Lukas Sau 24:1-53
24 Lub lim tiam ntawd thawj hnub,* lawv sawv ntxov tsees nqa cov tshuaj tsw qab uas lawv npaj tau mus tom Yexus lub ntxa.
2 Tiam sis thaum lawv mus txog, lawv pom tias luag twb muab txhib zeb uas npog lub rooj ntxas tshem lawm.
3 Thaum lawv nkag mus rau hauv, lawv tsis pom tus Tswv Yexus lub cev nyob hauv lawm.
4 Tej no ua rau lawv tsis pom qab xav li. Ua ciav txawm muaj ob tug txiv neej hnav tsoos ci ntsa iab nrog lawv sawv ntawd thiab.
5 Cov poj niam ntawd ntshai heev. Lawv nyo hau ntsia hauv av xwb. Ob tug txiv neej thiaj hais rau lawv tias, “Ua cas nej tuaj nrhiav tus neeg ciaj hauv cov neeg tuag?
6 Nws tsis nyob ntawm no. Nws twb sawv los lawm. Nej puas nco tej uas nws tau hais rau nej thaum nws tseem nyob pem Kalilais?
7 Nws hais tias neeg Leej Tub yuav raug muab cob rau cov neeg muaj txim coj mus tua saum tus ncej ntoo* mas peb hnub tom qab nws yuav sawv rov los.”
8 Ces lawv txawm nco dheev txog Yexus tej lus.
9 Lawv thiaj rov loo ntawm lub ntxa mus qhia tej no rau 11 tug tub txib thiab tag nrho cov thwj tim uas nyob ntawd.
10 Cov poj niam no yog Maivliag Madalas, Yau-anas, thiab Maivliag uas yog Yakaunpaus niam. Thiab cov poj niam uas nrog lawv mus kuj qhia tej no rau cov tub txib.
11 Tiam sis lawv saib tej uas cov poj niam ntawd hais tsis muaj qab hau, lawv thiaj tsis ntseeg.
12 Ces Petus txawm sawv tsees dhia tiaj lias mus rau tom lub ntxa, khoov ntshis xauj hauv, tiam sis tsuas pom daim ntaub mag xwb. Nws thiaj rov mus thiab xav twj ywm tias tej no yog li cas tiag.
13 Tib hnub ntawd, muaj ob tug thwj tim taug kev mus rau lub zos Ema-us uas nyob deb tshaj li 11 kilumev* ntawm Yeluxalees.
14 Nkawd tham txog txhua yam uas tau muaj tshwm sim.
15 Thaum nkawd tab tom tham txog tej no, Yexus txawm los txog ntawd thiab nrog nkawd taug kev mus,
16 tiam sis nkawd zeem tsis tau nws.
17 Nws hais rau nkawd tias, “Neb pheej sib cam txog dab tsi taug kev?” Nkawd txawm nres, ua ntsej muag mluas mlob.
18 Tus thwj tim npe hu ua Khe-aupas thiaj teb nws tias, “Koj nim tsis tau paub tej uas muaj hauv Yeluxalees ob peb hnub no lod? Koj tuaj qhov twg tuaj?”
19 Nws nug nkawd tias, “Muaj dab tsi?” Nkawd hais rau nws tias, “Koj tsis paub tej uas tau muaj rau Yexus tus neeg Naxales lod? Nws yog ib tug cev Vajtswv lus uas txawj qhia heev thiab ua ntau yam txuj ci rau Vajtswv thiab tib neeg qhuas.
20 Peb cov pov thawj hlob thiab cov thawj coj muab nws cob rau luag teem lub txim tuag thiab lawv muab nws ntsia rau saum tus ncej ntoo.*
21 Peb twb vam tias nws yuav yog tus uas los cawm haiv neeg Ixayees dim. Tiam sis tej no twb muaj tau peb hnub rau hnub no lawm.
22 Tsis tas li ntawd xwb, muaj ib co poj niam hauv peb no kuj ua rau peb xav tsis thoob li. Lawv sawv ntxov tsees mus tom Yexus lub ntxa
23 tiam sis tsis pom nws lub cev lawm. Lawv thiaj rov los qhia peb tias lawv kuj pom ob tug tub txib saum ntuj uas qhia rau lawv tias Yexus twb ciaj lawm.
24 Thiab kuj muaj ob peb tug hauv peb mus tom lub ntxa. Lawv pom tias yeej muaj raws li cov poj niam ntawd hais, tiam sis lawv tsis pom Yexus.”
25 Ces Yexus hais rau nkawd tias, “Neb tsis txawj xav li, ua cas neb lub siab yuav qhwv ua luaj tseem tsis ntseeg tej uas cov cev Vajtswv lus tau hais tseg thiab!
26 Tus Khetos yuav tsum raug txom nyem li ntawd ces nws mam li tau koob meej.”
27 Ces nws txawm txhais tej uas Vajtswv Txoj Lus twb hais txog nws lawd. Nws piav tej uas cov cev Vajtswv lus tau sau cia ib qho zuj zus txij thaum Mauxes los.
28 Thaum lawv los yuav txog lub zos uas nkawd yuav mus ntawd, Yexus ua txuj ua li nws yuav mus kom dhau plaws.
29 Tiam sis nkawd tsis pub nws mus li. Nkawd hais tias, “Twb lig lig lawm, yuav tsaus ntuj. Cia li nrog wb so hauv no.” Nws thiaj nrog nkawd nyob.
30 Thaum lawv noj hmo, Yexus txawm muab lub ncuav los ua Vajtswv tsaug thiab muab ntais cev rau nkawd noj.
31 Tam sim ntawd nkawd lub qhov muag txawm qhib plho, nkawd thiaj zeem tau Yexus kiag tiam sis nws cia li ploj ntais lawm.
32 Nkawd sib tham tias, “Tos wb nim kub siab ua luaj thaum nws txhais Vajtswv Txoj Lus taug kev.”
33 Nkawd txawm sawv tsees rov mus rau Yeluxalees. Nkawd thiaj mus nrhiav tau Yexus 11 tug tub txib thiab cov thwj tim uas tuaj sib txoos ua ke.
34 Lawv cov ntawd tab tom tham tias, “Tus Tswv yeej sawv hauv qhov tuag rov los lawm tiag. Nws twb tshwm rau Ximoos pom!”
35 Nkawd mam li piav txog tej uas tau muaj tshwm sim thaum nkawd taug kev, thiab piav tias thaum Yexus ntais lub ncuav rau lawv noj nkawd mam li paub tseeb tias yog Yexus tiag.
36 Thaum lawv tab tom tham zom zaws txog tej no, Yexus txawm tshwm plaws ntawm lawv xub ntiag thiab hais tias, “Thov kom nej nyob kaj siab lug.”*
37 Lawv txawm poob siab ntha ntshai kawg li. Lawv xav tias lawv pom ib tug plig.
38 Nws thiaj nug lawv tias, “Ua cas nej yuav ntshai ua luaj, nej tseem tsis ntseeg tias yog kuv thiab?
39 Saib kuv tej tes taw seb, yeej yog kuv tiag. Kov kuv nej thiaj paub, plig tsis muaj nqaij muaj txha li nej pom kuv no.”
40 Thaum nws tab tom hais tej no, nws muab nws tej tes taw rau lawv saib.
41 Lawv tseem tsis tau ntseeg tiag, tiam sis lawv kuj xyiv fab thiab xav tsis thoob rau tej no. Yexus thiaj nug lawv tias, “Nej puas muaj dab tsi noj?”
42 Lawv thiaj cev ib daim nqaij ntses ci rau Yexus.
43 Nws thiaj txais nkaus mus noj tab meeg lawv.
44 Ces nws hais rau lawv tias, “Thaum kuv tseem nrog nej nyob kuv twb hais rau nej lawm tias txhua yam hauv Mauxes Txoj Kev Cai, hauv cov cev Vajtswv lus tej lus qhia, thiab hauv phau Ntawv Nkauj* uas hais txog kuv yuav tsum muaj tiav.”
45 Ces nws thiaj qhib lawv lub siab kom lawv to taub Vajtswv Txoj Lus
46 thiab hais rau lawv tias, “Twb muaj lus sau cia tias tus Khetos yuav tsum raug tsim txom ces peb hnub xwb nws yuav sawv hauv qhov tuag rov los.
47 Thiab yuav muaj neeg tuav nws lub npe tshaj tawm rau txhua haiv neeg kom hloov dua siab tshiab, Vajtswv thiaj yuav zam tau lawv lub txim. Yuav pib tshaj tawm hauv Yeluxalees mus.
48 Nej yuav ua tim khawv txog tej no.
49 Kuv yuav pub yam uas kuv Txiv twb cog lus rau nej. Tiam sis nej yuav tsum nyob twj ywm hauv lub nroog Yeluxalees mus txog thaum nej tau lub hwj chim saum ntuj los tso.”
50 Ces Yexus coj lawv mus txog Npethanis thiab nws tsa tes foom koob hmoov rau lawv.
51 Thaum nws tab tom foom koob hmoov rau lawv, nws txawm ncaim lawv thiab Vajtswv coj nws mus saum ntuj lawm.
52 Ces lawv hawm Yexus thiab rov mus rau hauv Yeluxalees xyiv fab hlo.
53 Thiab lawv niaj hnub mus qhuas Vajtswv hauv lub tuam tsev.
Cov taw ntawv
^ Cov Yudais suav tias yog thawj hnub rau lub lim tiam, tiam sis nim no yog Hnub 7.
^ Mus saib Cov Lus Txhais.
^ Kwv lam li xya mais. Lus Kilis yog “60 xitadias.” Ib xitadias yog 185 mev los sis 404.63 tshim.
^ Mus saib Cov Lus Txhais.
^ Lub caij ntawd cov neeg Yudais kheev sib hu li no.
^ Tsis yog phau Ntawv Nkauj nkaus xwb, tiam sis yog ntu peb hauv cov Nqe Vajlugkub Henplais uas pib nrog phau Ntawv Nkauj.
