Headava taudia haida be idia tura namonamo lasi dainai, idia laloa natudia edia namo totona idia divos be namo. Namo lasi natudia be hepapahuahu momo tama eiava sina ida do idia noho. To, idia vara gaudia ese dahaka idia hahedinaraia?

•  Natudia dekenai dahaka gaudia idia vara?

•  Bema lau divos egu natuna do ia moale, a?

•  Natudia naria totona dahaka lau diba be namo?

•  Dala namona ta ia noho headava hamaoromaoroa totona, a?

 Tahua gaukara ena ripoti ia hahedinaraia, divos karana ese natudia dekenai metau bada ia henia. Idia divos taudia edia natudia be:

•   badu, lalohekwarahi, bona lalometau idia mamia

•   sibodia dekenai eiava ma haida dekenai hekwakwanai idia havaraia

•   sikuli dekenai maka namona idia abia lasi bona sikuli lao karana idia hadokoa

•   gorere idia abia haraga diba

 Unai sibona lasi, natudia momo idia gwau unai be edia kerere, idia laloa tama sina idia koudia lasi eiava edia kara ta dainai tama sina idia divos.

 Divos taudia edia natudia idia tubu daekau lalonai, mauri ena hekwakwanai idauidau idia davaria bona do idia mamia idia be anina lasi, danu do ia auka ma haida idia trast totona. Reana, bema edia headava lalonai hekwakwanai idia vara, do idia divos danu.

 Laloatao: Herevana divos idia lalohadailaia headava taudia haida idia gwau, unai be edia natudia ena namo totona, to tahua gaukarana ese unai ia hamomokania lasi. Childcare gaukarana ia diba momo hahine, Penelope Leach a ese inai hereva ia torea, ia gwau: “Divos karana dainai natudia idia moale lasi.”

 Baibel ena hakaua hereva: “Umui sibona emui namo do umui laloa lasi, to ma haida edia namo do umui laloa danu.”​—Filipi 2:4.

 Reana haida do idia gwau, oibe. To laloatao, tama sina edia hemami be natudia edia hemami amo ia idau. Ta be divos ia laloa badina ia ura mauri matamata. To nega momo natuna mero eiava kekeni be do ia ura iena Tamana bona Sinana idia noho hebou.

 The Unexpected Legacy of Divorce bukana idia torea hahine toi be divos tama sina edia natudia idia intaviu henia murinai, inai hereva idia torea: “Sivarai ese ia hahedinaraia: natudia edia moale ia ore. Maoromaoro idia gwau, ‘Egu tama sina idia divos negana amo egu matamata maurina ia dika.’” Unai buka ma ia gwau, natudia edia lalohadai dekenai tanobada be, “seif lasi gabuna badina idia laloa edia mauri lalonai do idia tura henia namonamo taudia rua ese do idia naridia lasi.”

 Laloatao: Tama sina idia divos murinai, natudia do idia moale lasi.

 Baibel ena hakaua hereva: “Lalohisihisi kudouna ese ta ena goada ia haorea.”​—Aonega Herevadia 17:22.

 Divos tama sina haida idia laloa natuna naria ena maduna do idia haria, unai amo rua ese unai gaukara do idia karaia diba. To, emu natudia bona oi adavaia tauna ena natudia naria be mai ena hekwarahi. Tahua gaukaradia ese idia hahedinaraia nega momo divos tau bona hahine be:

•   nega lasi edia natudia ida idia noho totona

•   tamana ena hadibaia karana be sinana ena hadibaia karana amo ia idau

•   idia mamia unai be edia kerere eiava idia hesiku dainai natudia edia ura idia abia dae

 Divos karana dainai natuna be tama sina matauraia lasi karana do ia mandalaia. To tama sina ese mai anina bada gaudia dekenai edia hereva idia hamomokania lasi, eiava do idia noho hebou ena gwauhamata idia badinaia lasi neganai, unai do ia vara. Natuna do ia laloa ‘Dahaka dainai idia do lau kamonai henia?’

 Laloatao: Divos taudia ese edia natudia bona idia adavaia tauna ena natudia idia naria be mai ena hekwarahi. Bona do ia auka momokani natudia totona.

 Baibel ena hakaua hereva: “Emui natudia do umui habadua lasi, dika idia lalohisihisi.”​—Kolose 3:21.

 Nega momo divos murinai, headava taudia ese edia mauri lalonai nega bada do idia gaukaralaia headava idia gimaia totona. Buka ladana The Case for Marriage ia gwau: “Headava ia dika ese ia hahedinaraia lasi hanamoa lou dalana ta be lasi.” Unai buka ma ia gwau: “Nega ia hanaia lalonai, headava taudia momo be gabeai idia moale badina idia noho hebou.” Inai gaudia oi laloa, natudia do idia gaukara goada bema idia itaia tama sina be idia noho hebou.

 Unai ese ia hahedinaraia lasi divos totona abia hidi idia karaia be kerere. Badina, Baibel ia gwau ta ia divos diba bema matabodaga karana ia vara. (Mataio 19:9) To, Baibel ia gwau: “Aonega tauna be do ia karaia gaudia ia laloa namonamo guna.” (Aonega Herevadia 14:15) Headava tatau bona hahinedia ese headava ena hekwakwanai lalonai gau ibounai do idia laloa namonamo​—divos ese natudia do ia hahekwakwanaia gaudia danu.

 Momokani, metau idauidau ia haheaukalaia tauna be dala do ia tahua lasi unai ia haidaua totona. Baibel ena sisiba namodia ese headava tau bona hahine dekenai heduru ia henia diba, haheauka karana bona headava ena mauri moalelaia dalana idia dibaia totona. Unai be momokani, badina Baibel Torea Tauna, Iehova, ese headava ena palani ia karaia.​—Mataio 19:4-6.

 Baibel ena hakaua hereva: “Lau, Iehova, be emui Dirava, Lau ese umui lau hadibaia noho, namo umui davaria totona.”​—Isaia 48:17.