1. Phau Vajlugkub muaj tej kevcai zoo li cas, thiab yog peb mloog yuav pab tau peb li cas?

YEHAUVAS tau muab nws tej kevcai sau cia rau hauv phau Vajlugkub, xwv peb thiaj paub coj raws li nws lub siab nyiam. Nws qhia kom peb txhob teev dab teev mlom, txhob ua tub sab tub nyiag, txhob quav dej quav cawv, lossis ua tej yam qias tsis huv. (1 Khaulee 6:9, 10) Tsis tas li ntawd xwb, Yehauvas tus Tub Yexus sam hwm kom nws cov thwjtim ua li no: “Nej cia li mus coj txhua haiv neeg los ua kuv li thwjtim, thiab muab lawv ua kevcai raus dej hauv leej Txiv, leej tub thiab [lub hwj huam] dawb huv lub npe, thiab qhia kom lawv tuav rawv txhua yam uas kuv tau qhia rau nej lawd. Thiab kuv niaj hnub yuav nrog nraim nej mus txog lub sijhawm kawg.” (Mathai 28:19, 20) Yehauvas cob qhia peb vim nws xav kom peb paub ua neej. Nws tej kevcai qhia kom peb saib xyuas peb lub cuab lub yig, kom peb paub tu peb tus kheej xwv peb thiaj noj qab nyob zoo thiab muaj kev kaj siab. Yog peb mloog Yehauvas tej lus sam hwm, xws li kom mus tshaj tawm txoj xov zoo ces nws yuav txaus siab thiab foom koob hmoov rau peb.

2, 3. (1) Hauv phau Vajlugkub, ua cas Yehauvas ho tsis tsa kevcai los tswj txhua yam uas peb ua? (2) Hauv zaj no peb yuav teb cov lus nug twg? (Saib daim duab ntawm sab no.)

² Hauv phau Vajlugkub, Yehauvas puas tsa kevcai los tswj txhua yam uas peb ua hauv peb lub neej? Yehauvas tsis ua li ntawd. Vim  li cas? Vim Yehauvas paub tias yog phau Vajlugkub tswj txhua yam uas peb ua, ces cov nqe Vajlugkub uas sau yav thaud yuav tsis phim tiam peb nyob no lawm thiab. Muab xav rau tej ris tsho uas peb hnav. Tsis muaj ib nqe Vajlugkub uas qhia meej meej tias peb yuav tsum hnav li cas. Zoo uas phau Vajlugkub tsis tsa kevcai li ntawd, vim ib tiam dhau ib tiam neeg tej tsoos yeej hloov tas zog, tus yuav hnav li cas los muaj. Phau Vajlugkub kuj tsis tswj tias peb yuav tsum xaiv tej haujlwm zoo li cas, lossis peb yuav noj haus li cas peb thiaj noj qab nyob zoo. Ntsig txog tej no, Yehauvas cia peb nyias mam txiav txim siab rau nyias tus kheej, thiab tus txiv tsev mam li txiav txim siab rau nws tsev neeg.

³ Yog li ntawd, thaum peb yuav txiav txim siab ua ib yam dabtsi, es tsis muaj ib nqes Vajlugkub uas hais tsi ntsees rau yam ntawd, peb yuav tsum xav txog cov lus nug no: ‘Yehauvas xav li cas txog qhov uas kuv txiav txim siab ua ntawd? Yehauvas puas txaus siab rau txhua yam uas kuv ua, tsuav tsis hla phau Vajlugkub tej kevcai xwb? Yuav ua li cas kuv thiaj paub tias Yehauvas txaus siab rau tej uas kuv txiav txim siab ua tiag?’

4, 5. Tej uas peb txiav txim siab ua yuav raug peb thiab raug lwm tus li cas?

⁴ Ib txhia xav tias lawv yuav ua ywj siab li cas los tau. Tiamsis peb xav ua kom haum Yehauvas siab. Ua ntej peb txiav txim siab ua ib yam dabtsi, peb yuav tsum xav seb phau Vajlugkub hais li cas ces ua raws li ntawd. Xws li phau Vajlugkub qhia meej tias Yehauvas tsis pub peb noj ntshav. Yog li, peb yeej coj raws li txoj kevcai ntawd. (Chiv Keeb 9:4; Tubtxib Tes Haujlwm 15:28, 29) Peb yuav tsum thov kom Yehauvas pab peb ua tej yam uas haum nws siab.

⁵ Tej uas peb txiav txim siab ua yuav pab tau kom peb txav ze rau Yehauvas lossis yuav rhuav peb txojkev nrog nws sib raug zoo. Yog peb coj tsis zoo los kuj raug lwm tus thiab. Peb tsis xav txo peb cov kwvtij nkauj muam txojkev ntseeg. Tsis tas li xwb, peb tsis xav tsim teeb meem hauv lub koom txoos. Yog li ntawd, tseem ceeb uas peb ua tib zoo xav ua ntej peb txiav txim siab ua ib yam dabtsi.​—Nyeem Loos 14:19; Kalatia 6:7.

6. Peb yuav tsum ua li cas peb thiaj txiav txim siab tau zoo?

⁶ Yog phau Vajlugkub tsis qhia tsi ntsees rau yam uas peb txiav txim siab ua, peb yuav ua li cas? Tsis yog peb yuav lam txiav txim siab raws li peb nyiam ua xwb. Tsim nyog peb ua tib zoo xav txog peb lub neej, es txiav txim siab ua yam uas Yehauvas nyiam. Yog peb ua li ntawd ces thaum kawg peb yuav tau zoo.​—Nyeem Ntawv Nkauj 37:5.

7. Yog tsis muaj ib txoj kevcai qhia tsi ntsees txog yam uas peb xav ua, yuav ua li cas peb thiaj paub ua haum Yehauvas siab?

⁷ Yog phau Vajlugkub tsis muaj ib txoj kevcai uas qhia tsi ntsees txog yam uas peb xav ua, yuav ua li cas peb thiaj paub ua haum Yehauvas siab? Efexau 5:17 hais tias peb “yuav tsum nkag siab tias dabtsi yog Vajtswv lub siab nyiam.” Yuav ua li cas peb thiaj nkag siab li ntawd? Peb yuav tsum thov Vajtswv thiab cia nws lub hwj huam coj peb txoj hau kev.

8. Ua cas Yexus thiaj paub zoo txog tej uas Yehauvas xav kom nws ua? Piav txog tus qauv.

⁸ Yexus paub zoo txog tej uas Yehauvas xav kom nws ua. Muaj 2 zaug uas tibneeg coob heev raws Yexus qab. Thaum lig lawd, cov tibneeg tshaib plab heev. Yexus ua li cas xwb? Nws thov Vajtswv ua ntej, ces mam li ua txujci pub zaub mov rau lawv noj. (Mathai 14:17-20; 15:34-37) Tiamsis thaum Yexus yoo mov tau 40 hnub hauv tebchaws moj sab qhua, Ntxwg Nyoog kom Yexus ua txujci muab pob zeb hloov ua ncuav noj. Yexus ho ua li cas xwb? Zaum no nws tsis kam ua txujci. (Nyeem Mathai 4:2-4.) Yexus paub tias Yehauvas tsis xav kom nws siv lub hwj huam dawb huv los ua txujci ywj siab. Yexus kuj tso siab tias nws  Txiv yuav coj nws txoj hau kev thiab yuav tsis cia nws tuag tshaib. Yexus paub Yehauvas zoo heev.

9, 10. Yuav ua li cas peb thiaj muaj tswvyim txiav txim siab zoo? Muab ua lus piv txwv.

⁹ Yog peb cia Yehauvas coj peb txoj hau kev ib yam li Yexus, ces peb yuav muaj tswvyim txiav txim siab zoo. Phau Vajlugkub hais tias: “Koj cia li tso siab plhuav rau [Yehauvas] kawg siab kawg ntsws, koj tsis txhob vam khom koj li kev txawj ntse. Cia li lees yuav nws rau txhua txojkev uas koj mus, mas nws yuav pub koj taug txojkev ncaj. Tsis txhob xav hais tias koj txawj ntse. Cia li hwm thiab paub ntshai [Yehauvas] thiab tig hlo ntawm txojkev phem.” (Paj Lug 3:5-7) Yog peb kawm Vajlugkub ces peb yuav paub Yehauvas zoo dua qub. Txawm tsis muaj ib txoj kevcai qhia txog yam uas peb xav ua los, peb yuav paub ua haum nws siab. Peb yimhuab kawm ces peb yimhuab muaj “lub siab uas mloog [Vajtswv] lus.”​—Exekhee 11:19, TMZ.

¹⁰ Muab ua piv txwv li no: Ib tug pojniam uas muaj txiv lawd mus yos khw. Nws pom ib nkawm khau zoo nkauj heev tiamsis kim kawg li. Txawm nws tus txiv tsis nrog nws ua ke los, nws paub tias yog nws yuav nkawm khau ntawd, nws tus txiv yuav chim heev rau nws. Ua cas nws thiaj paub li ntawd? Vim nkawd twb sib yuav tau ntau xyoo lawm. Nws paub tias nws tus txiv nyiam txuag nyiaj. Ib yam li ntawd, yog peb paub zoo tias Yehauvas ib txwm coj li cas nrog nws haiv neeg, ces peb yuav paub txog tej uas Yehauvas nyiam thiab tsis nyiam.

11. Thaum peb kawm Vajlugkub, peb yuav tau xav txog cov lus nug twg? (Saib lub ntsiab me “ Thaum Kawm Vajlugkub, Xav Li No.”)

¹¹ Yuav ua cas peb thiaj paub Yehauvas txojkev xav? Peb yuav tsum nyeem thiab kawm phau Vajlugkub tsis tseg. Thaum peb kawm,  xav li no: ‘Zaj no qhia kuv li cas txog Yehauvas? Ua cas Yehauvas ho txiav txim li ntawd?’ Thiab cia peb xyaum Davi es thov Yehauvas li no: “Au [Yehauvas], thov ua rau kuv paub koj txojkev, thov qhia koj tej kev rau kuv paub taug. Thov koj coj kuv taug koj txojkev tseeb thiab qhuab qhia kuv vim koj yog tus Vajtswv uas cawm kuv dim. Kuv tos rawv koj tas hnub tas hmo.” (Ntawv Nkauj 25:4, 5) Thaum peb kawm tau tej yam tshiab txog Yehauvas, xav li no: Tej no pab tau kuv tsev neeg li cas? Pab tau kuv tom chaw ua haujlwm, tom tsev kawm ntawv, thiab thaum mus qhia Vajlugkub li cas? Yog peb muab ua tib zoo xav li no, ces tsis yog peb yuav paub txog Yehauvas xwb, tiamsis yuav paub muab nws lub tswvyim los siv hauv peb lub neej.

12. Tej ntaub ntawv Vajlugkub thiab cov kev sib txoos yuav pab peb li cas?

¹² Yog peb xav paub Yehauvas txojkev xav, zoo rau peb cuab pob ntseg mloog thaum Yehauvas lub koom haum muab Vajlugkub los qhia peb. Lub koom haum twb npaj ntau yam twj xws li phau ntawv Yehauvas Cov Timkhawv Phau Ntawv Tshawb Nrhiav Vajlugkub lossis Lub Vej Xaij Tshawb Nrhiav Vajlugkub. Ua ntej peb txiav txim siab ua ib yam dabtsi, peb yuav tau siv tej twj no los tshawb nrhiav seb Yehauvas xav li cas. Lub koom haum kuj npaj cov kev sib txoos los pab peb thiab. Yog peb ua zoo mloog tej lus qhuab qhia, tsa tes teb, thiab muab tej uas peb kawm coj los ua zoo xav, ces peb yuav paub tej uas Yehauvas nyiam. Thaum kawg peb yuav txawj txiav txim siab raws li Yehauvas pom zoo ces nws yuav foom koob hmoov rau peb.

13. Piav seb Yehauvas lub tswvyim pab tau kom peb txawj txiav txim siab li cas.

¹³ Yog peb ua zoo xav txog Yehauvas ua ntej peb txiav txim siab ua ib yam dabtsi, yuav pab tau peb li cas? Muab xav li no: Koj tabtom txiav txim siab seb koj puas yuav ua tau ib tug tho kev. Koj twb hloov ntau yam hauv koj lub neej, xwv thiaj muaj sijhawm mus tshaj tawm. Tiamsis koj kuj txhawj tsam koj tu ncua nyiaj txiag tsis txaus siv li qub lawm. Koj yeej paub tias phau Vajlugkub tsis tau qhia kom yuav tsum ua ib tug tho kev thiaj haum Yehauvas siab. Yog koj xav tshaj tawm li qub los yeej tau, tiamsis koj nco Yexus cov lus tias Yehauvas yuav foom koob hmoov rau cov uas tso ntau yam tseg los txhawb lub Nceeg Vaj. (Nyeem Luka 18:29, 30.) Tsis tas li ntawd xwb, phau Vajlugkub qhia tias Yehauvas txaus siab heev thaum peb siv tag nrho peb lub dag lub zog los qhuas nws. Yehauvas tsuas xav kom peb muaj kev xyiv fab teev tiam nws xwb. (Ntawv Nkauj 119:108; 2 Khaulee 9:7) Yog peb thov Yehauvas thiab muab tej no los luj zoo zoo, ces peb yuav xaiv tau yam uas haum peb thiab Yehauvas yuav foom koob hmoov rau peb.

14. Thaum xaiv tej tsoos tsho, peb yuav xav txog Yehauvas ua ntej li cas?

¹⁴ Cia peb muab xav li no thiab: Muaj ib hom tsoos tsho uas koj nyiam heev. Hauv lub koom txoos ib txhia tsis nyiam tej tsoos zoo li ntawd. Koj paub tias tej tsoos ntawd tsis hla Vajlugkub tej kevcai, tiamsis Yehauvas xav kom koj txiav txim siab li cas? Phau Vajlugkub qhia li no: “Cov pojniam yuav tsum ua tib zoo hnav tsoos kom phim thiab tsim nyog, tsis txhob ntxias plaubhau lossis coj kub coj qe qwj muaj nqes lossis hnav tej tsoos tsho kim kim, tiamsis tu lub cev rau qhov uas ua haujlwm zoo kom tsim nyog ib tug pojniam uas hais tias nws hwm Vajtswv.” (1 Timaute 2:9, 10) Cov lus no yog sau rau pojniam txivneej huvsi. Nqe Vajlugkub no siv lo lus “phim” tiamsis thaum xub sau nqe no ua lus Kili, luag siv ib lo lus uas txhais tias yuav tsum hwm thiab paub xav txog lwm tus. Yog peb coj li nqe Vajlugkub ntawd ces peb yuav paub xaiv tej tsoos uas tsis ua rau ib tug twg xav yuam kev. (1 Khaulee 10:23, 24; Filipi 3:17) Yog peb xav txog phau Vajlugkub thiab xav txog Yehauvas ua ntej peb txiav txim siab ua ib  yam dabtsi, ces peb yuav ua tau haum Vajtswv siab.

15, 16. (1) Yog peb pheej xav txog kev nkauj kev nraug, puas haum Yehauvas siab? (2) Yuav ua li cas peb thiaj paub xaiv tej kev lomzem uas haum Yehauvas siab? (3) Yog peb yuav txiav txim siab ua ib yam tseem ceeb heev, peb yuav nrhiav kev pab li cas?

¹⁵ Phau Vajlugkub pab kom peb pom tias Yehauvas txawj tu siab thaum peb ua phem lossis xav txog tej yam phem. (Nyeem Chiv Keeb 6:5, 6.) Yehauvas tsis xav kom peb xav txog kev nkauj kev nraug thiab tej yam qias tsis huv. Yog peb pheej xav txog tej yam zoo li ntawd ces thaum kawg peb yuav mus ua tej ntawd. Yehauvas thiaj sam hwm kom peb xav txog tej yam zoo uas dawb huv xwb. Yakaunpau hais tias Yehauvas lub tswvyim “dawb huv, thiab ua kom nyob sib [haum] xeeb, ua siab zam xeeb, yoojyim hais lus, muaj txojkev khuvleej puv npo thiab ua tau txhua yam haujlwm zoo, tsis saib leejtwg ntsej muag thiab tsis ua siab nkhaus.” (Yakaunpau 3:17) Yog li ntawd, phau Vajlugkub qhia kom peb txhob saib lossis koom nrog tej kev lomzem uas ntxias tau yus lub siab mus ntshaw tej yam qias tsis huv. Yog peb paub meej lawm tias Yehauvas nyiam yam twg ntxub yam twg, ces peb yuav txawj xaiv tej ntaub ntawv zoo los nyeem, tej yeeb yaj kiab zoo los saib, thiab tej nkees (video games) zoo los ua si xwb. Peb tsis tas nug lwm tus tias yam twg zoo yam twg phem.

¹⁶ Thaum peb txiav txim siab ua ib yam dabtsi, kuj muaj ntau lub tswvyim uas tsis hla Yehauvas txojcai los pab peb. Peb yuav tau xaiv lub tswvyim uas haum peb. Tiamsis yog yam uas peb txiav txim siab ua ntawd tseem ceeb heev, zoo rau peb tawm tswvyim nrog cov txwj laus lossis ib tug Khixatia uas paub tab. (Titau 2:3-5; Yakaunpau 5:13-15) Tsis yog lawv yuav ua tus xaiv rau peb. Tiamsis peb yuav tsum ua tib zoo xav seb phau Vajlugkub hais li cas, peb mam li ua tus txiav txim siab. (Henplais 5:14) Povlauj thiaj sau tias: “Txhua tus nyias yuav tsum ris nyias lub nra.”​—Kalatia 6:5.

17. Yog peb siv Vajtswv lub tswvyim thiab phau Vajlugkub los pab peb txiav txim siab, yuav pab tau peb li cas?

¹⁷ Thaum peb xaiv ua yam uas haum Yehauvas siab, peb yuav hajyam nrog Nws sib raug zoo. Yehauvas yuav txaus siab thiab foom koob hmoov ntxiv rau peb. (Yakaunpau 4:8) Qhov no yuav ua rau peb hajyam muaj kev ntseeg rau Yehauvas. Yog li ntawd, cia peb ua tib zoo xav txog tej uas peb nyeem hauv phau Vajlugkub, peb thiaj paub seb Yehauvas nyiam li cas. Tsis muaj ib hnub uas peb yuav paub txhua yam txog Yehauvas. (Yauj 26:14) Tiamsis yog peb rau siab ntso kawm tamsim no, Yehauvas yuav tsav tswvyim rau peb kom peb txawj txiav txim siab zoo. (Paj Lug 2:1-5) Tibneeg tej tswvyim tsuas pom hloov tas zog xwb, tiamsis phau Vajlugkub qhia tias “tej uas [Yehauvas] npaj cia yuav nyob mus ib txhis, tej uas nws xav cia hauv lub siab yuav nyob mus rau txhua tiam neeg.” (Ntawv Nkauj 33:11) Yog li ntawd, yog peb muaj Yehauvas lub tswvyim ces peb yuav txawj txiav txim siab thiab yuav ua tau haum nws siab.