Tub Txib Tes Hauj Lwm 13:1-52
13 Hauv lub koom txoos uas nyob lub nroog Athi-aus, cov cev Vajtswv lus thiab cov xib hwb muaj npe li no, Npananpas, Xime-oos uas kuj hu ua Dub,* Lukias uas nyob Xailinis tuaj, Mana-ees uas nrog tus nom Helauj* kawm ntawv ua ke, thiab Xolaus.
2 Thaum lawv tseem ua Vajtswv Yehauvas* tes hauj lwm thiab ua kev cai yoo mov, lub hwj huam dawb huv txawm tshoov kom muab Npananpas thiab Xolaus tshwj cia rau Vajtswv, rau qhov nws yuav txib nkawd mus ua ib teg hauj lwm.
3 Thaum ua kev cai yoo mov thiab thov Vajtswv tas, lawv thiaj tsa tes npuab nkawd thiab txib nkawd mus lawm.
4 Lub hwj huam dawb huv txib nkawd mus rau nram Xeluxias, nkawd mam li caij nkoj mus rau lub pov txwv Xaipas.
5 Thaum nkawd mus txog hauv lub nroog Xalamis, nkawd pib tshaj tawm Vajtswv txoj lus hauv cov Yudais tej tsev pe hawm. Yauhas kuj mus ua tus pab nkawd thiab.
6 Thaum lawv qhia thoob lub pov txwv mus txog ntua lub nroog Pafaus, lawv txawm ntsib ib tug yawg Yudais hu ua Npayexus. Nws txawj ua khawv koob yees siv thiab yog ib tug cev lus cuav.
7 Npayexus nrog tus tswv xeev Xawkias Paulus ua ke. Xawkias Paulus yog ib tug neeg ntse heev. Nws xav hnov Vajtswv txoj lus kawg li, nws thiaj hu Npananpas thiab Xolaus los rau ntawm nws.
8 Tiam sis tus yawg txawj ua yees siv uas kuj hu ua Elimas* txawm pib tawm tsam nkawd. (Lub npe Elimas txhais tias tus txawj ua khawv koob yees siv.) Nws tsis xav kom tus tswv xeev ntseeg Vajtswv txoj lus.
9 Xolaus uas muaj dua lub npe hu ua Povlauj puv npo lub hwj huam dawb huv. Nws thiaj ntsia ntsoov tus yawg ntawd
10 thiab hais tias, “Niag neeg ko, koj lub siab puv nkaus tej kev dag ntxias thiab kev phem lim hiam. Koj yog Dab Ntxwg Nyoog tus tub ntag. Koj ua yeeb ncuab tawm tsam txhua yam kev ncaj ncees. Koj yuav cov nyom Vajtswv Yehauvas* txoj kev ncaj ncees mus txog tav twg?
11 Saib nawb! Vajtswv Yehauvas* yuav rau txim rau koj mas koj yuav dig muag thiab yuav tsis pom lub hnub ci mus ib ntus.” Tam sim ntawd nws ob lub qhov muag txawm plooj nkaus. Nws thiaj xuas dub mus rau ub rau no nrhiav neeg tuav tes.
12 Thaum tus tswv xeev pom li no nws thiaj los ntseeg rau qhov tej uas nws kawm txog Vajtswv Yehauvas* ua rau nws xav tsis thoob li.
13 Povlauj lawv thiaj caij nkoj ntawm Pafaus mus rau lub nroog Pawkas uas nyob hauv teb chaws Pafilias. Tiam sis Yauhas tso nkawd tseg thiab rov mus rau Yeluxalees lawm.
14 Nkawd sawv kev ntawm Pawkas mus rau Athi-aus uas nyob hauv Pixidias cheeb tsam. Hnub Xanpataus, nkawd txawm mus zaum hauv lub tsev pe hawm.
15 Thaum cov tib neeg nyeem Mauxes Txoj Kev Cai thiab cov cev Vajtswv lus tej lus qhia tas lawd, cov thawj saib xyuas lub tsev pe hawm txawm hais rau nkawd tias, “Ob tug kwv tij, yog neb muaj lus txhawb sawv daws ces kav tsij hais.”
16 Povlauj thiaj sawv tsees thiab tsa tes kom sawv daws nyob twj ywm. Nws txawm hais tias,
“Ib tsoom neeg Ixayees thiab tag nrho cov uas hwm Vajtswv’e, thov mloog nawb.
17 Haiv neeg Ixayees tus Vajtswv tau xaiv peb cov yawg koob cia lawm. Mas thaum lawv tseem nyob hauv Iyiv teb chaws uas tsis yog lawv teb lawv chaw, Vajtswv twb txhawb kom lawv vam meej lawm. Vajtswv siv nws lub hwj chim loj kawg nkaus coj lawv tawm hauv lub teb chaws ntawd los.
18 Nws ua siab ntev kawg li rau lawv tau 40 xyoo hauv teb chaws moj sab qhua.
19 Tom qab Vajtswv rhuav tshem xya haiv neeg hauv teb chaws Khana-as, nws mam li faib teb faib chaw rau peb cov yawg koob ua qub txeeg qub teg.
20 Ncua sij hawm uas muaj tej no, ntev li 450 xyoo.
“Tom qab ntawd, nws mam li tsa cov txiav txim los coj lawv, mus txog ntua Xamuyees tus uas cev Vajtswv lus.
21 Tiam sis cov pej xeem ho thov kom tsa ib tug vaj ntxwv los kav lawv. Vajtswv thiaj tsa Xa-us uas yog Khij tus tub thiab yog ib tug hauv xeem Npeeyamees, los kav lawv tau 40 lub xyoos.
22 Thaum Vajtswv txo Xa-us, nws ho tsa Daviv ua vaj ntxwv. Vajtswv ua tim khawv txog Daviv li no, ‘Daviv uas yog Yexis tus tub yeej ua haum kuv siab thiab nws yuav ua txhua yam raws li kuv pom zoo.’
23 Raws li Vajtswv cog lus tseg, nws tau xaiv Daviv ib tug xeeb ntxwv los cawm haiv neeg Ixayees. Tus ntawd yog Yexus.
24 Ua ntej tus ntawd tshwm los, Yauhas twb tshaj tawm rau ib tsoom Ixayees tias lawv yuav tsum ua kev cai raus dej qhia tias lawv hloov dua siab tshiab.
25 Thaum Yauhas ua nws tes hauj lwm yuav tiav nws hais tias, ‘Nej xav tias kuv yog leej twg? Kuv tsis yog tus uas nej niaj hnub tos. Tus yuav lawv kuv qab los, kuv twb tsis tsim nyog daws nws txoj hlua khau.’
26 “Cov kwv tij, nej cov uas yog Anplahas xeeb ntxwv, thiab nej cov uas hwm Vajtswv, kuv qhia rau nej tias txoj xov txog Vajtswv txoj kev cawm dim twb los txog peb lawm.
27 Cov neeg hauv Yeluxalees thiab lawv tej thawj coj* tsis xam pom tus cawm seej no. Thaum lawv txiav txim rau nws, lawv ua raws nkaus li cov cev Vajtswv lus tau hais tseg ntag. Txhua hnub Xanpataus luag yeej nyeem tej lus ntawd rau sawv daws mloog.
28 Txawm lawv nrhiav tsis tau txim tua nws los, lawv tseev kom Philaj muab nws tua pov tseg.
29 Thaum lawv ua tiav raws li txhua yam uas sau tseg txog nws lawd, lawv mam li txo nws lub cev saum tus ncej ntoo* thiab coj nws mus zais hauv ib lub qhov ntxa.
30 Tiam sis Vajtswv tsa nws sawv hauv qhov tuag rov los.
31 Thiab tau ntau hnub nws los tshwm rau cov uas niaj hnub nrog nws ua ke hauv Kalilais mus rau Yeluxalees pom. Nim no cov ntawd yog cov uas ua tim khawv qhia tib neeg txog nws ntag.
32 “Yog li ntawd, wb tuaj ntawm no yog tuaj qhia txoj xov zoo txog Vajtswv lo lus cog tseg rau peb cov yawg koob.
33 Thaum Vajtswv tsa Yexus ciaj sawv rov los ces twb yog Vajtswv ua raws li lo lus cog tseg ntawd, xwv thiaj pab tau peb uas yog lawv tej xeeb ntxwv. Tau muaj raws li sau cia hauv phau ntawv nkauj zaj ob* tias, ‘Koj yog kuv tus tub, hnub no kuv yog koj txiv lawm.’
34 Vajtswv tsa Yexus sawv hauv qhov tuag rov los mas nws yuav tsis muaj lub cev uas txawj lwj lawm. Rau qhov Vajtswv hais tseg li no tias, ‘Kuv yuav hlub koj mus li, ib yam li kuv cog lus rau Daviv lawm. Kuv tej lus cog tseg yeej tso siab tau.’
35 Kuj muaj dua lwm zaj nkauj hais tias, ‘Koj yuav tsis cia tus uas muab siab npuab koj cev nqaij lwj.’
36 Daviv ua Vajtswv tes hauj lwm mus tas nws tiam neej. Thaum nws tuag, luag muab nws faus nrog nws tej yawg koob thiab nws cev nqaij yeej lwj tas lawm.
37 Tiam sis tus uas Vajtswv tsa sawv rov los, tus ntawd cev nqaij yeej tsis lwj li.
38 “Yog li ntawd, cov kwv tij, kuv hais ncaj qha rau nej sawv daws tias yog vim muaj tus no, Vajtswv thiaj zam tau lub txim txhaum.
39 Mauxes Txoj Kev Cai daws tsis tau nej lub txim huv si mus, tiam sis txhua tus uas ntseeg tus no, Vajtswv yuav daws nws lub txim huv si mus.
40 Yog li ntawd, ceev faj tsam tej uas cov cev Vajtswv lus hais tseg ho los raug nej li hais no,
41 ‘Nej cov uas pheej thuam luag, cia li saib tes hauj lwm uas kuv ua rau nej lub caij lub nyoog. Txawm muaj neeg qhia tes hauj lwm no meej kawg li rau nej los nej yeej yuav tsis ntseeg. Tiam sis nej yuav xav tsis thoob li thiab nej yuav puas tsuaj mus.’”
42 Thaum nkawd yuav tawm mus, cov tib neeg thov kom nkawd rov tuaj qhia zaj no rau hnub Xanpataus tom ntej thiab.
43 Thaum sawv daws sib txoos hauv lub tsev pe hawm tas, coob tus Yudais thiab lwm haiv neeg uas los coj Yudais kev cai txawm raws Povlauj thiab Npananpas qab mus. Nkawd txhawb kom sawv daws tuav rawv kev ntseeg xwv lawv thiaj cog ruaj khov hauv Vajtswv txoj kev hlub nplua mias.*
44 Thaum rov qab txog hnub Xanpataus, yuav luag txhua tus hauv lub nroog tuaj mloog Vajtswv Yehauvas* txoj lus.
45 Thaum cov Yudais pom cov neeg coob coob ntawd, lawv khib heev. Lawv thiaj tig los dag thiab cov nyom tej uas Povlauj qhia.
46 Povlauj thiab Npananpas ua siab tawv qhawv teb lawv tias, “Yuav tsum xub muab Vajtswv txoj lus qhia rau nej ua ntej. Tiam sis nej tsis xav hnov, nej ua qhia tias nej tsis tsim nyog tau txoj sia ib txhis tsis kawg. Yog li ntawd, peb yuav mus qhia rau lwm haiv neeg.
47 Vajtswv Yehauvas* twb sam hwm li no rau peb lawm tias, ‘Kuv tsa koj ua qhov kaj ci rau lwm haiv neeg, koj thiaj coj tau kev cawm dim mus txog qab ntuj kawg.’”*
48 Thaum lwm haiv neeg hnov li no mas lawv zoo siab xyiv fab kawg li. Lawv txawm pib qhuas Vajtswv Yehauvas* txoj lus thiab txhua tus uas muaj lub siab xib rau Vajtswv thiab xav tau txoj sia ib txhis tsis kawg txawm los ntseeg.
49 Vajtswv Yehauvas* txoj lus thiaj nrov ncha mus thoob plaws cheeb tsam ntawd.
50 Tiam sis cov Yudais tshum kom cov poj niam nto moo uas ntseeg Vajtswv thiab cov txiv neej uas ua thawj hauv lub nroog tig los tawm tsam Povlauj thiab Npananpas nkawd. Luag thiaj tsim txom nkawd thiab muab nkawd ntiab tawm hauv cheeb tsam ntawd mus.
51 Nkawd thiaj nchos tej hmoov av uas lo ko taw tseg thiab sawv kev mus rau Ikhaunias lawm.
52 Mas cov thwj tim niaj hnub zoo siab xyiv fab thiab lawv puv npo lub hwj huam dawb huv.
Cov taw ntawv
^ Lus Kilis yog “Naintsaws.”
^ Uas yog Helauj Atipas. Mus saib Cov Lus Txhais.
^ Mus saib Cov Lus Txhais.
^ Elimas yog tib tug Npayexus uas hais nyob rau hauv nqe 6.
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Los sis “lawv cov nom.”
^ Mus saib Cov Lus Txhais.
^ Nqe no hais txog Ntawv Nkauj tshooj 2.
^ Mus saib “Txoj kev hlub uas pub dawb” hauv Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Nqe no yog hais rau Mexiyas tiam sis Povlauj kuj muab hais rau Yexus cov thwj tim thiab.
^ Mus saib Cov Lus Txhais.
^ Mus saib Cov Lus Txhais.
