Hauv tebchaws Armenia [a·me·nia] muaj ib tug pojniam uas yog ib tug tshaj tawm tsis tau raus dej hu ua Haykanush [hai·ka·nus]. Nws khaws tau ib phau ntawv hla ciam teb (passport) nyob ze nws tsev. Phau ntawv muaj nyiaj ntau heev thiab muaj ob peb daim debit nyob rau hauv. Nws thiaj nqa los qhia rau nws tus txiv. Nws tus txiv kuj yog ib tug tshaj tawm tsis tau raus dej thiab.

Nkawd ob niam txiv muaj nuj nqes ntau heev. Txawm li ntawd los, nkawd txiav txim siab tias nkawd yuav xa phau ntawv thiab cov nyiaj uas nkawd nrhiav tau rov mus rau tus tswv. Thaum nkawd ntsib tus txivneej uas muab phau ntawv ua poob, nws tsev neeg puavleej xav tsis thoob li. Haykanush thiab nws tus txiv thiaj piav tias nkawd tab tom kawm Vajlugkub, nkawd thiaj xyaum coj ncaj li phau Vajlugkub qhia. Nkawd kuj muab ib co ntawv Vajlugkub rau tsev neeg ntawd thiab qhia lawv txog Yehauvas Cov Timkhawv.

Tsev neeg ntawd xav muab mentsis nyiaj pub Haykanush ua nws tsaug, tiamsis nws tsis kam txais. Hnub tom qab, tus txivneej ntawd tus pojniam thiaj tuaj saib Haykanush nkawd ob niam txiv tom tsev. Tus pojniam xav kom nkawd paub tias nws nco nkawd txiaj ntsig heev, nws thiaj tseev kom Haykanush cia li txais ib lub nplhaib qe zeb iav.

Coob leej ntau tus yeej xav tsis thoob li thaum luag tej coj ncaj li Haykanush nkawd ob niam txiv. Tiamsis Yehauvas xav li cas? Yehauvas puas txaus siab uas nkawd coj ncaj li ntawd? Puas tsim nyog nkawd coj ncaj tiag?

Yehauvas yeej txaus siab heev thaum tibneeg coj ncaj li Haykanush nkawd ob niam txiv. Tibneeg saib nyiaj saib kub thiab tej qe zeb iav muaj nqes heev. Tiamsis Yehauvas suav tias qhov uas peb taug rawv Nws tus qauv tseem muaj nqes dua tej ntawd huvsi. (Yaxaya 55:8, 9) Yehauvas cov tub qhe kuj pom tias qhov uas lawv coj li Yehauvas yeej muaj nqes dua thiab.

Ua li cas peb thiaj paub tias Yehauvas yeej saib qhov uas peb xyaum coj li nws muaj nqes dua tej nyiaj tej kub? Cia peb kawm seb Yehauvas xav li cas txog tus neeg muaj tswvyim uas thoob tsib to nrog. Paj Lug 3:13-15 hais tias: “Tus uas nrhiav tau tswvyim thiab txawj nkag siab mas kaj siab lug, rau qhov tswvyim muaj nqes dua nyiaj txiag thiab muaj tshaj thawj dua kub. Tswvyim tsim txiaj dua npauj nyiaj npauj kub, thiab txhua yam uas koj ntshaw tsis muaj ib yam zoo cuag li tswvyim.” Cov Vajlugkub no qhia peb tias Yehauvas suav qhov uas ua neeg muaj tswvyim thiab thoob tsib to nrog muaj nqes dua tej nyiaj tej kub tiag.

Qhov uas peb muaj tswvyim thiab ua neeg thoob tsib muaj nqes heev rau Yehauvas. Ua cas peb thiaj paub tias Yehauvas saib qhov uas peb coj ncaj muaj nqes thiab?

Yehauvas yog ib tug Vajtswv uas nyiam coj ncaj xwb. Nws “tsis txawj dag.” (Titau 1:2) Nws thiaj tshoov Povlauj sau li no mus rau cov Khixatia Henplais: “Cia li thov Vajtswv pab peb, vim peb ruaj siab tias peb muaj lub siab dawb paug, xav xyaum zoo rau txhua fab.”—Henplais 13:18.

Yexus Khetos yog ib tug uas nyiam coj ncaj. Nws tau coj ncaj li cas? Thaum tus tuam pov thawj hlob Khayafa hais rau Yexus tias: “Kuv cia koj tuav Vajtswv uas muaj txojsia nyob lub npe twv hais rau peb tias koj yog tus Khetos uas yog Vajtswv tus tub los tsis yog.” Yexus teb li cas? Txawm lub Xaheree yuav liam tias nws hais lus tuam mom Vajtswv thiab yuav nrhiav kev tua nws  los, nws tsis dag los cawm nws txojsia tiamsis nws yeej qhia tseeb tias nws yog tus Mexiyas tiag.​—Mathai 26:63-67.

Ua li peb ne? Yog peb yuav tsum dag kom peb tau noj, peb puas yuav yeem dag? Los peb yuav coj ncaj?

Phau Vajlugkub hais tias cov neeg nyob rau tiam kawg “yuav xam pom lawv tus kheej” thiab “ntshaw nyiaj txiag” xwb. (2 Timaute 3:2) Muaj raws li ntawd tiag. Thaum nyuaj khwv noj khwv haus thiab nyuaj nrhiav haujlwm lawd, feem coob yeej tsis ntshai dag noj dag haus lossis ua tub sab tub nyiag. Ib txhia thiaj hais tias yog yus tsis dag, ces yus tsis tau noj xwb. Cov Khixatia ib txhia kuj tau ua yuam kev li no lawm thiab. Thaum kawg lawv thiaj muaj npe tsis zoo hauv lub koom txoos.​—1 Timaute 3:8; Titau 1:7.

Tiamsis cov Khixatia feem coob yeej xyaum coj ncaj li Yexus. Lawv paub tias qhov uas lawv xyaum zoo ib yam li Vajtswv muaj nqes dua nyiaj thiab kub huvsi. Twb yog vim li ntawd, tej tub ntxhais hluas Khixatia thiaj tsis kam dag thaum xeem ntawv hauv tsev kawm ntawv. (Paj Lug 20:23)  Nco ntsoov tias tsis yog txhua zaus uas yus coj ncaj es luag yuav pub nqe zog rau yus zoo li luag tau pub rau Haykanush. Tiamsis yog peb coj ncaj ces peb lub siab yuav tsis nkaug peb. Qhov ntawd muaj nqes dua nyiaj thiab kub tiag.

Muaj ib tug hu ua Gagik [nkas·nkej] uas tau ua li ntawd. Nws hais tias: “Ua ntej kuv tsis tau yog ib tug Khixatia, kuv ua haujlwm rau ib lub koom haum loj heev. Tus los pav tsis kam qhia tias nws ua luam tau tshaj thawj li cas, xwv nom tswv thiaj tsis sau se ntau. Kuv yog tus saib xyuas haujlwm, yog li ntawd lawv xav kom kuv muab nyiaj xiab tus neeg sau se, xwv lub koom haum thiaj tsis raug nplua. Vim kuv ua li ntawd, kuv tau lub npe ua neeg dag noj dag haus. Tiamsis thaum kuv kawm tau qhov tseeb, kuv tsis kam ua li ntawd lawm. Txawm lawv them nyiaj zoo rau kuv los, kuv tsis kam ua. Kuv thiaj mus qheb dua kuv ib lub tsev haujlwm. Thaum kuv pib dua tshiab, kuv yeej them se thiab ua txhua yam raws kevcai.”​—2 Khaulee 8:21.

Gagik hais tias: “Cov nyiaj uas kuv khwv tau los tsuas npaum li kuv txoj haujlwm qub ib nrab xwb. Yog li ntawd nyuaj heev rau kuv khwv txaus kuv tsev neeg siv. Tiamsis tamsim no kuv zoo siab dua. Kuv lub siab tsis nkaug kuv, kuv thiaj kaj siab teev tiam Yehauvas. Kuv tso tau ib tug qauv zoo rau kuv 2 tug tub xyaum, thiab kuv tseem tuav tau haujlwm hauv lub koom txoos. Nimno cov neeg sau se thiab cov uas kuv ua luam nrog puavleej paub tias kuv yog ib tug neeg uas nyiam coj ncaj xwb.”

Yehauvas yeej hlub tshua cov tibneeg uas xyaum coj ncaj thiab coj zoo ib yam li nws. (Titau 2:10) Thaum peb xyaum li ntawd, Yehauvas cog lus tias nws yuav pab peb. Nws thiaj tshoov kom Vajntxwv Davi hais li no: “Kuv txeev hluas, nimno laus lawm, kuv ciav tsis tau pom ib tug ncaj ncees raug muab tso tseg, lossis pom nws tej tub ki thov khawv.”​—Ntawv Nkauj 37:25.

Luv tus qauv qhia tias muaj tseeb raws li Davi tau sau tseg. Luv tsis kam tso nws niam pog Na-aumi tseg vim Na-aumi laus heev lawm. Luv nrog Na-aumi khiav mus nyob tebchaws Yixayee, nws thiaj tau pe hawm tus tseem Vajtswv. (Luv 1:16, 17) Luv yog ib tug pojniam uas coj ncaj thiab nquag heev. Nws ua raws li Mauxe Txoj Kevcai es rau siab ntso mus xawb teb los yug nkawd. Yehauvas yeej tsis pub nkawd tu pluas li. (Luv 2:2-18) Yehauvas tsis yog pub kom Luv muaj noj muaj haus xwb, tiamsis Nws tseem cia Luv ua Vajntxwv Davi thiab tus Mexiyas pog koob thiab!​—Luv 4:13-17; Mathai 1:5, 16.

Yeej nyuaj heev rau Yehauvas cov tub qhe ib txhia khwv txaus noj txaus siv. Txawm li ntawd los, lawv tsis nrhiav kev los dag noj dag haus, tiamsis lawv siv zog ua haujlwm. Lawv ua li ntawd rau qhov lawv pom tias qhov uas coj zoo ib yam li Vajtswv, muaj nqes dua tej nyiaj tej kub.​—Paj Lug 12:24; Efexau 4:28.

Ib yam li Luv, cov Khixatia thoob ntiajteb tso siab plhuav tias Yehauvas muaj hwjchim pab tau lawv. Lawv tso siab rau Yehauvas cov lus no: “Kuv yuav tsis ncaim koj thiab yuav tsis tso koj tseg kiag li.” (Henplais 13:5) Yehauvas niaj hnub qhia tias nws muaj hwjchim pab tau cov uas coj ncaj rau txhua fab. Nws ib txwm ua raws li nws tau cog tseg tias Nws yuav pub txhua yam uas peb cheem tsum rau peb.​—Mathai 6:33.

Yog li ntawd, txawm tibneeg saib tej qe zeb iav tej npauj nyiaj npauj kub rau nqe heev los, peb Leej Txiv Yehauvas suav tias lub siab uas coj zoo coj ncaj coj haum Yehauvas siab, muaj nqes tshaj tej ntawd ob peb npaug!