Iena hahine ese hunia dekenai ia karaia gauna ia davaria. Bena tau be mai lalona ibounai ida ia sori. Ia gwauhamata unai kara do ia hadokoa, bona nega sisina lalonai unai ia badinaia. Gabeai unai ura ia goada lou, bona unai kara ia karaia loulou.

 Oi dekenai unai ia vara noho, a? Bema oibe, namona be ponografi manadalaia karana ese emu adavana ena hemami ia hadikaia dalana oi lalopararalaia, bona unai kara do oi karaia lou lasi dalana oi laloa. a

Inai atikol ai

•  Inai oi diba be namo

•  Oi karaia diba gauna

•  Bema emu tau be ponografi ia itaia

 Ponografi ese headava ia hadikaia diba. Unai kara ese kerere lasi adavana ia habadua diba bona ena adavana do ia trast lou lasi. b

 Ponografi ia itaia headava tauna ena hahine be inai hemami ia abia diba:

•   Ta ese ia koia. Headava hahine ladana Sarah ia gwau, “Lau mamia, unai be hegeregere egu tau be ia heudahanai loulou.”

•   Ia be hegeregere lasi. Headava hahine ta ia gwau ena tau be ponografi ia itaia momo karana dainai ia mamia ia be “hairai lasi bona ia hemarai.”

•   Ia trast diba lasi. Headava hahine ta ladana Helen ia gwau, “Egu tau ese ia karaia gaudia ibounai lau trast lasi.”

•   Lalohekwarahi. Headava hahine ta ladana Catherine ia gwau, “Egu mauri ai egu tau ese ia manadalaia karana dainai lau lalohekwarahi.”

 Inai oi laloa: Baibel ese headava tauna ia hamaoroa ena hahine do ia lalokau henia. (Efeso 5:25) Bema tau ena kara dainai hahine ia mamia ataiai ita gwauraia gauna ta be ia dekenai ia vara, tau be unai sisiba ia badinaia, a?

 Ponografi itaia karana hadokoa totona be mai ena hekwarahi. Headava hahine ta ladana Stacey ia gwau, “Egu tau be siga, mariuana, bona alkahol ia dadaraia. To ponografi itaia karana ia hadokoa be auka.”

 Bema oi dekenai unai ia vara, henunai idia noho heduru herevadia ese oi do ia durua unai kara oi hadokoa momokani totona.

•   Ponografi ena dika oi lalopararalaia. Ponografi ese ta dekenai sibona ena ura hagugurua urana ia havaraia, bona headava lalonai lalokau, trast, bona ta ta badinaia karana ia hadikaia. Danu headava ia Havaraia Tauna, Iehova Dirava, matauraia karana ia hadikaia.

   Baibel ena hakaua hereva: “Taunimanima ibounai ese headava idia matauraia be namo.”​—Heberu 13:4.

•   Emu kara dainai ia vara dika oi hamaoromaoroa. Namo lasi oi gwau, ‘Ponografi do lau itaia lasi bema egu hahine be lau ia lalokau henia.’ Emu hahine oi bleim be maoro lasi, bona emu lalona ia hahisia neganai namo lasi unai be emu ekskius ai oi halaoa ponografi oi itaia lou totona.

   Baibel ena hakaua hereva: “Ta be sibona ena ura ese ia tohoa, unai ura ese ena lalona ia veria bona ia koia.”​—Iamesi 1:14.

•   Mai momokani ida emu hahine ida oi herevahereva. Headava tauna ta ladana Kevin ia gwau: “Dina ta ta egu adavana lau nanadaia. Lau be ura dikadia ia havaraia gauna ta lau raraia, eiava lasi? Unai kara ese dala ia kehoa emai huanai gau ta ai hunia lasi totona.”

   Baibel ena hakaua hereva: “Ai ura mai momokani ida gau ibounai ai karaia.”​—Heberu 13:18.

•   Oi noho hegaegae. Oi manadalaia karana ta oi karaia lou diba ena be lagani momo lalonai unai kara oi hadokoa vadaeni. Kevin, matamanai ita herevalaia tadikaka, ia gwau: “Lagani 10 lalonai ponografi itaia karana lau hadokoa bona lau laloa unai hekwakwanai lau hanaia vadaeni. To lau manadalaia karana be nega daudau lalonai ia hunia dagedage animal ta bamona, nega maorona ia naria lau ia hahisia lou totona.”

   Baibel ena hakaua hereva: “Bema tau ta ia laloa ia gini goada noho, namona be ia naria namonamo, dika ia moru garina.”​—1 Korinto 10:12.

•   Bema hahetoho oi davaria, oi naria. Momokani reana unai ura dikana abia karana oi koua diba lasi, to abia hidi oi karaia diba bema unai ura dikana oi badinaia eiava lasi. Unai ura dikana do ia ore haraga diba bema emu lalohadai oi haidaua haraga bona gau ma haida oi laloa.

   Baibel ena hakaua hereva: “Umui ta ta ese helaga bona hemataurai dalanai, sibona emui tauanina biagua dalana umui diba be namo, to namo lasi mai mataganigani ida matabodaga karadia umui ura henia.”​—1 Tesalonika 4:4, 5.

•   Oi manadalaia karana ena hahetoho ia havaraia gaudia oi dadaraia. Buka ta ladana Willpower’s Not Enough ia gwau, “Bema oi be hahetoho do oi davaria negana ta ai oi noho, unai be masisi amo lahi oi hamatamaia bamona. Fuel sisina oi atoa neganai . . . lahi do ia habadaia.”

   Baibel ena hakaua hereva: “Dika gauna ta ese lau ia biagua lasi be namo.”​—Salamo 119:133.

•   Hesiku lasi. Nega daudau eiava reana lagani haida ia hanaia diba, emu adavana ese oi ia trast lou totona. To headava taudia momo edia sivarai amo ita hamomokania, ta ta idia trast lou diba.

   Baibel ena hakaua hereva: “Lalokau be ia haheauka.”​—1 Korinto 13:4.