Lukas Sau 1:1-80
1 The-aufilas tus uas sawv daws hwm, kuv sau zaj no tuaj rau koj. Muaj coob leej taug qab txog zaj no thiab muab sau tseg cia lawm. Peb ntseeg tias zaj no yeej muaj tseeb tiag.
2 Cov neeg uas tau pom tej xwm no thaum pib muaj los thiab tshaj tawm Vajtswv txoj xov zoo yog cov ua tim khawv rau peb txog tej no.
3 Yawg hlob The-aufilas, kuv thiaj txiav txim siab taug zaj no pib tom hauv paus tuaj kom paub tseeb. Kuv muab sau tib si tuaj rau koj,
4 xwv koj thiaj paub txhij paub txhua txog zaj no thiab tso siab rau tej uas luag twb qhia rau koj lawd.
5 Thaum Helauj* ua vaj ntxwv kav teb chaws Yudias, muaj ib tug pov thawj hu ua Xekhaliyas uas yog Anpiyas pab. Nws tus poj niam hu ua Elixanpes uas yog Aloos caj ces.*
6 Vajtswv pom tias Xekhaliyas thiab Elixanpes nkawd ua lub neej ncaj ncees raws li Vajtswv Yehauvas* tej kev cai txhua nqe, tsis muaj chaw thuam li.
7 Tiam sis nkawd tsis muaj ib tug me nyuam li rau qhov Elixanpes xeeb tsis taus tub thiab nkawd kuj laus heev lawm.
8 Thaum txog caij rau Anpiyas pab los ua hauj lwm hauv Vajtswv lub tuam tsev, Xekhaliyas thiaj tau ua pov thawj tes hauj lwm rau Vajtswv.
9 Nws raug xaiv los ua tus muab hmoov tshuaj tsw qab hlawv hauv Vajtswv Yehauvas* lub tuam tsev, raws li cov pov thawj ib txwm ua.
10 Lub sij hawm tab tom hlawv hmoov tshuaj tsw qab ntawd, ib tsoom neeg tuaj nyob sab nraud thov Vajtswv.
11 Vajtswv Yehauvas* tus tub txib saum ntuj tshwm plaws ntawm lub thaj* sab xis rau Xekhaliyas pom.
12 Thaum Xekhaliyas pom dheev tus tub txib saum ntuj, nws poob siab nthav ntshai kawg li.
13 Tiam sis tus tub txib saum ntuj hais rau nws tias, “Xekhaliyas, txhob ntshai. Vajtswv twb hnov koj tej lus taij thov nws lawm. Koj tus poj niam Elixanpes yuav yug ib tug tub rau koj mas koj yuav tsum muab nws lub npe hu ua Yauhas.
14 Koj yuav zoo siab xyiv fab kawg li thiab thaum yug tau nws lawm, ib tsoom neeg yuav nrog koj zoo siab
15 rau qhov nws yuav yog ib tug neeg tseem ceeb heev rau Vajtswv Yehauvas.* Tiam sis nws yuav tsum tsis txhob haus cawv txiv hmab los sis cawv ntxwg hlo li. Vajtswv lub hwj huam dawb huv yuav kav nws hauv plab los.
16 Nws yuav coj coob tus Ixayees rov los cuag lawv tus Vajtswv Yehauvas.*
17 Tsis tas li ntawd, Vajtswv yuav txib koj tus tub mus ua Nws ntej. Koj tus tub yuav muaj Eliyas lub siab* thiab muaj hwj chim li Eliyas. Nws yuav pab kom leej txiv hloov dua siab tshiab ib yam li tej me nyuam yaus, thiab kom cov neeg tawv ncauj muaj tswv yim ib yam li cov neeg ncaj ncees, kom tag nrho ib tsoom neeg npaj txhij tos Vajtswv Yehauvas.”*
18 Xekhaliyas teb tus tub txib saum ntuj tias, “Puas yuav muaj tau li no tiag? Vim kuv poj niam wb twb laus heev lawm.”
19 Tus tub txib saum ntuj teb tias, “Kuv yog Kali-ees, tus uas nyob ntawm Vajtswv xub ntiag. Vajtswv txib kuv los tshaj tawm txoj xov zoo no rau koj.
20 Tiam sis vim koj tsis ntseeg kuv tej lus, koj yuav hais tsis tau lus mus txog thaum tej no muaj tshwm sim. Thaum txog sij hawm kuv tej lus yeej yuav muaj tiav.”
21 Thaum ntawd cov tib neeg tseem nyob sab nraud tos Xekhaliyas. Lawv xav tsis thoob ua cas nws yuav nyob ntev ua luaj hauv lub tuam tsev.
22 Thaum nws tawm los, nws hais tsis tau lus rau cov tib neeg lawm. Lawv thiaj xav tias ntshe nws ua yog toog pom dab tsi hauv lub tuam tsev. Nws piav tes rau lawv xwb vim nws hais tsis tau lus lawm.
23 Thaum nws tes hauj lwm hauv lub tuam tsev tiav lawd, nws thiaj rov mus tsev.
24 Ib ntus tom qab ntawd, nws tus poj niam Elixanpes txawm xeeb tub. Elixanpes nyob hauv tsev tau tsib lub hlis thiab hais tias,
25 “Nim no Vajtswv Yehauvas* ua zoo kawg li rau kuv. Nws nco ntsoov kuv thiab kuv tsis txaj muag rau leej twg lawm.”
26 Thaum Elixanpes xeeb tub tau rau lub hlis lawd, Vajtswv txib Kali-ees uas yog tus tub txib saum ntuj mus rau hauv lub nroog Naxales, cheeb tsam Kalilais.
27 Kali-ees xa xov mus rau ib tug nkauj xwb hu ua Maivliag. Tus txiv neej hu ua Yauxej uas yog Daviv caj ces twb qhaib nws lawm.
28 Thaum tus tub txib saum ntuj mus txog ntawm Maivliag, nws hais tias, “Maivliag, Vajtswv Yehauvas* txaus siab heev rau koj. Nws foom koob hmoov rau koj.”
29 Thaum Maivliag hnov tus tub txib tej lus, ua rau nws xav tsis thoob. Nws xav paub seb yog hais li cas tiag.
30 Tus tub txib thiaj hais rau nws tias, “Maivliag, txhob poob siab. Vajtswv txaus siab heev rau koj.
31 Koj yuav xeeb tub thiab yuav yug tau ib tug me tub. Koj yuav tsum tis nws lub npe hu ua Yexus.
32 Tus tub no yuav muaj hwj chim heev. Luag yuav muab nws hu ua Vajtswv tus Loj Dua Ntais Leej Tub. Vajtswv Yehauvas* yuav cia nws zaum saum nws yawg koob Daviv lub rooj vaj ntxwv.
33 Nws yuav ua Vaj Ntxwv kav Yakhauj caj ces mus ib txhis. Thiab nws txoj kev kav yuav nyob mus ib txhis.”*
34 Tiam sis Maivliag teb tus tub txib saum ntuj tias, “Yuav ua li cas muaj tau li ntawd? Kuv tseem yog ib tug nkauj xwb.”
35 Tus tub txib thiaj teb tias, “Vajtswv lub hwj huam dawb huv yuav los rau saum koj, thiab Vajtswv tus uas Loj Dua Ntais lub hwj chim yuav roos koj. Vim li no, tus me tub uas yug los yuav dawb huv thiab yuav hu ua Vajtswv tus Tub.
36 Elixanpes tus uas nruab ze koj twb xeeb tub lawm thiab. Txawm nws laus heev thiab luag hais tias nws mooj* lawm los, nws twb xeeb tub tau rau lub hlis lawm.
37 Tsis muaj ib yam uas Vajtswv yuav ua tsis tau li.”*
38 Maivliag hais tias, “Kuv yog Vajtswv Yehauvas* tus ntxhais qhev! Thov kom muaj raws li koj tej lus.” Ces tus tub txib saum ntuj txawm mus lawm.
39 Lub sij hawm ntawd, Maivliag thiaj sawv kev tsees mus pem laj roob hauv ib lub nroog nyob teb chaws Yudas.
40 Thaum nws mus txog hauv Xekhaliyas tsev, nws hais noj qab nyob zoo rau Elixanpes.
41 Thaum Elixanpes hnov dheev Maivliag lub suab xwb, nws tus me nyuam hauv plab txawm nti cuag tsi. Lub hwj huam dawb huv txawm ua rau Elixanpes
42 qw tias, “Ib tsoom poj niam, koj yog tus uas tau koob hmoov ntau tshaj. Thov Vajtswv foom koob hmoov nplua mias rau tus me nyuam hauv koj lub plab!
43 Kuv yog leej twg es kuv tus Tswv leej niam tseem tuaj xyuas kuv thiab?
44 Ua cas thaum kuv hnov dheev koj lub suab, tus me nyuam hauv kuv plab zoo siab kawg, nti cuag tsi.
45 Twb yog koj ntseeg koj thiaj zoo siab thiab. Tej uas Vajtswv Yehauvas* hais rau koj lawd yeej yuav muaj tiav tib si.”
46 Maivliag thiaj hais tias, “Kuv qhuas Vajtswv Yehauvas.*
47 Kuv zoo siab tshaj plaws li rau kuv tus Vajtswv, kuv tus Cawm Seej,
48 rau qhov nws tseem nco txog kuv uas yog ib tug nyuag ntxhais qhev xwb. Txij no mus txhua tiam neeg yuav hais tias kuv yog tus uas tau Vajtswv txoj koob hmoov,
49 rau qhov Vajtswv tus uas muaj hwj chim loj twb ua ntau yam zoo kawg nkaus rau kuv lawm. Nws lub npe yeej dawb huv
50 thiab ib tiam dhau ib tiam nws yeej hlub* cov uas hwm* nws.
51 Nws tau siv nws txhais npab uas muaj zog nchav ua ntau yam hauj lwm zoo, thiab nws ua rau cov uas muaj lub siab khav theeb tawg ri sua.
52 Nws tau txo cov uas muaj hwj chim saum tej rooj vaj ntxwv, thiab nws tsa cov uas meej mom qis rau lub chaw siab.
53 Nws tau pub txhua yam zoo rau cov uas tshaib nqhis muaj txaus noj txaus siv, thiab nws ntiab cov neeg nplua nuj tawm mus tes dawb tes npliag.
54 Nws tau pab nws tus tub txib Ixayees kom qhia tias nws yeej nco ntsoov nws lo lus cog tseg.
55 Nws cog lus tias nws yuav hlub* Anplahas thiab nws caj ces mus ib txhis raws li nws tau hais rau peb tej yawg koob.”
56 Maivliag nrog Elixanpes nyob tau peb lub hlis nws mam rov mus tsev.
57 Zaum no txog caij rau Elixanpes so lawm. Nws yug tau ib tug me tub.
58 Tej neeg zej zog thiab nws cov kwv tij neej tsa hnov tias Vajtswv Yehauvas* khuv leej nws heev mas lawv nrog nws zoo siab kawg li.
59 Thaum tus me tub muaj yim hnub, lawv tuaj muab nws ua kev cai txiav.* Lawv xav muab tus me tub hu ua Xekhaliyas ib yam li nws txiv.
60 Tiam sis leej niam hais tias, “Txhob hu li ntawd! Yuav tsum muab nws hu ua Yauhas.”
61 Lawv hais rau Elixanpes tias, “Neb cov txheeb ze tsis muaj ib tug hu ua Yauhas li sad.”
62 Lawv thiaj piav tes rau leej txiv seb nws xav muab tus me tub hu li cas.
63 Nws kom lawv muab ib daim txiag sau ntawv rau nws. Nws sau tias, “Nws lub npe hu ua Yauhas.” Sawv daws xav tsis thoob rau tej no li.
64 Tam sim ntawd, Xekhaliyas txawm hais tau lus* ces nws tsa suab hlo qhuas Vajtswv.
65 Tag nrho cov neeg zej zog uas pom tej xwm no ua rau lawv xav tsis thoob li.* Tej no thiaj nrov ncha thoob plaws tej zej zog pem toj siab hauv teb chaws Yudas.
66 Cov uas hnov tej no thiaj muab tej xwm no khaws rau nruab siab thiab hais tias, “Tus me nyuam no yuav loj hlob los ua dab tsi?” Lawv pom tias Vajtswv Yehauvas* yeej tsom kwm tus me nyuam no tiag.
67 Lub hwj huam dawb huv ua rau Xekhaliyas uas yog leej txiv cev Vajtswv lus tias,
68 “Thov qhuas Yehauvas* uas yog cov Ixayees tus Vajtswv rau qhov nws nco ntsoov nws haiv neeg thiab cawm lawv dim.
69 Nws tau tsa ib tug cawm seej* muaj hwj chim loj kawg li los pab peb. Tus ntawd los ntawm nws tus tub qhe Daviv caj ces los.
70 Nws twb cog lus li no rau cov uas cev nws tej lus puag thaum ub los lawm.
71 Nws cog lus tias nws yuav cawm peb dim hauv peb tej yeeb ncuab thiab cov uas ntxub peb txhais tes.
72 Nws yuav hlub* peb ib yam li nws tau cog lus rau peb tej yawg koob. Nws yeej nco ntsoov nws tej lus cog tseg uas dawb huv.
73 Nws twb cog lus ruaj khov rau peb yawg koob Anplahas lawm.
74 Tom qab nws cawm peb dim ntawm peb cov yeeb ncuab ces nws yuav cia peb pe hawm nws kaj siab lug tsis txhawj tsis ntshai,
75 peb thiaj muab siab npuab nws thiab coj ncaj ncees mus tas peb sim neej.
76 Tiam sis, me tub, luag yuav muab koj hu ua Vajtswv uas Loj Dua Ntais tus cev lus. Koj yuav ua Vajtswv Yehauvas* ntej mus kho kev tos nws.
77 Koj yuav tshaj tawm kom Vajtswv cov tib neeg paub tias Nws yuav zam lawv lub txim kom lawv dim.
78 Vajtswv hlub tshua peb, nws thiaj zam peb lub txim. Nws txoj kev hlub ci tuaj rau peb ib yam li lub hnub ci ntsa iab thaum sawv ntxov
79 uas yuav ci mus rau cov nyob tsaus ntuj nti hauv txoj kev tuag tus duab roos, thiab yuav coj peb txoj hau kev kom peb tau nyob kaj siab lug.”
80 Tus me tub kuj hlob zoo thiab nws muaj hwj chim zuj zus rau qhov Vajtswv lub hwj huam nrog nraim nws. Nws nyob tom roob moj sab qhua mus txog thaum nws tshwm los tshaj tawm rau ib tsoom neeg Ixayees.
Cov taw ntawv
^ Mus saib Cov Lus Txhais.
^ Lus Kilis yog “Aloos cov ntxhais.”
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Uas yog lub thaj hlawv hmoov tshuaj tsw qab.
^ Mus saib Cov Lus Txhais.
^ Mus saib Cov Lus Txhais.
^ Lus Kilis yog “hwj huam.”
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Lus Kilis yog “nws lub Nceeg Vaj yuav kav tsis muaj kawg.”
^ Los sis “ib txwm xeeb tsis taus tub.”
^ Los sis “txhua yam uas Vajtswv hais tseg, nws yeej ua tau tib si.”
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Los sis “khuv leej.”
^ Lus Kilis yog “cov uas ntshai nws.”
^ Los sis “khuv leej.”
^ Mus saib Cov Lus Txhais.
^ Mus saib Cov Lus Txhais.
^ Los sis “lub qhov ncauj qhib plho thiab tus nplaig zooj kiag.”
^ Los sis “ua rau lawv ntshai kawg li.”
^ Mus saib Cov Lus Txhais.
^ Mus saib Cov Lus Txhais.
^ Lus Kilis yog “ib tug kub cawm dim.” Ntau zaus hauv phau Vajlugkub, tus kub tsiaj piv txog hwj chim.
^ Lus Kilis yog “khuv leej.”
^ Mus saib Cov Lus Txhais.
