Dirava be Gabu Ibounai Ia Noho, A?
Baibel ena haere
Dirava be gau ibounai ia itaia bona ena ura hegeregerena kara ta ia karaia diba. (Aonega Herevadia 15:3; Heberu 4:13) To Baibel ia gwau lasi, Dirava be gabu ibounai o gau ibounai lalonai ia noho. To ia gwau ia be lauma tauna bona ia be mai ena noho gabuna.
Dirava ena toana: Dirava be lauma. (Ioane 4:24) Taunimanima ese ia idia itaia diba lasi. (Ioane 1:18) Baibel ese ia sivarailaia matahanai momo ese Dirava ena noho gabuna korikorina idia hahedinaraia. Baibel ia gwau lasi ia be gabu ibounai ia noho.—Isaia 6:1, 2; Apokalupo 4:2, 3, 8.
Dirava ena noho gabuna: Baibel ia gwau Dirava be guba dekenai ia noho. (1 King Taudia 8:30) Anina be Dirava be tanobada ai o iunives dekenai ia noho lasi, to guba dekenai ia noho. Baibel ia gwau nega ta ai “aneru be Iehova ena vairanai idia gini,” a unai ese ia hahedinaraia Dirava be mai ena noho gabuna.—Iobu 1:6.
Bema Dirava be gabu ibounai ia noho lasi, ia be lau ia laloa, a?
YOibe. Dirava be ita ta ta ia laloa bada. Ena be Dirava be guba dekenai ia noho, to ia ese tanobada ai ia idia hamoalea taudia ia itaia noho, bona idia ia durua. (1 King Taudia 8:39; 2 Sivarai 16:9) Iehova ese ia idia tomadiho henia taudia ia laloa dalana mani ita itaia:
Oi guriguri neganai: Iehova be emu guriguri ia kamonai diba.—2 Sivarai 18:31.
Oi lalohisihisi neganai: “Iehova be lalometau taudia kahirakahira ia noho. Ia ese daradoko taudia ia hamauria noho.”—Salamo 34:18.
Heduru oi ura neganai: Iehova ese ena Hereva, Baibel amo “oi dekenai aonega do [ia] henia bona . . . oi do [ia] hadibaia.”—Salamo 32:8.
Dirava be gabu ibounai ia noho dainai idia vara lalohadai kereredia
Lalohadai kererena: Dirava be ia havaraia gaudia ibounai lalonai ia noho.
Lalohadai maorona: Dirava be tanobada ai o iunives dekenai ia noho lasi. (1 King Taudia 8:27) Momokani, hisiu bona Dirava ia havaraia gaudia ma haida ese “ena hairai idia gwauraia noho.” (Salamo 19:1) To, Dirava be ia havaraia gaudia lalonai ia noho lasi, laulau penia tauna be ia penia laulau lalonai ia noho lasi hegeregerena. To unai laulau amo laulau penia tauna ita dibaia diba. Unai hegeregerena, ita itaia gaudia amo Havaraia Tauna ena “kara idauidau” ita dibaia, hegeregere ena siahu, aonega, bona lalokau.—Roma 1:20.
Lalohadai kererena: Dirava be gabu ibounai ia noho dainai, ia be gau ibounai ia diba bona ena siahu be bada.
Lalohadai maorona: Dirava ena lauma helaga be Dirava ena gaukara siahuna. Iena lauma helaga amo, Dirava be gau ibounai ia diba bona karaia diba, ena be gabu ta ai ia noho lasi.—Salamo 139:7.
Lalohadai kererena: Salamo 139:8 ese ia hahedinaraia Dirava be gabu ibounai ia noho. Ia gwau: “Bema guba dekenai lau daekau lao, oi be unuseniai oi noho, bema Mase Gurina dekenai egu mahuta gabuna lau karaia, oi be unuseniai oi noho danu.”
Lalohadai maorona: Inai siri be Dirava ia noho gabuna ia herevalaia lasi. To ia hahedinaraia herevana edeseniai ita noho, Dirava be ita ia durua diba.
a Iehova be Dirava ena ladana, Baibel ese ia hahedinaraia hegeregerena.
Reana Inai Danu Oi Ura
BAIBEL ENA MAI ANINA BADA HAHEDIBA HEREVADIA
Dirava be Momokani ia noho, A?
Hamomokania gaudia amo do oi itaia Dirava ita abidadama henia diba.
BAIBEL HENANADAI EDIA HAERE
Lauma Helaga be Dahaka?
Badina maorona dainai, Baibel ia gwau lauma helaga be Dirava ena “imana.”
AI KARAIA GAUDIA
Vadivadi Totona Oi Noinoi
Baibel ena henanadai herevalaia, eiava Iehova ena Witnes taudia io diba namonamo.