Lukas Sau 23:1-56
23 Ces pab neeg ntawd txawm sawv tsees coj Yexus mus cuag Philaj.
2 Lawv txawm nkaug Yexus rau Philaj tias, “Peb ntes tus yawg no tuaj rau koj vim nws tshum peb haiv neeg ntxeev teb ntxeev chaw, txwv tsis pub them se rau Xixas, thiab nws tseem hais tias nws yog tus Khetos uas yog ib tug vaj ntxwv.”
3 Philaj thiaj nug Yexus tias, “Koj puas yog cov Yudais tus Vaj Ntxwv?” Yexus teb tias, “Yog li koj hais.”*
4 Ces Philaj hais rau cov pov thawj hlob thiab cov tib neeg tias, “Kuv tsis pom tus neeg no qhov txhaum li.”
5 Tiam sis lawv teb tawv nkawv tias, “Tej uas nws qhia tsim kev kub ntxhov thoob Yudias teb chaws, pib pem Kalilais tuaj txog ntua ntawm no.”
6 Thaum Philaj hnov li ntawd, nws thiaj nug tias, “Tus yawg no puas yog neeg Kalilais?”
7 Thaum Philaj paub tias Yexus nyob cheeb tsam uas Helauj kav, nws thiaj xa Yexus mus rau Helauj txiav txim. Thaum ntawd Helauj kuj tuaj hauv Yeluxalees thiab.
8 Thaum Helauj pom Yexus, nws zoo siab heev. Nws twb xav pom Yexus ntev los lawm, rau qhov nws hnov ntau yam txog Yexus. Nws vam tias Yexus yuav ua txuj ci rau nws saib.
9 Ces Helauj thiaj nug Yexus ib qho tas ib qho tuaj los Yexus tsis teb nws li.
10 Tiam sis cov pov thawj hlob thiab cov xib hwb* tsuas pom sawv pes tsees nkaug Yexus ua npau taws vog xwb.
11 Helauj thiab nws cov tub rog kuj ua saib tsis tau Yexus. Lawv ua txuj muab lub tsho tsuj tseeb rau nws hnav thiab thuam luag nws ces lawv mam xa nws rov mus rau Philaj.
12 Txij hnub ntawd los Philaj thiab Helauj txawm sib raug zoo, rau qhov yav tas los nkawd ua yeeb ncuab.
13 Philaj thiaj hu cov pov thawj hlob, cov thawj coj, thiab cov tib neeg tuaj ua ke.
14 Nws hais rau lawv tias, “Nej muab tus yawg no cob rau kuv thiab nkaug tias nws tshum laj mej pej xeem ntxeev teb ntxeev chaw. Tiam sis kuv twb taug nws zaj tab meeg nej sawv daws, kuv pom tias nws tsis tau ua txhaum li nej nkaug.
15 Helauj los kuj pom li ntawd thiab, Helauj thiaj xa nws rov qab los rau peb. Nws tsis tau ua ib qho txhaum uas tsim nyog yuav muab nws tua.
16 Yog li ntawd, kuv yuav muab nws nplawm thiab tso nws mus.”
17 * ——
18 Tiam sis pab neeg coob coob ua ib tsaug teb tias, “Muab nws tua pov tseg! Tso Npalanpas los rau peb!”
19 (Npalanpas raug kaw vim nws nrog ib pab neeg sawv tawm tsam nom tswv hauv nroog thiab tua neeg.)
20 Philaj xav tso Yexus, nws thiaj rov hais pab neeg coob coob ntawd.
21 Tiam sis cov tib neeg yim huab qw ib tsaug ib tsaug tias, “Muab ntsia saum ntoo!* Muab ntsia saum ntoo!”*
22 Philaj thiaj nug zaum peb tias, “Vim li cas? Nws tau ua txhaum dab tsi? Nws tsis tau ua ib qho txhaum uas tsim nyog yuav muab nws tua. Thaum muab nws nplawm tas, kuv yuav tso nws mus.”
23 Cov tib neeg yim huab qw nrov. Lawv tseev kom muab Yexus tua* pov tseg xwb xwb li, Philaj thiaj ua tsis tau li cas.
24 Philaj thiaj txiav txim siab ua li lawv hais.
25 Philaj thiaj tso Npalanpas tus uas lawv xav tau. Npalanpas raug kaw vim nrog luag tawm tsam nom tswv thiab tua neeg. Tiam sis Philaj ho muab Yexus cob rau lawv coj mus tua raws li lawv lub siab nyiam.
26 Thaum lawv tab tom coj Yexus mus, Ximoos uas yog neeg Xailinis tuaj pem yaj sab tuaj txog ntawd. Luag thiaj yuam Ximoos kwv Yexus tus ncej ntoo* lawv nws qab.
27 Muaj neeg coob coob raws Yexus qab mus. Kuj muaj ib co poj niam uas mob siab heev, lawv thiaj tsa suab hlo quaj* Yexus.
28 Yexus txawm tig los hais rau cov poj niam ntawd tias, “Yeluxalees cov ntxhais’e txhob quaj quaj kuv. Cia li quaj rau nej thiab nej tej me nyuam mog.
29 Tshuav tsis ntev xwb neeg yuav hais tias, ‘Cov poj niam mooj* yog cov uas zoo siab. Cov poj niam tsis tau yug dua me nyuam thiab tsis tau pub dua mis rau me nyuam noj yog cov uas zoo siab!’
30 Lawv yuav hais rau tej roob zeb roob tsuas tias, ‘Los thaiv ntis peb!’ thiab hais rau tej toj roob hauv pes tias, ‘Los roos nkaus peb!’
31 Yog twb muaj tej no thaum tsob ntoo tseem nyoos, thaum tsob ntoo qhuav lawd ho zoo li cas?”
32 Lawv kuj coj ob tug yawg raug txim mus tua nrog Yexus thiab.
33 Thaum lawv mus txog qhov chaw hu ua Txha Taub Hau, lawv muab Yexus ntsia rau saum tus ncej ntoo.* Lawv kuj muab ob tug yawg raug txim dai saum ncej ntoo* thiab, ib tug dai ntawm Yexus sab xis, ib tug dai ntawm Yexus sab laug.
34 Tiam sis Yexus thov Vajtswv tias, “Kuv Txiv’e, thov koj zam txim rau lawv, rau qhov lawv tsis paub tej uas lawv ua ntawd.” Lawv tseem muab nws lub tsho* dua los twv seb leej twg yuav tau daim twg.
35 Cov tib neeg sawv ib cag ntsia Yexus, tiam sis cov thawj coj zij ncaug ntxi muag hais tias, “Nws twb cawm tau lwm tus, cia nws cawm nws tus kheej. Nws twb yog tus Khetos, tus uas Vajtswv xaiv tseg ne.”
36 Txawm cov tub rog los kuj thuam luag nws thiab. Lawv muab cawv txiv hmab qaub cev rau nws haus
37 thiab hais tias, “Koj twb yog cov Yudais tus Vaj Ntxwv ne, cawm koj tus kheej.”
38 Lawv kuj muab ib daig ntoo ntsia saum tus hau ncej tias, “Tus no yog cov Yudais tus Vaj Ntxwv.”
39 Tus yawg raug txim uas dai ntawd txawm thuam Yexus tias, “Koj twb yog tus Khetos ne, cas tsis cawm koj tus kheej thiab cawm wb!”
40 Tus yawg raug txim uas dai sab tod thiaj cem nws tias, “Koj twb raug txim tuag ib yam li nws es koj tseem tsis paub ntshai Vajtswv thiab lod?
41 Yeej tsim nyog wb raug txim li no vim wb tau ua txhaum, tiam sis tus yawg no yeej tsis tau ua txhaum dab tsi li.”
42 Ces nws txawm hais tias, “Yexus, thaum koj ua Vaj Ntxwv kav,* thov koj nco txog kuv.”
43 Yexus teb nws tias, “Hnub no kuv hais ncaj qha rau koj tias, koj yuav tau nrog kuv nyob hauv lub Vaj Kaj Siab.”*
44 Kwv lam 12 teev, ua ciav lub ntuj txawm tsaus dub nciab thoob plaws teb chaws mus txog 3 teev,
45 tsis pom lub hnub ci li lawm. Daim ntaub hauv lub tuam tsev txawm ntuag rhe ua ob daig.
46 Ces Yexus txawm qw ib suab nrov nrov thiab hais tias, “Kuv Txiv, kuv muab kuv txoj sia tso rau hauv koj txhais tes.” Nws mam tu siav nrho.
47 Thaum tus thawj tub rog* pom tej xwm no, nws qhuas Vajtswv tias, “Tus yawg no yog ib tug neeg ncaj ncees tiag.”
48 Thaum cov neeg coob coob uas tuaj saib luag muab Yexus tua pom tej xwm no, lawv ntaus hauv siab tu siab kawg li rov mus tsev.
49 Cov uas paub Yexus sawv ib cag deb deb saib. Cov poj niam uas nrog Yexus tuaj pem Kalilais tuaj kuj sawv ntawd pom tej xwm no thiab.
50 Muaj ib tug yawg hu ua Yauxej uas yog ib tug hauv lub Rooj Sab Laj.* Nws yog ib tug neeg zoo thiab ncaj ncees.
51 (Nws yeej tsis pom zoo thiab tsis nrog lawv tawm tswv yim tua Yexus.) Nws nyob hauv Alimathias uas yog cov Yudias ib lub nroog. Nws tos ntsoov Vajtswv txoj kev kav.*
52 Nws mus thov Philaj kom muab Yexus lub cev rau nws coj mus zais.
53 Nws muab Yexus lub cev txo los thiab muab cov ntaub mag zoo zoo qhwv. Nws mam li coj mus tso rau hauv ib lub qhov ntxa uas txaug tshiab tshiab hauv ib phab tsua.
54 Hnub ntawd yog hnub sawv daws npaj rau hnub Xanpataus uas twb los yuav txog.
55 Tiam sis cov poj niam uas nrog Yexus tuaj pem Kalilais tuaj raws lawv qab mus saib lub qhov ntxa seb luag muab Yexus lub cev zais rau qhov twg.
56 Lawv mam li rov qab mus npaj tej tshuaj tsw qab thiab roj tsw qab. Tiam sis thaum txog hnub Xanpataus lawv kuj so raws li txoj Kev Cai.
Cov taw ntawv
^ Lus Kilis yog “Koj yog tus hais li ntawd.”
^ Los sis “xib hwb qhia Vajtswv kev cai.” Mus saib Cov Lus Txhais.
^ Tej phau Vajlugkub kuj muaj nqe no, tiam sis cov ntawv Kilis uas qub tshaj tsis pom muaj.
^ Mus saib Cov Lus Txhais.
^ Mus saib Cov Lus Txhais.
^ Los sis “tua saum tus ncej ntoo.”
^ Mus saib Cov Lus Txhais.
^ Los sis “ntaus hauv siab quaj ntsuag.”
^ Los sis “ib txwm xeeb tsis taus tub.”
^ Mus saib Cov Lus Txhais.
^ Mus saib Cov Lus Txhais.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Lus Kilis yog “thaum koj kav koj lub Nceeg Vaj.” Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Los sis “Phaladais.” Mus saib Cov Lus Txhais.
^ Tus tub rog no saib 100 tus tub rog.
^ Los sis “lub Xahenrees.”
^ Lus Kilis yog “lub Nceeg Vaj.” Mus saib Cov Lus Txhais.
