Mathais Sau 14:1-36
14 Lub sij hawm ntawd Helauj* yog tus kav cheeb tsam Kalilais. Nws hnov txog tej txuj ci uas Yexus tau ua.
2 Nws hais rau nws cov tub txib tias, “Tus no yuav tsum yog Yauhas tus uas muab neeg ua kev cai raus dej xwb lauj. Ntshe nws sawv rov los lawm, nws thiaj ua tau tej txuj ci ntawd.”
3 Helauj hais li no rau qhov ua ntej ntawd, nws twb ntes Yauhas coj mus kaw hauv tsev loj cuj lawm. Yauhas raug ntes yog tim Helaudias uas yog Helauj tus niam tij Filis.
4 Yauhas pheej hais Helauj tias, “Koj tsis muaj cai yuav nws.”
5 Helauj twb xav muab Yauhas tua tiam sis nws ntshai cov pej xeem rau qhov lawv ntseeg tias Yauhas yog ib tug cev Vajtswv lus.
6 Thaum txog Helauj hnub yug, lawv ua ib roog noj. Helaudias tus ntxhais los dhia seev cev rau cov qhua saib, ua rau Helauj zoo siab heev.
7 Nws thiaj cog lus tias tus ntxhais thov yam twg, nws yeej yuav muab rau.
8 Tus ntxhais thiaj thov raws li nws niam qhia rau nws tias, “Cia li muab Yauhas* lub taub hau tso hauv ib lub phaj nqa los rau kuv.”
9 Cov lus no ua rau Helauj ntxhov siab tiam sis nws twb cog lus tab meeg rau sawv daws lawm, nws thiaj ua raws li tus ntxhais thov.
10 Helauj thiaj txib neeg mus hauv tsev loj cuj mus txiav Yauhas caj dab.
11 Lawv muab Yauhas lub taub hau tso hauv ib lub phaj nqa los rau tus ntxhais ces nws coj mus rau nws niam.
12 Tom qab ntawd, Yauhas cov thwj tim coj nws lub cev mus zais. Lawv mam mus qhia tej no rau Yexus paub.
13 Thaum Yexus hnov txog tej no, nws cia li caij nkoj mus nyob ib leeg rau lwm qhov. Tiam sis thaum cov neeg coob coob hnov li ntawd, lawv tawm hauv tej nroog taug kev mus caum Yexus.
14 Thaum Yexus tawm hauv nkoj los, nws pom cov neeg coob coob tuaj tos nws. Nws hlub lawv kawg li, nws kho cov uas muaj mob zoo huv si.
15 Thaum yuav tsaus ntuj, nws cov thwj tim los cuag nws thiab hais tias, “Peb nyob deb zos heev thiab twb lig lig lawm. Cia li tso lawv mus nrhiav noj tom tej zej zos.”
16 Tiam sis Yexus teb tias, “Cia lawv nyob lawv, nej kuj muab rau lawv noj.”
17 Lawv hais rau Yexus tias, “Peb tsuas muaj tsib lub ncuav thiab ob tug ntses xwb.”
18 Yexus hais tias, “Muab los rau kuv.”
19 Nws hais kom cov tib neeg zaum saum tej nyom. Nws mam li txais tsib lub ncuav thiab ob tug ntses ntawd thiab tsa muag ntsia saum ntuj ua Vajtswv tsaug. Thaum nws thov tas, nws muab cov ncuav ntais cev rau cov thwj tim coj mus faib rau sawv daws noj.
20 Sawv daws puav leej noj tsau tib si. Cov thwj tim mam mus khaws cov uas seem tau 12 tawb puv nkaus.
21 Cov neeg uas noj ntawd, suav cov txiv neej muaj li 5,000 leej, tsis suav poj niam me nyuam.
22 Yexus txawm hais kom nws cov thwj tim caij nkoj hla hiav txwv ua ntej mus rau sab tid. Thaum lawv mus lawd, nws mam tso cov neeg coob coob mus tsev.
23 Thaum Yexus tso cov neeg coob coob mus lawd, nws txawm mus thov Vajtswv ib leeg saum roob. Twb tsaus ntuj lawm los nws tseem nyob nws ib leeg saud.
24 Thaum ntawd cov thwj tim twb caij nkoj mus deb heev* ntawm ntug hiav txwv lawm. Cua ntsawj hlob heev tom hau nkoj tuaj mas dej nphau tej niag nthwv los ntaus lub nkoj.
25 Thaum tsis tau kaj ntug,* Yexus txawm los ko taw saum nplaim dej los rau ntawm lawv.
26 Thaum cov thwj tim pom Yexus los saum nplaim dej los mas lawv ntshai kawg li. Lawv thiaj qw zom zaws tias, “Dab tsi los txog tod!”*
27 Yexus hu kiag tias, “Txhob ntshai, yog kuv xwb!”
28 Petus thiaj teb Yexus tias, “Tus Tswv, yog koj tiag no thov cia kuv tuaj ko taw saum nplaim dej tuaj ntawm ko.”
29 Yexus teb Petus tias, “Tuaj maj!” Petus thiaj tawm plaws hauv nkoj mus ko taw saum nplaim dej mus rau ntawm Yexus.
30 Tiam sis thaum Petus pom cua daj cua dub hlob heev, nws txawm ntshai. Nws pib tog rau hauv dej nws thiaj qw ib suab tias, “Tus Tswv, pab kuv!”
31 Tam sim ntawd Yexus cev loo tes mus rub nws. Yexus ntsiab nkaus Petus thiab hais tias, “Ua cas koj tsis tso siab li, koj tsis ntseeg tias kuv muaj peev xwm ua tej no lod?”
32 Thaum nkawd mus rau hauv nkoj ces cua daj cua dub txawm tu nrho.
33 Cov uas nyob hauv nkoj thiaj txhos caug ntua hawm Yexus thiab hais tias, “Koj yeej yog Vajtswv tus Tub tiag.”
34 Lawv thiaj caij nkoj hla mus rau sab tid thiab mus nres ntawm qhov chaw hu ua Kenexales.
35 Thaum cov tib neeg paub tias yog Yexus, lawv txawm xa xov mus rau ib cheeb tsam tias Yexus tuaj txog ntawm lawv lawm. Cov tib neeg thiaj coj txhua tus uas muaj mob tuaj cuag Yexus.
36 Lawv thov Yexus kom nws cia lawv kov nws lub tw tsho xwb. Txhua tus uas tau kov puav leej zoo tib si.
Cov taw ntawv
^ Uas yog Helauj Atipas. Mus saib Cov Lus Txhais.
^ Lus Kilis yog “Yauhas tus uas muab neeg ua kev cai raus dej.”
^ Lus Kilis yog “ntau xitadias.” Ib xitadias yog 185 mev los sis 404.63 tshim.
^ Lus Kilis yog “Lub sij hawm plaub.” Lub sij hawm ntawd yog thaum qaib qua thawj tsig, uas yog peb teev sawv ntxov mus txog thaum rau teev sawv ntxov.
^ Los sis “Yog npau suav los yog tiag?”
