau ntawv uas piav txog tej hnub qub hais tias, “Txawm tej ntsauv hnub qub nyob puv ntuj los nyias nyob muaj nyias quag tsis yog lam nyob ua sab ua sua xwb.” Ua li cas thiaj muaj tau li no? Cov neeg tshawb fawb ntseeg tias muaj ib lub zog peb qhov muag pom tsis tau ceev lub hnub lub hli thiab tej hnub qub ua ke kom nyias nyob nyias chaw.

Ua cas txhua yam hauv lub qab ntuj khwb no nyias ho muaj nyias chaw? Puas yog nyob nyob cia li muaj li ntawd xwb los yuav tsum muaj tus tsim thiaj muaj tau li ntawd? Cia peb saib seb Alee Xades (Allan Sandage) ib tug kws kawm hnub qub uas ntseeg Vajtswv thiab sawvdaws hwm kawg nkaus tau hais li cas.

 Nws hais tias, “Tej hnub qub tsis lam cia li sib tsub sib nias kom nyias nrhiav tau nyias chaw. Yeej muaj ib yam cais tej hnub qub ntawd nyias thiaj muaj nyias chaw.”

Txhua tsav yam hauv qab ntuj khwb no yug tau txojsia. Txhua tsav txhua yam hauv qab ntuj khwb no nyias ua nyias feem los yug txojsia. Cia peb tham txog lub hnub. Lub hnub tabtom kub tau haum nkaus xwb. Yog lub hnub kub muaj ceem dhau lawm, lub hnub yuav kub hnyiab thiab ua tshauv yaj tag. Hos yog lub hnub kub tsis muaj ceem txaus, yuav tsis muaj nplaim taws thiab yuav tsis muaj lub hnub li.

Yog li txhua yam saum nruab ntug nyias yeej ua nyias feem, txhua yam hauv ntiajteb thiaj ciaj taus. Ib tug yawg hu ua Anis Anathaxuvamis (Anil Ananthaswamy) uas sau txog kev kawm txujci tau hais tias yog txhua yam hauv qab ntuj khwb no nyias tsis ua nyias feem ces “yuav muaj tsis taus lub hnub lub hli, tej hnub qub, thiab txhua yam hauv lub ntiajteb yuav tuag tag.”

Lub ntiajteb yog qhov chaw zoo tshaj plaws rau tibneeg nyob. Lub ntiajteb muaj tej huab cua uas tabtom haum nkaus thiab muaj dej txaus nkaus. Tsis tas li ntawd, muaj lub hli tswj lub ntiajteb kom lub ntiajteb txawj qaij thiab nyob tau tus yees. Lub koom haum National Geographic sau tias, “Thaum cov neeg tshawb fawb kawm txog tej roob tej hav, tej pob zeb pob tsuas, tej nroj tsuag los mus rau tej tsiaj txhu thiab tej me kab me ntsaum, lawv pom tias lub ntiajteb no yog qhov chaw zoo tshaj plaws rau tibneeg nyob.” *

Ib tug txivneej tau sau tias, “Peb lub ntiajteb nrog rau lub hnub lub hli thiab peb ntsauv hnub qub nyob nrug deb ntawm lwm ntsaus hnub qub. Qhov uas lwm ntsaus hnub qub nyob deb li no ntawm peb yog ib qho zoo. Yog peb nyob ze lwm ntsauv hnub qub yuav muaj tej sab hnub ci tuaj ua rau peb muaj mob. Yog li lub ntiajteb nyob kiag ntawm ib thaj chaw uas tabtom zoo yug txojsia.”

Ib tug kws tshawb txuj uas kawm txog lub qab ntuj khwb hu ua Paulus Devim (Paul Davies) tau hais li no, “Kuv yeej tsis ntseeg tias lub ntiajteb no nyob nyob cia li tshwm plaws los xwb. . . . Lub ntiajteb yeej yog rau tibneeg nyob.” Paulus tsis tau ntaus nqi tias Vajtswv yog tus tsim lub qab ntuj khwb thiab tibneeg. Tiamsis koj xav li cas xwb? Zoo li lub ntiajteb thiab txhua yam hauv lub qab ntuj khwb no yeej yog tsim los kom yug tau txojsia. Yog tsis muaj tus tsim no yuav ua cas muaj tau li no?