Tus tubtxib Povlauj hais tias Yehauvas * yog tus “Vajtswv uas txhawb siab txhua yam. Nws txhawb peb lub siab rau txhua yam kev ceeblaj uas peb raug.” (2 Khaulee 1:3, 4) Yog li ntawd, txawm peb yuav raug kev nyuaj siab loj npaum li cas los xij, Vajtswv yeej nplig tau peb lub siab. Nws pab tau txhua leej txhua tus.

Vajtswv yuav pab peb li cas? Muab ua piv txwv tias yus muaj ib tug mob tiamsis yus tsis teem sijhawm mus cuag kws kho mob, yus puas yuav zoo? Yeej tsis zoo li. Ib yam li ntawd, peb yuav tsum mus cuag Vajtswv nws thiaj yuav pab peb. Tus tub qhe Amau thiaj nug tias: “Yog ob leeg tsis tau teem tseg cia yuav ua ke taug kev tau thiab lov?” (Amau 3:3) Phau Vajlugkub kuj qhia tias: “Cia li txav los ze Vajtswv mas nws yuav los ze nej.”​—Yakaunpau 4:8.

Ua cas peb thiaj ntseeg tau tias Vajtswv yuav txav ze peb? Peb ntseeg tau vim nws twb cog lus ntau zaus lawm tias nws xav pab peb. (Saib  lub ntsiab me.) Tsis tas li ntawd xwb, muaj coob leej ntau tus, tsis hais hauv phau Vajlugkub lossis cov uas nyob tiam no, ua tau timkhawv tias Vajtswv yeej nplig lawv siab tiag.

Vajntxwv Davi yog ib tug uas tau raug ntau yam kev nyuaj siab nws thiaj thov Vajtswv tias: “Thov mloog kuv lub suab taij thov rau thaum kuv thov koj pab.” Vajtswv puas teb Davi? Nws yeej teb! Davi thiaj hais tias: “Kuv tso siab rau nws, kuv thiaj tau kev pab, kuv zoo siab xyiv fab kawg li.”​—Ntawv Nkauj 28:2, 7.

Vajtswv tau txib Yexus ua ntau yam haujlwm. Phau Vajlugkub qhia tias Vajtswv xav kom Yexus ua tus ntaus thawj hlo “mus nplij cov uas lwj siab . . . thiab nplij txhua tus uas quaj ntsuag.” (Yaxaya 61:1, 2) Yexus ua raws nkaus li tej lus uas hais tseg txog nws. Nws nrhiav kev nplig cov “uas ua haujlwm khwv thiab ris lub nra hnyav.”​—Mathai 11:28-30.

Yexus nplig tibneeg li cas? Nws qhuab qhia lawv, ua siab mos siab muag rau lawv, thiab muaj tej lub sijhawm nws kho lawv tej mob. Muaj ib zaug ib tug txivneej mob ruas los thov Yexus tias: “Yog koj xav kho, koj yeej kho tau kuv zoo kom huv.” Nws cov lus ua rau Yexus mob siab heev, Yexus thiaj teb tias: “Kuv xav los maj, cia li zoo kiag huv lauj.” (Malakau 1:40, 41) Tus txivneej tej ruas txawm zoo hlo tamsid.

 Niaj hnub no, Vajtswv tus Tub tsis nyob hauv ntiajteb no lawm. Thaum peb nyuaj siab nws yuav nplig tsis tau peb tim ntsej tim muag. Txawm li ntawd los, nco ntsoov tias nws Txiv Yehauvas yog tus Vajtswv “uas muaj lub siab khuvleej.” (2 Khaulee 1:3) Niaj hnub no, Vajtswv tseem pab cov uas lwj siab. Vajtswv siv 4 yam no los nplig tibneeg.

• Phau Vajlugkub. “Tej uas sau cia yav thaum ub kuj yog sau cia qhuab qhia peb kom Vajtswv txojlus thiaj ua rau peb muaj lub siab ntev thev taus thiab txhawb peb lub zog peb thiaj muaj siab vam.”​—Loos 15:4.

• Vajtswv Lub Hwj Huam Dawb Huv. Tom qab Yexus tuag lub koom txoos Khixatia nyob tau sib haum xeeb. Vim li cas? Vim lawv “tau kev txhawb siab ntawm [lub hwj huam] dawb huv.” (Tubtxib Tes Haujlwm 9:31) Lub hwj huam dawb huv yog Vajtswv lub zog uas loj kawg nkaus. Txawm peb raug kev nyuaj siab li cas los, Vajtswv pub nws lub hwj huam txhawb peb lub zog.

• Kev Thov Vajtswv. Phau Vajlugkub hais kom peb ua li no: “Qhia txhua yam uas koj cheem tsum rau [Vajtswv] paub. Mas Vajtswv txojkev siab tus uas ntau dhau li neeg nkag siab tau yuav tsom kwm nej lub siab thiab nej tej kev xav.”​—Filipi 4:6, 7.

• Cov Kwvtij Nkauj Muam Khixatia yog ib co phoojywg kwvluag zoo uas yuav nplig tau peb lub siab thaum peb raug “kev ceeb laj thiab raug kev tsim txom.”​—Khaulauxi 4:11; 1 Thexalaunika 3:7.

Tej zaum koj xav paub seb 4 yam no yuav nplig tau koj li cas tiag. Cia peb kawm seb tej no pab tau ib txhia li cas thaum lawv poob haujlwm, thaum lub cuab lub yig muaj teeb meem, thaum muaj mob muaj nkeeg, lossis muaj ib siab ob qeg. Koj yuav pom tias Vajtswv yeej zoo ib yam li leej niam uas hlub tshua thiab nplig nws cov menyuam tiag.​—Yaxaya 66:13.