Yehauvas Cov Tim Khawv ua ntees tuag raws li tej lus qhia hauv phau Vajlugkub.

•   Thaum ib tug peb hlub tas sim neej, peb yeej tu siab thiab quaj. Yexus cov thwj tim los yeej quaj thaum muaj kev ploj kev tuag thiab. (Yauhas 11:33-35, 38; Tes Haujlwm 8:2; 9:39) Thaum ua ib lub ntees tuag, tsis yog lub sij hawm yuav mus ua lom lom vab vab, tiam sis yog lub sij hawm uas peb hlub tshua thiab nplig tsev neeg uas ntsib kev quaj ntsuag.​—Tej Lus Qhia 7:1-4; Loos 12:15.

•   Phau Vajlugkub qhia tias cov tuag tsis paub dab tsi thiab lawv tsis ciaj sia nyob qhov twg li lawm. (Tej Lus Qhia 9:5, 6) Vim li no, peb thiaj tsis ua tej kab lig kev cai uas txhawb txoj kev ntseeg tias tus tuag tseem muaj ib tug ntsuj plig nyob rau qhov twg. Xws li, peb tsis nyiav tus tuag, zov hmo, ntawg tus tuag, xyom los sis thov koob hmoov ntawm tus tuag, thiab tso plig. Txhua yam peb ua, peb ua kom qhuas Vajtswv lub npe. Thiab peb ua raws li phau Vajlugkub hais tias kom tso tej kev cai uas tsis haum Vajtswv siab ‘tseg mus nyob rau ib cag, thiab tsis txhob kov tej uas qias.’​—2 Kauleethaus 6:17.

•   Phau Vajlugkub qhia tias yeej muaj kev cia siab rau cov uas tas sim neej. Cov tuag yuav ciaj sawv rov los thiab yuav muaj ib hnub uas tib neeg yuav tsis txawj ploj tsis txawj tuag li lawm. (Tes Haujlwm 24:15; Tshwmsim 21:4) Txoj kev vam kev cia siab no pab tau cov ntseeg thaum ub thiab cov niaj hnub nim no, kom tsis txhob ua tej kab lig kev cai uas hla Vajtswv Txoj Lus.​—1 Thexalaunikes 4:13.

•   Ua kom tsim nyog xwb. (Pajlug 11:2) Peb tsis ua ntees los qhia tias tus tas sim neej yog ib tug muaj txiag nplua nuj los sis muaj koob nto npe npaum li cas. (1 Yauhas 2:16) Tsis tas li ntawd, thaum ua lub ntees tuag, tsis yog lub sij hawm ua kev lom zem ua nqaj ua nqug.

•   Phau Vajlugkub hais tias, “Vajtswv yuav txiav txim rau txhua leej txhua tus raws li nyias tes hauj lwm.” (Loos 14:12) Yog li, peb tsis yuam ib tug twg ua lub ntees raws li peb ua. Tiam sis yog hais tias muaj neeg xav paub los peb yeej zoo siab hlo qhia tias peb ntseeg li cas.​—1 Petus 3:15.

 Qhov chaw: Nyob ntawm tsev neeg pom zoo seb lawv xav ua lub ntees rau qhov twg. Lawv ua tau rau hauv lub Tsev Nceeg Vaj, hauv ib lub tsev, tom tsev txias, tom qhov chaw uas yuav coj lub cev mus zais, los sis tom qhov chaw uas coj lub cev mus hlawv.

 Lus qhuab qhia: Tus cev zaj lus qhuab qhia yuav muab phau Vajlugkub los nplig tsev neeg tias cov tuag zoo li cas lawm, thiab lawv muaj kev cia siab tias cov tuag yuav ciaj sawv rov los. (Yauhas 11:25; Loos 5:12; 2 Petus 3:13) Tus cev zaj lus qhia kuj piav tau me ntsis txog tus tas sim neej ntawd lub neej seb nws tso tau tus qauv zoo li cas rau peb xyaum.—2 Xamuyees 1:17-27.

 Yog xav hu ib zaj nkauj qhuas Vajtswv ua ke los yeej tau. (Kaulauxais 3:16) Ces mam li thov Vajtswv thiab xaus.​—Filipis 4:6, 7.

 Tsis them nyiaj: Yog xav siv lub Tsev Nceeg Vaj los siv dawb xwb, thiab tus uas cev zaj lus qhia los kuj qhia dawb xwb. Peb tej kev sib txoos los kuj tsis sau nyiaj thiab.​—Mathais 10:8.

 Leej twg xav tuaj koom los tau: Thaum ua ib lub ntees, txhua tus puav leej tuaj koom tau ib yam li thaum peb muaj kev sib txoos.

 Nyias yuav tsum txiav txim siab rau nyias tus kheej seb puas koom los tsis koom. (1 Timautes 1:19) Yog mus los, peb mus saib tus tuag xwb. Peb yuav tsis nrog lawv ua tej kab lig kev cai uas tsis raws li phau Vajlugkub qhia.​—2 Kauleethaus 6:14-17.