•  Inai oi diba be namo

•  Inai oi karaia diba

•  Tama sina edia hereva

 Hari tano haida ai, natudia edia hetura karana edia tama sina ida be goada bona edia hakaua herevadia idia badinaia. Tano ma haida ai, natudia be nega momo edia uru taudia edia hereva idia badinaia.

 To unai idia karaia neganai, idia be edia tama sina idia matauraia lasi. Mauri lagani 13 ia lao 19 idia abia neganai, reana tama sina idia mamia ia auka edia natudia idia biagua totona. To ita hoa lasi! Natudia edia nega bada be natudia ma haida ida idia haorea neganai, unai be hegeregere edia tama sina ese idia naridia lasi, to sibodia idia naria heheni.

 Dahaka dainai ia auka lasi natudia be edia uru taudia idia tura henia totona, to edia tama sina lasi? Badina haida mani ita laloa.

•   Sikuli. Natudia be natudia ma haida idia bamoa momo neganai, edia hetura karana ia goada bona edia uru taudia edia hereva idia laloa bada matamaia, to edia tama sina edia lalohadai idia dadaraia. Natudia be mauri lagani 13 ia lao 19 idia abia neganai, unai kara be bada.

•   Hebamo momo lasi. Famili momo ai, natudia be sikuli amo idia giroa neganai, ruma ai ta ia noho lasi, reana badina edia tama sina idia gaukara.

•   Matamata edia mauri dalana. Natudia idia bada neganai, matamata taudia ma haida edia dabua hahedokilaia dalana, edia hereva, bona kara idia tohotohoa. Edia uru taudia edia lalohadai idia laloa bada, to edia tama sina edia lalohadai idia dadaraia.

•   Bisinesi karadia. Bisinesi momo ese idia hoihoilaia gaudia bona halasia moale karadia momo be matamata taudia sibona totona, unai dainai tama sina bona natudia idia laloparara heheni be auka. Dr. Robert Epstein ia gwau: “Bema matamata taudia edia mauri dalana be lasi, bisinesi badadia edia moni karaia dalana do ia dika.” a

•   Emu hetura karana emu natuna ida ia goada be namo.

   Baibel ia gwau: “Hari dina umui dekenai lau henia oda hereva be emui kudouna ai idia noho be namo, bona namona be emui natudia dekenai umui gwauraia loulou, emui ruma ai umui helai, dala dekenai umui raka, umui hekure, bona umui toreisi neganai, unai do umui herevalaia.”​—Deuteronomi 6:6, 7.

   Edia uru taudia be edia turadia ai idia lao diba, to tama o sina ena maduna idia abia lasi be namo. Laloatao: Diba bada taudia idia gwau natudia bona matamata taudia momo be edia tama sina idia matauraia bona idia ura hamoaledia. Bema emu hetura karana emu natudia ida be ia goada, emu hakaua herevadia do idia badinaia.

   “Emu natudia oi bamoa, dina ta ta ai gau idauidau umui karaia hebou, hegeregere umui nanadu, gabu umui hagoevaia, bona edia homwek umui karaia. Umui moale hebou​—gadara haida umui karaia, muvi o TV umui itaia. Namo lasi umui laloa emu natudia totona hora haida sibona umui atoa be hegeregere. Emui hetura karana be hora haida sibona lalonai do ia goada lasi!”​—Lorraine.

•   Namo lasi ena uru taudia sibona ia bamoa.

   Baibel ia gwau: “Mero ena kudouna ai kavakava lalohadai ia noho.”​—Aonega Herevadia 22:15, futnout.

   Tama sina haida idia itaia edia natuna ena turadia be momo neganai, idia moale. To naria namonamo, ena be ena turadia be momo, to lo tauna ai ia lao totona, mauri lagani idauidau taudia ia tura henia be namo. Ena uru taudia ese idia henia sisiba ese ia do ia durua lasi, to lalokau dainai tama sina ese idia henia sisiba ese ia do ia durua bada.

   “Natu ta ena uru taudia be reana gau haida idia diba, to edia diba o aonega be hegeregere lasi matamata taudia ma haida idia durua abia hidi namodia idia karaia totona. Matamata taudia be edia tama sina edia heduru idia tahua neganai, edia mauri lagani hegeregerena idia tubu daekau diba.”​—Nadia.

•   Hakaua hereva namodia henia.

   Baibel ia gwau: “Aonega taudia ida ia raka tauna be do ia aonega.”​—Aonega Herevadia 13:20.

   Idia bada neganai, namo bada do idia davaria, badina idia totona nega oi atoa. Haheitalai namona oi hahedinaraia.

   “Natudia be edia tama sina idia tohotohoa. Bema natudia dekenai tama sina matauraia karana idia hadibaia, idia bada neganai, unai do idia badinaia.”​—Katherine.