Lasi. Idaunega maniuskrip idia hahegeregerea neganai, idia davaria Baibel ena hereva be ia idau lasi, ena be idia dika haraga pepa ai kopi tausen momo idia karaia.

 Baibel maniuskrip gunadia tausen momo idia davaria. Idia haida lalonai hereva haida be idia idau, anina be kopi idia karaia neganai, kerere haida idia karaia. Momo be kerere badadia lasi bona hereva ena anina idia haidaua lasi. To, kerere badadia haida idia davaria, idia be guna Baibel ena hereva idia ura haidaua taudia ese idia karaia. Haheitalai rua mani ita itaia:

1.   Ioane Ginigunana 5:7 ai, Baibel gunadia haida ai inai hereva ia noho: “guba ai, Tamana, Hereva, bona Lauma Helaga: bona idia toi be tamona.” To, maniuskrip haida ese idia hamomokania toretore ginigunana lalonai unai hereva ia noho lasi. Ia be gabeai idia atoa. a Unai dainai, hari Baibel momo lalonai unai hereva idia atoa lasi.

2.   Baibel ena maniuskrip gunadia lalonai, Dirava ena ladana be nega tausen momo ia hedinarai. To, Baibel hahanaia taudia momo ese unai ladana ena gabu ai dagi ladadia idia atoa, hegeregere “Lohiabada” o “Dirava.”

 Hari, maniuskrip momo idia davaria, unai dainai ia auka lasi kerere idia davaria totona. b Unai maniuskrip ese idia hahedinaraia Baibel ena hereva be ia maoro, a?

•   Diba bada tauna William H. Green ese Heberu Toretoredia (“Taravatu Gunana”) ia herevalaia neganai, ia gwau: “Ita gwau diba guna idia torea buka ta be unai bamona idia torea maoromaoro lasi.”

•   Baibel ia diba bada tauna F. F. Bruce ese Keristani Greek Toretoredia, o “Taravatu Matamata” ia herevalaia neganai, ia gwau: “Hamomokania gaudia momo ese idia hahedinaraia iseda Taravatu Matamata ena toretore be maoromaoro, guna idia torea bukadia momo ia hereaia, to taunimanima be unai buka momo edia hereva idia hepapahuahulaia lasi.”

•   Sir Frederic Kenyon, Baibel maniuskrip ia stadilaia tauna ia gwau, ta ese “ena imana dekenai Baibel ia dogoatao bona mai gari lasi ida ia gwau diba, ia dogoatao bukana lalonai Dirava ena Hereva momokani ia noho, guna amo ema bona hari ena hereva ta be ia idau lasi.”

•   Iuda bona Keristani toretore taudia ese Dirava ena taunimanima edia kerere badadia idia torea namonamo. c (Numera 20:12; 2 Samuela 11:2-4; Galatia 2:11-14) Dirava ese Iuda besena ia gwauraia dika badina ia idia kamonai henia lasi, unai sivarai idia torea danu. Bona Baibel ese taunimanima edia hahediba herevadia ia gwauraia kerere karana idia sivarailaia danu. (Hosea 4:2; Malaki 2:8, 9; Mataio 23:8, 9; 1 Ioane 5:21) Unai sivarai ibounai idia torea hanai maoromaoro, unai amo idia hahedinaraia idia ese Dirava ena Hereva helagadia idia abidadama henia bona laloa bada.

•   Dirava ese ena lauma helaga amo Baibel torea taudia ia hasiahua, unai dainai ita diba momokani ena hereva be maoromaoro. d (Isaia 40:8; 1 Petero 1:24, 25) Oibe, ia ura guna taudia bona hari ita noho taudia be Baibel amo diba ita abia. (1 Korinto 10:11) Momokani, “guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.”​—⁠Roma 15:4.

•   Iesu bona ia murinai idia raka taudia be Heberu Toretoredia edia kopi idia gaukaralaia, bona ena hereva idia torea maoro eiava lasi idia hepapahuahulaia lasi.​—⁠Luka 4:16-21; Kara 17:1-3.