1, 2. Yehauvas cov tub qhe yuav tsum peem li cas lawv thiaj teev tiam tau Nws?

TXIJ tiam Anpee nyob los txog niaj hnub nimno, cov uas teev tiam Vajtswv yuav tsum siv zog peem tiag lawv thiaj teev tiam tau Nws. Tus tubtxib Povlauj hais rau cov Khixatia Henplais tias lawv “tau tiv thev tej kev txom nyem loj kawg” li kom lawv ua tau haum Yehauvas siab thiab tau nws tej koob hmoov. (Henplais 10:32-34) Povlauj hais tias cov Khixatia yuav tsum siv zog peem tiag, ib yam li cov Kili uas sib tw dhia, sib qhau, thiab ntaus nrig. (Henplais 12:1, 4) Niaj hnub nimno, peb tabtom sib tw dhia kom tau txojsia. Tiamsis muaj cov yeeb ncuab uas tawm tsam peb, xav dawm peb ntog kom peb txhob tau tus nqe zog.

² Xatas thiab nws lub qab ntuj no yog cov uas nrog peb sib qhau heev tshaj. (Efexau 6:12) Peb yuav tsum tawm tsam kam tiag. Ceev faj lub qab ntuj no tej tswvyim thiab tej kev phem uas zoo li kev nkauj  kev nraug, kev quav yeeb quav tshuaj, kev quav dej quav cawv. Tiamsis peb yuav tsum tawm tsam peb lub siab thiab. Tej zaum muaj tej yam tsis zoo uas peb lub siab ntshaw lossis tej uas pheej ua rau peb qaug zog.​—2 Khaulee 10:3-6; Khaulauxi 3:5-9.

3. Vajtswv cob qhia li cas kom peb thiaj ntaus yeej peb cov yeeb ncuab?

³ Peb cov yeeb ncuab muaj zog ua luaj, peb yuav ua li cas thiaj kov yeej lawv? Peb yuav tsum siv zog peem kam tiag. Povlauj hais tias nws zoo li ib tug uas sib ntaus nrig uas “tsis yog ntaus nrig yam li tus uas ntaus cua xwb.” (1 Khaulee 9:26) Peb yuav tsum tawm tsam peb cov yeeb ncuab zoo ib yam li peb nrog lawv ntaus nrig ntag. Yehauvas yuav cob kom peb ntaus yeej. Nws siv nws Txojlus thiab peb cov ntaub ntawv Vajlugkub los cob peb. Tsis tas li ntawd xwb, peb cov kev sib txoos thiab cov rooj sib txoos los kuj txhawb kom peb muaj zog thiab. Koj puas ua raws li Yehauvas tau cob qhia koj? Yog muaj tej qho koj tsis ua, ces yuav nyuaj heev rau koj ntaus yeej koj tus yeeb ncuab.

4. Yuav ua li cas peb thiaj kov yeej kev phem?

⁴ Peb yuav tsum ceev faj txhua lub sijhawm. Vim li cas? Vim peb cov yeeb ncuab yuav tawm tsam peb rau lub caij uas peb tsis faj, lossis lawv yuav tos lub caij uas peb qaug zog heev. Yog peb qaug zog ces Xatas lub qab ntuj thiab tej kev phem uas peb lub siab ntshaw yuav kov yeej peb. Yog li ntawd, cia peb nco ntsoov phau Vajlugkub cov lus ceeb toom no: “Tsis txhob cia kev phem kov yeej nej, tiamsis cia qhov zoo kov yeej qhov phem.” (Loos 12:21) Cov lus no qhia tias yog peb rau siab ntso tawm tsam kev phem ces peb yuav kov yeej xwb xwb li! Cia peb siv zog peem tiag, txhob tso tes!​—1 Petus 5:9.

5. (1) Yog peb xav kov yeej peb cov yeeb ncuab, peb yuav tsum nco ntsoov dabtsi? (2) Peb yuav kawm txog cov qauv twg?

⁵ Yog peb xav kov yeej peb cov yeeb ncuab, peb yuav tsum nco ntsoov peb lub hom phiaj. Peb xav ua haum Yehauvas siab thiab xav tau nws tej koob hmoov. Henplais 11:6 hais tias: “Tus uas yuav los cuag Vajtswv yuav tsum ntseeg tias muaj Vajtswv tiag thiab nws pub nqe zog rau cov uas nrhiav nws.” Peb yuav nrhiav nws li cas? Peb yuav tsum rau siab ua tej uas haum Yehauvas siab. (Tubtxib Tes Haujlwm 15:17) Muaj coob leej ntau tus hauv phau Vajlugkub tau ua li ntawd. Yakhauj, Lachee, Yauxej, thiab Povlauj raug kev nyuaj siab thiab kev tawm tsam ntau yam ua rau lawv qaug zog zis, tiamsis lawv puavleej thev dhau. Lawv cov qauv qhia tias yog peb peem tiag, Yehauvas yeej yuav foom koob hmoov rau peb. Peb yuav xyaum lawv cov qauv li cas?

6. (1) Ua li cas Yakhauj thiaj ua tau siab ntev thev? (2) Yehauvas foom koob hmoov li cas rau Yakhauj? (Saib daim duab ntawm sab 13.)

⁶ Yakhauj hlub Yehauvas thiab xav nrog Nws sib raug zoo, Yakhauj thiaj uas siab ntev thev tej kev nyuaj siab uas los raug nws. Nws ntseeg ruaj nreeg tias Yehauvas yuav foom koob hmoov rau nws tej tub ki. (Chiv Keeb 28:3, 4) Thaum Yakhauj yuav luag muaj 100 xyoo, nws tau nrog ib tug tubtxib saum ntuj sib qhau kom Vajtswv foom koob hmoov rau nws. (Nyeem Chiv Keeb 32:24-28.) Puas yog Yakhauj muaj zog heev nws thiaj qhau yeej tus tubtxib saum ntuj ntawd? Tsis yog. Tiamsis Yakhauj paub tias yog nws nrog tus tubtxib ntawd sib qhau ib hmos kaj ntug ces Yehauvas yuav foom koob hmoov rau nws xwb xwb li, nws thiaj tsis tso tseg. Thaum kawg Vajtswv foom koob hmoov li cas rau nws? Nws muab Yakhauj npe hloov ua Yixayee uas txhais tias “Tus uas nrog Vajtswv sib ntsuas zog.” Yakhauj tau raws nkaus li nws lub siab ntshaw. Nws ua tau haum Vajtswv siab thiab tau Vajtswv tej koob hmoov lawm tiag. Peb xav kom tau li ntawd thiab, puas yog?

7. (1) Vim li cas Lachee ho nyuaj siab? (2) Lachee daws nws txojkev nyuaj siab li cas, thiab thaum kawg zoo li cas?

 ⁷ Lachee uas yog Yakhauj tus pojniam los kuj xav pom tej uas Yehauvas tau cog tseg rau nws tus txiv muaj tiav. Tiamsis nws nyuaj siab heev rau qhov nws muaj tsis taus menyuam. Txheej thaum ub, yog ib tug pojniam muaj tsis taus tubki ces nyuaj siab tshaj plaws li. Txawm Lachee nyuaj siab los nws tsis tag kev cia siab. Nws niaj hnub taij thov kom Yehauvas pab nws muaj taus menyuam. Yehauvas hnov txhua lo uas Lachee tau thov. Yehauvas thiaj foom koob hmoov kom nws xeeb tau menyuam. Thaum kawg Lachee hais tias: “Kuv . . . sib ntsuas zog heev thiab kuv kov yeej lawm.”​—Chiv Keeb 30:8, 20-24.

8. (1) Yauxej ntsib tej kev nyuaj siab twg? (2) Yauxej tso tau tus qauv zoo li cas rau peb?

⁸ Tom qab no, Yakhauj thiab Lachee nkawd tus tub Yauxej ntsib kev nyuaj siab ntau yam. Tej zaum nkawd tus qauv pab tau nws muaj lub siab ntev thev. Thaum Yauxej muaj 17 xyoo, nws lub neej hloov tag nrho. Vim nws cov tijlaug khib nws heev, lawv thiaj muab nws muag mus ua qhev. Tom qab ntawd, nws raug kaw hauv tsev loj cuj nram tebchaws Iyi tau ntau xyoo txawm tias nws tsis tau ua txhaum li. (Chiv Keeb 37:23-28; 39:7-9, 20, 21) Yauxej puas cia tej ntawd ua rau  nws qaug zog lossis npau taws? Nws puas ua phem pauj phem? Yauxej tsis ua li ntawd rau qhov nws saib nws txojkev sib raug zoo nrog Yehauvas rau nqe thiab nws tso siab plhuav rau Yehauvas. (Levi Tej Kevcai 19:18; Loos 12:17-21) Yauxej tus qauv yeej pab tau peb. Tej zaum peb lub neej thaum yau nyuaj heev lossis peb lub neej tamsim no tsis muaj kev vam kev cia siab. Txawm li cas los peb yuav tsum nrog Vajtswv sib ntsuas zog kam tiag. Yog peb ua li ntawd ces nws yeej yuav foom koob hmoov rau peb xwb xwb li.​—Nyeem Chiv Keeb 39:21-23.

9. Peb yuav xyaum Yakhauj, Lachee, thiab Yauxej lawv cov qauv li cas?

⁹ Niaj hnub no los peb yeej ntsib ntau yam kev nyuaj siab thiab. Tej thaum luag ua tsis ncaj rau peb, luag xaiv peb ntsej muag, lossis peb raug luag thuam luag khib. Txawm li cas los, tsis txhob cia tej ntawd ua rau koj qaug zog. Nco ntsoov Yakhauj, Lachee, thiab Yauxej lawv cov qauv es rau siab ntso teev tiam Yehauvas xyiv fab hlo. Vajtswv txhawb thiab foom koob hmoov rau lawv, vim lawv saib lawv txojkev sib raug zoo nrog Nws rau nqe. Lawv ua raws nkaus li lawv tej lus thov thiab lawv ua siab ntev thev kev nyuaj siab. Vim peb nyob rau tiam kawg lawm, peb yuav tsum tuav rawv txojkev vam kev cia siab uas peb muaj rau yav tom hauv ntej. Koj puas kam nrog Yehauvas sib ntsuas zog kom koj tau Nws tej koob hmoov?

10, 11. (1) Ua cas peb yuav tsum nrog Vajtswv sib ntsuas zog kom tau koob hmoov? (2) Peb yuav tsum ua li cas peb thiaj ua tau qhov zoo qhov yog?

¹⁰ Ua cas peb yuav tsum nrog Vajtswv sib ntsuas zog kom tau koob hmoov? Peb yog neeg txhaum, yog li ntawd ib txhia yuav tsum tawm tsam tiag tej yam tsis zoo uas lawv lub siab ntshaw. Ib txhia tsis muaj lub siab xav mus qhia Vajlugkub pes tsawg. Ib txhia ho tsis muaj siab teev tiam Yehauvas vim lawv muaj mob muaj nkeeg lossis lawv nyob ib leeg kho siab khuav tsis qab siab ua dabtsi. Kuj muaj dua lwm cov uas pheej khaws chim thaum luag ua rau lawv tu siab. Tej yam zoo li no yuav ua rau peb tsis qab siab ua Yehauvas tes haujlwm. Txawm peb teev tiam Yehauvas ntev npaum li cas lawm los, txhob pub tej no tav peb txoj hau kev. Yog peb ua siab ntev thev tiag, Vajtswv yuav pub nqe zog rau peb.

¹¹ Yeej tsis yoojyim rau ib tug Khixatia ua qhov zoo qhov yog. Yimhuab nyuaj yog peb muaj lub siab uas pheej ntxhi kom peb mus ua qhov phem. (Yelemi 17:9) Yog koj muaj ib lub siab zoo li ntawd, thov kom Yehauvas pub nws lub hwj huam dawb huv rau koj. Lub hwj huam yuav pab kom koj ua tau qhov zoo qhov yog, ces Yehauvas yuav foom koob hmoov rau koj. Koj tau thov Vajtswv li cas, nco ntsoov ua li ntawd. Nyeem thiab kawm phau Vajlugkub txhua txhua hnub thiab tsis txhob tu ncua hmo uas tsev neeg pe hawm Vajtswv ua ke.​—Nyeem Ntawv Nkauj 119:32.

12, 13. Ob tug Khixatia tau nrhiav kev pab li cas?

¹² Vajtswv lub hwj huam dawb huv, nws Txojlus, thiab tej ntaub ntawv Vajlugkub twb pab tau peb cov kwvtij nkauj muam coob tus kov yeej lub siab uas ntshaw tej yam tsis zoo. Muaj ib tug tub hluas tau nyeem ib zaj hauv phau Awake! lub 12 Hlis tim 8 xyoo 2003, hu ua “How Can You Resist Wrong Desires?” (Yuav Ua Li Cas Koj Lub Siab Thiaj Tsis Ntshaw Kev Phem?). Zaj no pab tau nws li cas? Nws hais tias: “Kuv yuav tsum tswj qees kuv lub siab kom txhob xav txog tej yam tsis huv. Zaj ntawd hais tias muaj ‘coob tus lees tias nyuaj heev rau lawv tswj lawv lub siab kom txhob ntshaw kev phem.’ Qhov no ua rau kuv pom tias tsis yog nyuaj kuv ib leeg xwb. Kuj nyuaj heev rau kuv cov kwvtij sawvdaws thiab.” Muaj dua ib zaj hauv phau Awake! lub 10 Hli tim 8 xyoo 2003 hu ua “Alternative Life-Styles​—Does  God Approve?” (Vajtswv Puas Pom Zoo Txivneej Yuav Txivneej, Pojniam Yuav Pojniam?) Thaum tus tub hluas nyeem zaj ntawd, nws pom tias tej kev phem uas ib txhia ntshaw ua, zoo li tus pos uas chob lawv tas hnub tas hmo. (2 Khaulee 12:7) Txawm li ntawd los, lawv tsis tag kev vam kev cia siab. Tus tub hluas thiaj hais tias: “Kuv pom tias kuv yeej tswj tau kuv tus kheej thiab ua tau lub neej haum Vajtswv siab. Kuv nco Yehauvas txiaj ntsig uas nws siv nws lub koom haum los pab kom peb thev dhau lub sim ceeb phem no.”

¹³ Kuj muaj ib tug muam uas nyob tebchaws U.S.A. tau sau tias: “Kuv xav ua nej tsaug uas nej qhuab qhia peb raws caij raws nyoog. Ua cas muaj tej zaj uas nej sau cuag li yog sau rau kuv ntag. Tau ntau lub xyoos no, kuv lub siab pheej ntshaw mus ua ib yam uas Yehauvas ntxub heev. Muaj tej thaum kuv xav hla Yehauvas txoj cai mus ua raws li kuv lub siab ntshaw. Kuv yeej paub tias Yehauvas yog ib tug Vajtswv uas muaj lub siab khuvleej zam txim, tiamsis qhov tseeb tiag kuv twb tsis ntxub qhov phem uas kuv lub siab ntshaw ua ntawd. Yog li ntawd tsis tsim nyog Yehauvas pab kuv. Kuv tau lub neej nyuaj heev vim kuv niaj hnub tawm tsam tej uas kuv lub siab ntshaw. . . . Tom qab kuv nyeem zaj hu ua ‘Do You Have “a Heart to Know” Jehovah?’ (Koj Puas Muaj Lub Siab Uas Xav Paub Yehauvas Tiag?) hauv phau The Watchtower lub 3 Hlis tim 15 xyoo 2013 tas, kuv mam li pom tias Yehauvas yeej xav pab kuv tiag tiag.”

14. (1) Puas nyuaj rau Povlauj tswj nws lub siab kom txhob ntshaw tej yam phem? (2) Peb yuav tsum ua li cas peb thiaj tswj tau peb lub siab thiab?

¹⁴ Nyeem Loos 7:21-25. Kuj nyuaj heev rau Povlauj tswj nws lub siab kom txhob ntshaw ua tej yam phem. Tiamsis nws tsis tag kev cia siab. Povlauj paub tias yog nws thov thiab tso siab rau Yehauvas, thiab muaj kev ntseeg rau tus nqe txhiv ces nws yuav kov yeej lub siab uas ntshaw ua phem. Ua li peb ne? Yog peb xyaum Povlauj tus qauv es tso siab plhuav rau Yehauvas thiab muaj kev ntseeg rau tus nqe txhiv, ces peb yuav kov yeej lub siab uas ntshaw ua phem thiab.

15. Yehauvas yuav pab peb thev dhau kev nyuaj siab li cas?

¹⁵ Thaum peb raug kev nyuaj siab, Yehauvas xav kom peb qhia siab rau nws. Yog peb tsev neeg ib tug raug mob raug nkeeg lossis raug lwm yam kev tsis ncaj ncees, peb yuav ua li cas? Peb yuav tau qhia peb tej kev nyuaj siab rau Yehauvas. Taij thov kom Nws txhawb peb txojkev ntseeg ruaj khov thiab kom peb muaj kev xyiv fab teev tiam nws li qub. (Filipi 4:13) Yog peb thov li no ces qhia tias peb yeej tso siab rau Yehauvas tiag. Cov Khixatia coob leej ntau tus, tsis hais cov nyob txheej thaum ub los yog cov uas nyob tiam no, tau pom tias kev thov Vajtswv yeej txhawb tau lawv lub zog thiab pab tau lawv ua siab loj thev dhau kev nyuaj siab. Cia peb xyaum lawv tus qauv thiab.

16, 17. Zaj no txhawb tau koj li cas?

¹⁶ Dab Ntxwg Nyoog xav kom peb qaug zog thiab tso tes es txhob teev tiam Yehauvas. Yog li ntawd, peb yuav tsum “tuav ruaj” yam uas zoo. (1 Thexalaunika 5:21) Yog koj ntseeg ruaj nreeg tias Vajtswv yuav txhawb koj lub dag lub zog, ces koj yuav tawm tsam yeej Xatas thiab nws lub qab ntuj phem xwb xwb li. Tsis tas li ntawd xwb, koj yuav tswj tau lub siab uas ntshaw ua phem.​—2 Khaulee 4:7-9; Kalatia 6:9.

¹⁷ Yog li ntawd, cia li peem kam tiag, txhob tso tes, ua siab ntev thev mus kom txog hnub kawg. Cia peb yeej meem nrog Yehauvas sib ntsuas zog. Yog koj ua li no, koj yeej yuav pom Yehauvas foom koob hmoov “phwj yos ntws lug rau” koj.​—Malakhi 3:10.