Tau ntau xyoo dhau los lawm, Yehauvas Cov Tim Khawv yeej raug thuam yeeb vim yog lawv tsis kam txhab ntshav. Tos lawv tsis kam txhab ntshav los yog lawv xav ua raws li tej lus nyob hauv phau Vajlugkub kom caiv ntshav. (Tes Haujlwm 15:29) Tiam sis cov kws tshuaj xav hais tias kev txhab ntshav yog ib hom kev kho mob zoo rau cov neeg muaj mob hnyav.

Cov tib neeg ua hauj lwm hauv tsev kho mob thiaj pib hais zom zaws tias kom siv lwm txoj hau kev los kho cov neeg muaj mob es tsis txhab ntshav nkaus nkaus xwb.

Nyob rau xyoo 2013, muaj ib lub tsev kawm ntawv qib siab hu ua Stanford University School of Medicine tso tawm ib phau ntawv hais txog kev kho mob hu ua Stanford Medicine Magazine. Nyob rau hauv muaj ib zaj qhia txog ntshav uas hu ua “Ua Cas Ho Tsis Txhab Ntshav?” (“Against the Flow​—What’s Behind the Decline in Blood Transfusions?”) Tus sau zaj no npe hu ua Xelas Xis Phis Viyees (Sarah C. P. Williams) tau hais tias: “Tshaj li 10 xyoo dhau los no, luag tshawb fawb pom tias tej tsev kho mob hauv ntiaj teb no siv ntshav tshaj li tsim nyog rau ntawm chav phais mob los sis hauv tej chav kho mob.”

Tus sau zaj no hais txog ib tug kws tshuaj npe hu ua Phathisa Fuaj (Patricia Ford, M.D.) uas yog ib tug thawj thiab tus coj ntawm lub tsev kho mob hu ua The Center for Bloodless Medicine and Surgery at Pennsylvania Hospital. Dotawm (Dr.) Fuaj hais tias: “Luag cob qhia tej kws tshuaj tias ntshav thiaj cawm tau neeg txoj sia. Yog tsis txhab ntshav ces tib neeg yuav tuag . . . Qho zaug kuj yog li ntawd thiab, a tiam sis feem ntau tsis muaj tseeb li ntawd.”

Txhua txhua xyoo, Yehauvas Cov Tim Khawv kwv lam li 700 leej kuj mus ntsib Dotawm Fuaj. Nws hais tias: “Muaj coob leej ntau tus kws tshuaj uas kuv tau nrog lawv tham . . . kuj xav hais tias yog tsis txhab ntshav ces cov neeg lawv kho yuav tsis ciaj . . . txawm kuv los kuj tau xav li lawv tib yam nkaus thiab. Tiam sis kuv kawm tau tias yog peb siv lwm txoj kev ces kuj yuav tsis ua li cas rau cov neeg peb kho ntawd.”

Thaum lub 8 Hli xyoo 2012, muaj ib phau ntawv hais txog kev kho mob hu ua Archives of Internal Medicine tau sau txog cov tib neeg kho plawv. Lawv siv kwv lam li 28 lub xyoos los mus kawm cov neeg kho plawv. Lawv tshuaj pom tias Yehauvas Cov Tim Khawv kuj tsis sab ua luaj twg thaum phais mob, zoo sai dua, thiab nyob ntev tshaj li 20 tawm lub xyoos dua cov tib neeg uas txhab ntshav.

Muaj ib zag hais nyob rau hauv phau The Wall Street Journal thaum lub 4 Hlis tim 8 xyoo 2013 hais tias: “Cov neeg kho mob uas lawv tsis kam txhab ntshav yeeb vim yog lawv txoj kev ntseeg, yeej phais mob mus mus los los tsis siv ntshav tau ntau ntau xyoo lawm. Niaj hnub no nyob rau tej tsev kho mob los lawv kuj pib xyaum tsis siv ntshav thaum phais mob lawm thiab . . . Cov kws tshuaj uas phais mob es tsis siv ntshav tau hais li no tias lawv kuj tsis tau yuav ntshav, khaws ntshav, sim cov ntshav, thiab txhab ntshav. Tsis tas li ntawd, kuj tsis ua rau cov neeg tuaj phais mob ntawd muaj mob ntxiv thiab ua rau lawv pw hauv tsev kho mob ntev ntev.”

Muaj ib tug npe hu ua Lanpaw Lauleem (Robert Lorenz) uas yog tus tswv uas saib xyuas chav rau ntshav hauv lub me nyuam tsev kho mob hu ua Cleveland Clinic tau hais tias: “Yog koj txhab ntshav rau ib tug neeg twg ces koj yeej xav tias koj pab tau tus neeg ntawd . . . Tiam sis ntev mus ntev tuaj mam li pom tau tias tsis zoo li ntawd.”