Yeej muaj tej yam uas tib neeg paub hais tias zoo los tsis zoo. Xws li, hais txog kev ua ncaj ua ncees, ua siab dawb siab zoo, thiab txawj hlub tshua txog luag, tej yam ntxwv no coob leej ntau tus qhuas. Tiam sis tej yam xws li tua neeg, yuam luag deev, los sis ua phem ua qias rau tej me nyuam yaus, tej no coob tus suav tias phem kawg nkaus. Hos hais txog tej yam xws li kev ua nkauj ua nraug, coj ncaj, los sis kev cob qhia me tub me nyuam, tej yam no tib neeg xav tias nyias yuav ua raws li nyias xav los sis ua raws li luag ua los yeej tau. Ua li, txoj twg yog txoj uas zoo tshaj?

Ntau zaus ces nyias ua raws li nyias xav tias zoo los sis tsis zoo. (Loos 2:14, 15) Tab txawm yog cov me nyuam yaus los, lawv yeej paub tias tus twg ua ncaj los tsis ncaj. Thiab lawv yeej txawj tu siab thaum lawv ua tej yam yuam kev. Thaum me nyuam loj hlob tuaj, lawv ua raws li lawv kawm ntawm lawv tsev neeg, ntawm lawv lub zej lub zos, thiab ntawm lawv txoj kev ntseeg. Thaum peb yuav ua ib yam twg, peb yuav ua raws li peb ib txwm xav tias yog qhov zoo qhov yog.

Qhov uas peb paub tias qhov twg zoo ua thiab qhov twg tsis zoo ua, pab tau kom peb txawj xav txog luag, ris luag txiaj ntsig, ua ncaj ua ncees, thiab hlub tshua txog lwm tus. Tsis tas li ntawd, qhov no kuj pab kom peb tsis txhob mus ua tej yam uas yuav ua rau peb tsev neeg tu siab, los sis yuav ua rau peb poob ntsej muag los yog ua rau peb xav txog lig.

Thaum peb ua raws li peb lub siab xav, puas zoo tiag? Muaj ib tug txiv neej npe hu ua Nkeliv (Garrick) hais tias thaum nws tseem hluas, nws ua lub neej ywj siab thiab nws xav tias ua lub neej li ntawd yeej zoo  rau nws. Tiam sis thaum kawg nws pom tias yog ib lub neej uas tsaus ntuj nti vim nws mus ua kev phem kev qias, quav dej quav cawv, quav yeeb quav tshuaj, thiab ua nruj ua tsiv.

Ntau zaus, thaum peb ua ib yam dab tsi los peb yeej xav kom luag qhuas peb. Tsis tas li ntawd, tej laus uas noj ntau diav mov dua, lawv tej tswv yim yeej pab tau peb dua. Thiab thaum peb ua haum peb tsev neeg, peb tej npoj, thiab tej neeg zej zog siab ces lawv yuav saib taus peb dua.

Thaum peb ua raws li luag ua, puas zoo tiag? Ib tug poj niam hu ua Pawxilas (Priscila) hais tias thaum nws tseem hluas, nws tej npoj mus ua kev nkauj kev nraug ces nws nrog lawv ua thiab. Tiam sis txawm lawv xav tias tej ntawd tsis phem ua luaj twg los nws pom hais tias nws tsis muaj kev kaj siab li thiab nws tsuas ntsib teeb meem xwb.

Thaum peb yuav ua ib yam dab tsi, peb yeej xav seb qhov twg yog qhov zoo tshaj thiab seb lwm tus yuav xav li cas. Txawm peb twb ua tib zoo xav npaum li no lawm los, tej thaum peb tseem xaiv yuam kev thiab tseem tsim tau teeb meem rau peb thiab lwm leej lwm tus. (Pajlug 14:12) Thiab txawm muaj tej yam tam sim no sawv daws pom tias zoo los lwm hnub txoj kev xav ntawd yuav hloov.

Ua li, puas muaj ib txoj kev uas pab kom peb paub tias qhov twg zoo qhov twg tsis zoo? Thiab puas muaj tej kev cai twg uas tsis yog pab tau peb ib ntus xwb tiam sis yuav pab tau peb mus li?

Yeej muaj kawg. Zaj tom ntej yuav qhia seb peb yuav nrhiav tswv yim qhov twg los pab peb txawj xaiv qhov zoo ntawm qhov phem.