Teknoloji gaukaralaia karana ese emu headava ia hanamoa o hadikaia diba. Emu headava lalonai be edena bamona?

•  Inai oi diba be namo

•  Inai oi karaia diba

•  Headava taudia edia hereva

•  Herevalaia hebou

•   Teknoloji gaukaralaia namonamo karana ese headava ia durua diba. Hegeregere, headava taudia haida be gabu idauidau idia noho neganai, teknoloji amo edia adavana idia hereva henia diba.

   “Teks meseij kwadogina ai oi gwau, ‘Oi lau lalokau henia’ o ‘Oi lau laloa noho’ ese emu hetura karana ia hagoadaia diba.”​—Jonathan.

•   Teknoloji gaukaralaia namonamo lasi karana ese headava ia hadikaia diba. Hegeregere, haida be hanaihanai edia fon idia gaukaralaia dainai, idia be nega lasi edia adavana ida idia herevahereva o gau ma haida idia karaia totona.

   “Lau diba nega haida reana egu tau ia ura lau ia hereva henia, to egu fon lau gaukaralaia dainai, unai ia karaia lasi.”​—Julissa.

•   Haida idia gwau idia be fon idia gaukaralaia noho lalonai edia tau o hahine ida idia herevahereva namonamo diba. Diba bada hahinena Sherry Turkle ia gwau, unai be “gau rua nega tamona idia karaia taudia edia lalohadaina kererena.” Momokani, gau rua nega tamona karaia karana be lalohadai kererena. Ia gwau, “gau rua nega tamona ita karaia neganai, gau ta ta do ita karaia namonamo lasi.” a

   “Egu adavana ida herevahereva karana lau moalelaia, bema ia be gau ma ta ia karaia lasi. Bema ia be gau ma ta ia karaia, lau mamia iena nega bada be unai gauna dekenai do ia henia.”​—Sarah.

 Laloatao: Teknoloji oi gaukaralaia dalana ese emu headava ia durua o hadikaia diba.

 Oi atoa guna gaudia. Baibel ia gwau: “Mai anina bada gaudia do umui diba.” (Filipi 1:10) Sibona oi nanadaia, ‘Lau bona egu adavana ese emai nega bada be emai fon dekenai ai haorea, bona herevahereva totona ai be nega lasi, a?’

 “Aniani gabuna ta ai, lau itaia headava tau bona hahine be idia aniani noho lalonai edia fon sibona idia gaukaralaia. Ita ura lasi iseda nega bada be teknoloji dekenai ita haorea bona mai anina bada gauna ita laloaboio​—unai be iseda hetura karana.”​—Matthew.

 Nega atoa. Baibel ia gwau: “Emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka. Emui nega do umui gaukaralaia namonamo.” (Efeso 5:15, 16) Sibona oi nanadaia, ‘Meseij idia ginidae neganai, haraga lau duahia bona haere eiava nega lau atoa unai lau karaia totona?’

 “Lau mamia egu fon ena regena lau koua bona nega maorona ai meseij lau itaia karana be heduru bada. Badina nega ta ta sibona ai imejensi kol, meseij, o e-mail lau abia bona lau haere haraga.”​—Jonathan.

 Bema namo, emu gaukara be gaukara gabunai oi rakatania. Baibel ia gwau: “Gau ibounai be mai edia nega korikori.” (Hadibaia Tauna 3:1) Sibona oi nanadaia: ‘Ruma ai egu fon amo egu gaukara lau karaia, a? Bema oibe, unai ese egu headava ia durua, a? Egu adavana be dahaka do ia gwau?’

 “Teknoloji dainai, gabu o nega idauidau ai ita gaukara diba. Lau bona egu hahine ai noho hebou neganai, sibona lau biagua fon ai gaukara lau sekea bona karaia lasi totona.”​—Matthew.

 Emu adavana ida teknoloji gaukaralaia dalana herevalaia. Baibel ia gwau: “Namo lasi ta be sibona ena namo ia tahua, to namona be ma ta ena namo ia tahua.” (1 Korinto 10:24) Teknoloji umui gaukaralaia dalana bona do umui karaia senisi be emu adavana ida oi herevalaia. Inai atikol ai ia noho kahana, heduru herevahereva totona, oi gaukaralaia diba.

 “Lau bona egu tau be gau ta ai hunia lasi, bema ai itaia ai ta be fon o tablet ia gaukaralaia momo ai hereva. Ai diba unai ese hekwakwanai ia havaraia diba, unai dainai ta ta emai lalohadai ai laloa namonamo.”​—Danielle.

 Laloatao: Namona be teknoloji be emu hesiai tauna, to emu biaguna lasi.