Baibel be “bogana lalonai beibi hamasea karana” ia herevalaia lasi, to siri momo ese idia hahedinaraia, Dirava be taunimanima edia mauri, sina ena bogana lalonai ia noho beibi danu, ia laloa bada.

 Mauri be harihari gauna Dirava amo. (Genese 9:6; Salamo 36:9) Ia ese mauri gaudia ibounai ia laloa bada, bogana lalonai beibi danu. Bema ta be mai ura ida bogana lalonai beibi ia hamasea, unai be ala-ala karana.

 Dirava ena Taravatu Israela taudia dekenai ia gwau: “Bema tatau idia heatu bona ta ese rogorogo hahinena ia haberoa bona hahine ia mara, bona unai be ena mara nega korikorina lasi, to sinana bona beibi idia mauri, namona be kerere tauna ese hahine ena adavana ese ia gwauraia davana ia henia, bona hahemaoro taudia edia disisen hegeregerena unai ia karaia be namo. To bema idia ta ia mase, vadaeni ala-ala tauna ia mase danu be namo.”​—Esodo 21:22, 23. a

•  Taunimanima ena mauri be edena negai ia matamaia?

•  Bogana lalonai beibi ia hamasea sina be Dirava ese do ia gwauatao, a?

•  Dika sina o beibi dekenai gorere badana ta ia vara dainai, bogana lalonai beibi idia hamasea be kerere lasi, a?

 Dirava ena lalohadai be hahine ia rogorogo negana amo, ia tubu matamaia beibi be mauri tauna ai ia lao unai. Iena Hereva, Baibel lalonai, Dirava be hanaihanai ia hahedinaraia bogana lalonai ia noho beibi be taunimanima ta. Dirava ese sina ena bogana lalonai ia noho beibi, bona ia vara vadaeni beibi ia lalodia bada karana mani ita itaia.

•   Lauma helaga ena siahu amo King Davida be Dirava dekenai ia gwau: “Egu sinana ena bogana ai lau vara matamaia neganai, lau oi itaia.” (Salamo 139:16) Ena be Davida sinana ese ia do havaraia lasi, to Dirava matanai ia be taunimanima ta.

•   Unai hegeregerena, peroveta Ieremia ia do vara lasi neganai, Dirava ia diba ia be gaukara badana ta do ia karaia. Dirava ese ia dekenai ia gwau: “Sinana ena bogana lalonai oi lau do karaia lasi neganai, oi lau diba. Bona oi do vara lasi neganai, oi lau hahelagaia. Oi be bese idauidau edia peroveta tauna ai lau halaoa.”​—Ieremia 1:5.

•   Baibel torea tauna Luka be doketa ta. Ia ese Grik gado dekenai hereva tamona ia gaukaralaia bogana lalonai ia noho beibi bona ia vara matamata beibi ia herevalaia totona.​—Luka 1:41; 2:12, 16.

 Bogana lalonai beibi ia hamasea sina be Dirava ese ia gwauatao diba. Bema hari idia be Dirava ena lalohadai mauri dekenai idia abia dae, namona be edia kara dika dainai idia lalohisihisi lasi. “Iehova be hebogahisi Diravana . . . Dina ia daekau kahana be dina ia diho kahana amo ia daudau hegeregerena, Ia ese iseda kara dika be ita amo ia kokia lao daudau.” b (Salamo 103:8-12) Iehova ese mai kudouna ibounai ida idia helalo-kerehai taudia, bogana lalonai beibi idia hamasea sina danu, edia kara dika ia gwauatao.​—Salamo 86:5.

 Hari, Baibel ena lalohadai bogana lalonai ia noho beibi dekenai ita diba. Unai dainai, sina o beibi ese reana dika do ia davaria be badina maorona lasi ta ese bogana lalonai beibi ia hamasea totona.

 To, bema emejensi o hekwakwanai badana ta ia vara be edena bamona? Sina do idia hamauria o beibi do idia hamauria? Unai bamona ia vara neganai, tau bona hahine ese disisen do idia karaia daika idia hamauria totona.