Tau tsis ntev no muaj ntau phau ntawv tawm tshiab txog cov tub txawg tub ntse uas tsis ntseeg tias muaj vajtswv. Cov ntawv no ua rau coob leej sib cav sib ceg. David Eagleman yog ib tug uas tshawb fawb txog lub hlwb, nws hais tias thaum tibneeg nyeem cov ntawv ntawd ua rau lawv xav yuam kev tias cov tub txawg tub ntse twb paub txhij paub txhua txog lub qab ntuj khwb no lawm. Nws hais tias tsim nyog cov tub txawg tub ntse muaj lub siab nthuav ntxeev kawm txog ntau yam, rau qhov twb muaj ntau zaus uas lawv xav yuam kev lawm.

Ib tiam dhau ib tiam, tej tub txawg tub ntse kawm tau tej yam txawv heev thaum lawv tshawb nrhiav txog lub qab ntuj khwb. Ib co kuj yuam kev deb heev lawm thiab. Zoo li tus yawg Isaac Newton uas yog ib tug tub txawg tub ntse nto moo heev. Nws yog tus tshawb pom tias lub zog gravity rub thiab nqus kom txhua lub hnub qub thiab lub ntiajteb nyias nyob nyias chaw. Nws kuj tsim txojkev suav lej hu ua calculus, uas pab kom muaj tej koos pis tawj, tej dav hlau mus saum hli, thiab lwm yam kev kawm txog lub qab ntuj khwb no. Txawm nws ntse npaum li ntawd los nws kuj yuam kev thiab. Thaum ub nws tshawb nrhiav seb txojkev saib hnub qub thiab ua yees siv puas hloov tau txhuas thiab hlau mus ua kub.

Muaj ib tug yawg Kili tshawb txujci hu ua Ptolemy uas nyob 1,500 xyoo ua ntej Newton. Thaum ntawd tsis tau muaj koob tsom hnub qub, tiamsis nws muaj peev xwm teev cia seb thaum hmo ntuj tej hnub qub txawv txav li cas. Nws kuj yog ib tug kws tsim tej ntawv qhia kev. Txawm tias nws txawj npaum li ntawd los nws ntseeg tias tag nrho cov hnub qub saum nruab ntug kiv puag ncig lub ntiajteb no. Tus yawg Carl Sagan uas tshawb fawb seb tej hnub qub xeeb los li cas, hais tias tibneeg ntseeg yuam kev li Ptolemy qhia tau 1,500 xyoo diam. Yog li ntawd, txawm ib tug neeg ntse npaum li cas los yeej qhia tau yuam kev thiab.

Niaj hnub no tseem nyuaj qees rau tej tub txawg tub ntse. Puas muaj leejtwg yuav tshawb tau kom paub txhij paub txhua txog lub qab ntuj khwb no? Cov tub txawg tub ntse yeej kawm tau ntau yam uas pab tau noob neej. Tiamsis kev kawm txuj kawm ci tseem tu ncua ntau yam. Tus yawg hu ua Paul Davies thiaj hais tias tsis muaj leejtwg yuav piav tau txhij txhua tias lub qab ntuj no rhawv tsim los li cas, vim neeg tej tswvyim tsis sib thooj. Muaj tseeb li ntawd tiag, neeg tsis muaj peevxwm paub txhua yam txog lub qab ntuj no. Thaum tibneeg khav tias kev kawm txuj kawm ci piav tau txhua yam txog lub qab ntuj no, tsis txhob maj ntseeg tiamsis muab luj zoo zoo tso.

Phau Vajlugkub hais li no txog lub qab ntuj no: “Tej no tsuas yog [Vajtswv] tej haujlwm sab nraum phij sam xwb, peb hnov txog nws yog lub suab sib ntxhi me me xwb.” (Yauj 26:14) Tseem tshuav ntau yam uas neeg tsis nkag siab. Yeej muaj tseeb li tus tubtxib Povlauj tau sau 2,000 xyoo dhau los tias: “Au Vajtswv muaj txhua yam nplua mias. Nws lub tswvyim thiab kev txawj ntse nyob tob kawg. Tej uas Vajtswv txiav txim siab mas paub tsis tag, thiab nws tej kev mas tshuaj tsis tau.”​—Loos 11:33.