Yeej tsis tau muaj ib tug neeg twg pom Vajtswv dua li. (Khiav Dim 33:20; Yauhas 1:18; 1 Yauhas 4:12) Phau Vajlugkub qhia tias Vajtswv muaj lub cev plig uas neeg ntsia tsis pom.​—Yauhas 4:24; 1 Timautes 1:17.

 Tsuas yog cov tub txib saum ntuj thiaj pom tau Vajtswv xwb, vim lawv muaj lub cev nplig tib yam li Vajtswv. (Mathais 18:10) Tsis tas li ntawd, tseem muaj ib co neeg uas raug tsa ciaj sawv rov los tau lub cev plig nyob saum ntuj yuav pom tau Vajtswv thiab.​—Filipis 3:20, 21; 1 Yauhas 3:2.

 Phau Vajlugkub muab qhov uas pom piv rau kev nkag siab. (Yaxayas 6:10; Yelemis 5:21; Yauhas 9:39-41) Yog li ntawd, txawm peb ntsia tsis pom Vajtswv los yog peb ‘qhib peb lub siab’ es muaj kev ntseeg rau nws ces peb yuav pom tias nws yog ib tug Vajtswv zoo li cas. (Efexus 1:18) Phau Vajlugkub yuav tsav tau peb txoj kev ntseeg rau Vajtswv.

•   Kawm ntawm tej uas Vajtswv tsim kom thiaj paub txog nws tej yeeb yam. Xws li, nws txoj kev hlub, nws lub siab dav, nws lub tswv yim, thiab hwj chim. (Loos 1:20) Muaj ib tug txiv neej ncaj ncees hu ua Yauj, thaum nws ua tib zoo xav txog tej uas Vajtswv tsim cuag li nws pom Vajtswv ntawm nws hauv ntej.​—Yauj 42:5.

•   Nyeem Vajtswv Txoj Lus koj thiaj paub nws ntxiv. Phau Vajlugkub hais tias Vajtswv yeej yuav pab koj nrhiav tau nws.​—1 Xwmtxheej Vajntxwv 28:9; Phau Ntawv Nkauj 119:2; Yauhas 17:3.

•   Yexus coj ib yam li nws Txiv Yehauvas ces yog peb kawm txog Yexus lub neej peb yuav kawm tau ntau yam zoo txog Yehauvas. Yexus thiaj hais tias: “Tus uas pom kuv, tus ntawd twb pom Leej Txiv lawm.”​—Yauhas 14:9.

•   Thaum peb ua peb lub neej li Vajtswv pom zoo ces peb yuav pom nws txhais tes pab. Yexus hais tias: “Cov uas muaj siab dawb siab zoo yog cov uas zoo siab rau qhov lawv yuav pom Vajtswv.” Ib yam li tau hais thaum xub thawj, cov uas ua raws li Vajtswv lub siab nyiam, Vajtswv yuav tsa lawv ib txhia sawv rov los mus nyob saum ntuj thiab yuav pom nws.​—Mathais 5:8; Phau Ntawv Nkauj 11:7.

 Txawm tias muaj tej ntu hauv phau Vajlugkub hais tias tib neeg pom kiag Vajtswv los, yog nyeem thoob plaws zaj ntawd tsuas yog Vajtswv txib cov tub txib saum ntuj los cev nws lus los sis Vajtswv ua rau tib neeg ua yog toog pom nws xwb.

 Cov tub txib saum ntuj.

Yav thaum ub, Vajtswv txib nws cov tub txib saum ntuj mus cuag tib neeg thiab cev nws lus. (Phau Ntawv Nkauj 103:20) Xws li, muaj ib zaug Vajtswv hais hauv tsob ntoo uas muaj nplaim taws liab ploog tuaj nrog Mauxes tham. Phau Vajlugkub hais tias, “Mauxes tsis muaj cuabkav yuav ntsia taus Vajtswv, nws thiaj muab tes pos nws ntsejmuag.” (Khiav Dim 3:4, 6) Thaum peb nyeem zaj ntawd pem hauv paus tuaj peb yuav pom tias Mauxes tsuas pom ‘Yehauvas tus tub txib xwb’ tsis yog pom Vajtswv.​—Khiav Dim 3:2.

 Thiab thaum phau Vajlugkub hais tias Vajtswv “nrog Mauxes tham tim ntsej tim muag” qhov ntawd txhais tias Vajtswv nrog Mauxes sib txuas lus. (Khiav Dim 4:10, 11; 33:11) Vajtswv txib cov tub txib saum ntuj los muab lus rau Mauxes xwb, tsis yog pom Vajtswv tiag. (Kalatias 3:19; Tes Haujlwm 7:53) Tiam sis Mauxes muaj kev ntseeg heev cuag li nws “pom Vajtswv tus uas sawvdaws qhovmuag tsis pom.”​—Henplais 11:27.

 Thaum Yehauvas nrog Anplahas tham, yog peb tsis ua tib zoo nyeem ces peb yuav xav tias Anplahas yeej nrog Vajtswv tham tim ntsej tim muag. (Chivkeeb 18:1, 33) Tiam sis yog peb nyeem zaj ntawd thoob plaws peb yuav pom tias 3 tug txiv neej uas tuaj cuag Anplahas, lawv yog cov tub txib saum ntuj uas Vajtswv txib lawv tuaj. Anplahas paub tias lawv tuaj cev Vajtswv lus rau nws, Anplahas thiaj nrog lawv sib txuas lus, cuag li nws nrog Vajtswv tham.​—Chivkeeb 18:2, 3, 22, 32; 19:1.

 Ua yog toog.

Thaum phau Vajlugkub hais tias Mauxes thiab cov neeg Ixayees ‘pom Iawv tus Vajtswv,’ qhov tseeb tiag yog lawv ua yog toog “pom Vajtswv” xwb. (Khiav Dim 24:9-11) Muaj tej zaus phau Vajlugkub kuj hais tias cov cev Vajtswv lus ‘pom Yehauvas’ thiab. (Yaxayas 6:1; Daniyees 7:9; Amaus 9:1) Thaum muaj li ntawd, hauv ib zaj twg yuav qhia tias lawv tsuas yog ua yog toog pom Vajtswv xwb, tsis yog pom Vajtswv tiag tiag.​—Yaxayas 1:1; Daniyees 7:2; Amaus 1:1.