Daidia be Guba Do Idia Lao?
Baibel ena Haere
Dirava ese abidadama Keristani haida sibona ia abia hidi, bona idia mase murinai, idia toreisi lou bona guba ai do idia lao. (1 Petero 1:3, 4) Idia ia abia hidi dainai, namona be edia Keristani abidadama ia goada bona edia kara danu ia goeva noho, unai amo edia guba ahuna do idia haboioa lasi.—Efeso 5:5; Filipi 3:12-14.
Guba dekenai do idia lao taudia be dahaka do idia karaia?
Idia be lagani 1,000 lalonai Iesu ida king bona hahelaga gaukara do idia karaia. (Apokalupo 5:9, 10; 20:6) Idia be “guba matamata,” o guba gavamani lalonai do idia gaukara, bona “tanobada matamata,” o tanobada ai do idia noho taudia do idia lohiaia. Unai guba lohia taudia ese taunimanima do idia durua bona guna Dirava ena ura hegeregerena ai, tanobada be kara maoromaoro gabuna ai do idia halaoa.—Isaia 65:17; 2 Petero 3:13.
Hida do idia toreisi lou bona guba maurina do idia abia?
Baibel ia hahedinaraia taunimanima 144,000 sibona be guba maurina do idia abia. (Apokalupo 7:4) Apokalupo 14:1-3 ai, aposetolo Ioane be matahanai ta ia itaia, “Mamoe Natuna be Siona Ororo dekenai ia gini bona ia ida be taunimanima 144,000.” Inai matahanai lalonai “Mamoe Natuna” be Iesu ia laulaulaia. (Ioane 1:29; 1 Petero 1:19) “Siona Ororona” be guba ai Iesu bona ia ida do idia lohia 144,000 taudia edia ena dagi badana ia hahedinaraia.—Salamo 2:6; Heberu 12:22.
Baibel ia gwau “Dirava ese ia boiria bona ia abia hidi” Iesu ida Basileia lalonai do idia lohia taudia be ‘orea maragina.’ (Apokalupo 17:14; Luka 12:32) Unai ese ia hahedinaraia Iesu ena mamoe ibounai amo, idia be momo lasi.—Ioane 10:16.
Guba dekenai do idia lao taudia dainai idia vara lalohadai kereredia
Kererena: Taunimanima namodia ibounai be guba dekenai do idia lao.
Maorona: Dirava ia gwauhamata taunimanima namodia be tanobada ai mauri hanaihanai do idia abia.—Salamo 37:11, 29, 34.
Iesu ia gwau: “Tau ta be guba dekenai ia daekau lasi.” (Ioane 3:13) Iesu ia hahedinaraia guna idia mase abidadama taudia hegeregere Aberahamo, Mose, Iobu, bona Davida, be guba dekenai idia lao lasi. (Kara 2:29, 34) To, do idia toreisi lou bona tanobada ai mauri hanaihanai do idia abia.—Iobu 14:13-15.
Guba lao taudia be “toreisi lou ginigunana” do idia abia. (Apokalupo 20:6) Unai ese ia hahedinaraia toreisi lou ma ta do ia vara. Unai be tanobada ai do ia vara.
Baibel ese ia hahedinaraia Dirava ena Basileia ia lohia neganai, “mase, . . . be do ia ore.” (Apokalupo 21:3, 4) Unai gwauhamata be tanobada ai do ia vara gauna, badina guba ai mase be lasi.
Kererena: Ta ta idia abia hidi guba ai o tanobada ai do idia noho.
Maorona: Dirava sibona ese abia hidi ia karaia edena abidadama Keristani taudia be “guba lao boiboina ena ahuna” do idia abia, unai be guba maurina ena helaro. (Filipi 3:14) Tau ta be sibona ena ura dainai, guba ai do ia lao lasi.—Mataio 20:20-23.
Kererena: Taunimanima haida be idia hegeregere lasi dainai, tanobada ai mauri hanaihanai idia abia.
Maorona: Dirava ese tanobada ai mauri hanaihanai do idia abia taudia ia boiria “egu taunimanima,” “egu abia hidi taudia,” bona “Iehova ese ia hanamoa taudia.” (Isaia 65:21-23) Idia ese Dirava ena ura ginigunana taunimanima totona do idia hagugurua, unai be tanobada paradaisona lalonai mauri hanaihanai goevadaena do idia noholaia.—Genese 1:28; Salamo 115:16; Isaia 45:18.
Kererena: Apokalupo bukana ese ia gwauraia namba 144,000 be laulau herevana, ia be namba korikorina lasi.
Maorona: Ena be Apokalupo bukana be laulau dalanai namba momo ia gaukaralaia, to haida be namba korikoridia. Hegeregere, “Mamoe Natuna ena aposetolo taudia 12 edia ladana” ia gwauraia. (Apokalupo 21:14) Mani 144,000 be namba korikorina ena badina haida ita laloa.
Apokalupo 7:4 ia gwau “maka [o, guba maurina do idia abia ena gwaumaoro] idia abia taudia edia namba . . . ibounai be 144,000.” Unai siri badinai orea ma ta ia gwauraia idia be “hutuma bada . . . ta ese idia ia duahia diba lasi.” Idia be Dirava amo hahemauri idia abia danu. (Apokalupo 7:9, 10) Bema unai namba 144,000 be laulau sibona, ma ta ese ia duahia diba lasi oreana ta ia herevalaia danu, unai orea rua edia idau do ita diba lasi. a
Ita laloa gauna ta be, Baibel ia gwau 144,000 taudia be “huahua ginigunadia bamona, bona Dirava ese taunimanima huana amo idia ia hoia.” (Apokalupo 14:4) Unai hereva “huahua ginigunadia” ia hahedinaraia idia be Dirava ese ia abia hidi orea maragina. Unai ese guba ai Keriso ida do idia lohia taudia ia gwauraia hedinarai goevagoeva, bona idia ese tanobada ai hutuma bada taudia do idia lohiaia.—Apokalupo 5:10.
a Unai hegeregerena, Profesa Robert L. Thomas be ena buka ta ai Apokalupo 7:4 ese ia gwauraia 144,000 ena namba ia herevalaia, ia gwau: “Ia be namba korikorina ta bona siri 9 ese ia gwauraia duahia diba lasi oreana amo ia idau. Bema ia be laulau sibona, vadaeni Apokalupo bukana ese ia gwauraia namba iboudiai be laulau herevadia sibona.”—Apokalupo 1-7: An Exegetical Commentary, rau 474.
Reana Inai Danu Oi Ura
MAI ANINA BADA BAIBEL HADIBAIA HEREVADIA
Dirava Ena Basileia be Dahaka?
Iesu ena hesiai gaukara negana lalonai, iena hahediba herevadia ibounai amo Dirava ena Basileia herevana ia hadibaia momo. Lagani handred momo lalonai, ena murinai idia raka taudia be Basileia ia mai totona idia guriguri.
