Matamata taudia haida be edia tama sina ese idia atoa horana ai ruma dekenai idia giroa lasi. Haida be edia tama sina idia koia o idia hahediba lasi bona ruma idia rakatania edia turadia idia bamoa totona. Bema emu natuna be unai ia karaia, dahaka do oi karaia?

•  Egu natuna be gwau-edeede natuna, a?

•  Egu natuna ia koikoi momo be edena bamona?

•  Daika ena kerere?

•  Edena bamona egu natuna lau durua diba?

•  Tama sina edia hereva

 Lasi. Baibel ia gwau: “Matamata tauna ena kudouna ai kavakava lalohadai ia noho,” bona matamata taudia edia kara ese inai siri idia hamomokania. (Aonega Herevadia 22:15, futnout) Dr. Laurence Steinberg ia gwau: “Matamata taudia momo be idia laloa namonamo lasi bona abia hidi kereredia idia karaia. Unai dainai kerere ia vara diba.” a

 Namo lasi oi laloa emu natuna be ia ura lasi emu hereva ia kamonai. Tahua gaukarana ese ia hahedinaraia matamata taudia be edia tama sina edia lalohadai idia laloa bada, ena be edia kara amo unai idia hahedinaraia lasi. Herevana emu natuna ia hahedinaraia lasi, to reana sibona ena kara dainai ia moale lasi​—bona ia lalohisihisi badina emu lalona ia hahisia.

•    Ia bamoa taudia, a? Baibel ia gwau: “Hebamo dikadia ese ta ena kara namodia idia hadikaia diba.” (1 Korinto 15:33) Oibe, matamata taudia edia kara be edia turadia ese idia haidaua diba. Unai sibona lasi, social media bona advataismen idauidau danu. Ma danu, matamata taudia edia diba mauri dekenai be bada lasi, unai dainai abia hidi kereredia idia karaia diba. Momokani, idia be lo taudia namodia ai idia lao totona, edia abia hidi dainai idia vara hekwakwanai be sibodia ese idia huaia be namo.

•    Inai be egu kerere, a? Reana oi laloa emu kara be auka dainai, emu natuna be unai ia karaia. Eiava nega haida oi laloa reana emu natuna oi sisiba henia lasi bona maoro oi henia sibona ena ura ia badinaia totona. Namo lasi hekwakwanai ia vara ena badina sibona oi laloa, to hekwakwanai hamaoromaoroa dalana oi laloa be namo.

•   Sibona oi biagua. Reana emu natuna ia diba do oi badu. Unai dainai kara ma ta oi karaia diba, a? Mai manau ida emu natuna danu hekwakwanai ena badina umui herevalaia. Unai ia vara badina ia ura tohoa, a? Ia hesiku, a? Sibona ia noho, a? Ia be turana lasi, a? Hekwakwanai be ia vara vadaeni, to unai ese oi bona emu natuna ia durua, unai hekwakwanai ena badina umui lalopararalaia totona.

   Baibel ena hakaua herevana: “Do idia kamonai haraga, to do idia hereva haraga lasi, bona do idia badu haraga lasi.”​—Iamesi 1:19.

•   Emu natuna durua ia vara gauna ia herevalaia totona. Oi nanadaia, Ia vara gauna amo dahaka oi dibaia? Bema inai ia vara lou, dahaka do oi karaia? Unai bamona henanadai ese emu natuna do ia durua vaira nega ai abia hidi maorona ia karaia totona.

   Baibel ena hakaua herevana: “Mai haheauka ida bona hadibaia dala namona ai idia do oi sisiba henia, oi hereva auka henia, bona oi hagoadaia.”​—2 Timoteo 4:2.

•   Edia kara ena ahuna hahedinaraia. Natuna durua totona, ena kara hegeregerena oi panisia. Hegeregere, bema emu natuna be fon ia gaukaralaia momo bona homwek o ruma gaukara ia karaia lasi, reana taravatu oi atoa dina haida lalonai fon do ia gaukaralaia lasi.

   Baibel ena hakaua herevana: “Tau ta ese ia hadoa gauna, unai gauna sibona do ia abia.”​—Galatia 6:7.

•   Natuna durua dalana laloa. Momokani, unai be do ia vara haraga lasi. To namona be emu natuna ia diba, nega ia hanaia lalonai, ena kara amo ena tama sina ia hamoalea diba. Namona be unai ia lalopararalaia. Bema emu natuna ia mamia iena kara amo oi ia hamoalea diba lasi, reana do ia hesiku.

   Baibel ena hakaua herevana: “Emui natudia do umui habadua lasi, dika idia lalohisihisi.”​—Kolose 3:21.