Mero ta ladana Will ia gwau: “Bema Baibel duahia dalana maorona oi diba lasi, Baibel be borin.”

 Oi ura diba edena dala ai Baibel duahia karana do oi moalelaia, a? Inai atikol ese oi do ia durua.

•  Siri oi Hamauridia

•  Tahua gaukara oi karaia!

•  Emu turadia edia hereva

 Oi duahia gauna do oi piksaia. Inai dala oi badinaia diba:

1.   Baibel sivarai ta oi abia hidi oi stadilaia totona. Evanelia bukana ta amo sivarai ta o siri haida oi abia hidi, eiava jw.org ai idia rekodia Baibel duahiduahi ta oi abia hidi diba.

2.   Oi duahia. Oi sibona, turadia haida o ruma bese taudia ida oi duahia diba. Ta ese sivarai ia gwauraia tauna ena kahana ia duahia bona haida be unai sivarai lalonai idia noho taudia ta ta edia hereva idia duahia diba.

3.   Inai dala ta o rua oi badinaia diba:

   •   Unai sivarai ena laulau haida oi torea. Eiava nega ta ta ai idia vara gaudia be laulau ta ta amo oi hahedinaraia. Unai laulau badinai ia vara noho gauna be hereva haida amo oi hahedinaraia.

   •   Abidadama tauna ta ena sivarai oi duahia neganai, iena kara namodia, ia karaia gaudia bona Dirava amo ia abia hahenamo oi torea.

   •   Unai sivarai be nius bamona oi herevalaia bona kahana idauidau amo oi ripotilaia. Unai abidadama tauna bona ia karaia gaudia idia itaia taudia oi “intaviu” henidia.

   •   Bema unai sivarai lalonai ia noho tauna ta be disisen kererena ia karaia, reana ia ese disisen maorona ia karaia diba dalana oi laloa. Hegeregere, Petero ia gwau Iesu ia diba lasi sivaraina. (Mareko 14:66-​72) Edena dala ai Petero ese unai hekwakwanai be dala maorona ai ia hanaia diba?

   •   Bema oi hegeregere, unai Baibel sivarai ena drama ta oi torea. Unai sivarai amo oi dibaia point badadia oi hahedinaraia diba.​​—Roma 15:4.

 Bema unai sivarai ena kahana idauidau oi tahua namonamo, idia hunia noho dava bada gaudia do oi davaria. Nega haida, unai sivarai lalonai hereva ta o hereva rua be mai anina bada.

 Hegeregere, mani Mataio 28:7 be Mareko 16:7 ida oi hahegeregerea.

•    Dahaka dainai Mareko ese ia hahedinaraia Iesu be kahirakahira ena hahediba taudia “bona Petero” dekenai do ia hedinarai?

•  Point ta: Inai ese ia hamomokania unai gaudia idia vara neganai, Mareko be ia noho lasi, to unai sivarai be Petero ese ia hamaoroa.

•  Ia hunia dava bada gauna: Petero ia kamonai Iesu ia ura ia do ia itaia neganai, dahaka dainai unai ese Petero ena lalona ia hagoadaia? (Mareko 14:66-​72) Edena dala ai Iesu ia hamomokania ia be Petero ena tura korikorina? Edena dala ai oi ese Iesu ena kara oi tohotohoa bona ma haida edia tura korikorina ai oi lao diba?

 Baibel ena sivarai oi hamauria bona edia kahana idauidau oi tahua namonamo neganai, Baibel duahia karana do oi moalelaia bada!