Ai ese Lohiabada ena Anibou be Baibel ena hereva hegeregerena ai karaia. Unai hebou ena ladana haida be “Lohiabada ena aniani,” Anibou Ginigabena, bona Iesu ena mase ena Memorial. (1 Korinto 11:20; King James Version) To, dubu ma haida ese unai hebou be Baibel ena hereva hegeregerena idia karaia lasi.

 Lohiabada ena Anibou ita karaia badina ita ura Iesu ita laloatao, bona ita hahedinaraia ita totona ena mauri ia bouboulaia karana ita laloa bada. (Mataio 20:28; 1 Korinto 11:24) Unai hebou be ta hahelagaia karana lasi, eiava ta hagoevaia bona ena kara dika kokia karana lasi. Baibel ese ia hahedinaraia iseda kara dika gwauatao dalana tamona be Iesu abidadama henia karana amo, tomadiho karana ta amo lasi.​—Roma 3:25; 1 Ioane 2:1, 2.

 Iesu ese ena hahediba taudia ia oda henidia Lohiabada ena Anibou do idia karaia, to ia gwau lasi nega hida do idia karaia. (Luka 22:19) Haida idia laloa reana hua ta ta ai, wiki ta ta ai, dina ta ta ai, dina tamona lalonai nega momo, eiava ta ta edia ura hegeregerena ai do idia karaia. To, mani inai gaudia haida ita laloa.

 Iuda taudia edia Pasova aria dinana ai, Iesu ese Lohiabada ena Anibou ia hamatamaia, bona unai dina ai ia mase. (Mataio 26:1, 2) Unai be mai anina bada, badina Baibel ese Iesu ena mauri ia bouboulaia karana be Pasova mamoe natuna ida ia hahegeregerea. (1Korinto 5:7, 8) Pasova ariana be lagani ta ta lalonai nega tamona idia karaia. (Esodo 12:1-6; Levitiko 23:5) Unai hegeregerena, Keristani ginigunadia ese Iesu ena mase be lagani ta ta lalonai nega tamona idia karaia, bona Iehova ena Witnes Taudia ese unai dala idia badinaia.

 Iesu ese Anibou ia karaia dalana be ita ia durua, unai amo ita diba nega hida, edena deit bona hora ai Memorial hebouna do ita karaia. Iesu be Baibel ena kalenda hegeregerena, Nisan 14, 33 C.E. ai, dina ia diho murinai Anibou ia hamatamaia. (Mataio 26:18-20, 26) Ai be Keristani ginigunadia ai tohotohoa, bona lagani ta ta iboudiai bona unai deit ai Memorial hebouna ai karaia.

 Ena be Nisan 14, 33 C.E. ena dina be Friday, to lagani ta ta ai, unai dina be do ia idau. Iesu ena nega ai kalenda idia badinaia dalana ai tohotohoa, unai amo Nisan 14 ena dina korikorina ai dibaia. Hari inai negai Iuda taudia ese idia badinaia kalenda ai badinaia lasi. a

 Pasova aria ia ore murinai, Iesu ese hatubua muramura lasi paraoa bona wain kakakaka orena ia gaukaralaia, inai hebou matamata ia karaia totona. (Mataio 26:26-28) Iena kara ai tohotohoa, bona paraoa dekenai hatubua muramura eiava ma gau ta ai atoa lasi. Danu, wain kakakakana sibona ai gaukaralaia, greips ena ranu, wain mai ena suga, hagoadaia gauna, o mamina hanamoa gauna ai gaukaralaia lasi.

 Dubu haida be paraoa mai ena hatubua muramura idia gaukaralaia. To, Baibel lalonai paraoa mai ena hatubu muramurana ese kara dika bona kara gageva ia laulaulaia. (Luka 12:1; 1 Korinto 5:6-8; Galatia 5:7-9) Unai dainai, hatubua muramura eiava ma gau haida idia atoa lasi paraoana sibona ese Keriso ena goevadae tauanina ia laulaulaia. (1 Petero 2:22) Dubu haida be greips ena ranu sibona idia gaukaralaia, to wain idia gaukaralaia lasi. Unai bamona idia karaia badina idia ese kekero muramura inua karana idia taravatua. To, Baibel be unai bamona ia hereva lasi.​—1 Timoteo 5:23.

 Memorial ai idia gaukaralaia hatubua muramura be lasi paraoana bona wain kakakakana be Keriso ena hidio bona rara idia laulaulaia. Taunimanima haida idia laloa unai paraoa bona wain be hoa dalanai Iesu ena hidio bona rara ai idia lao, eiava ena hidio bona rara momokanina ida idia mikisia. Mani unai lalohadai dekenai Baibel ena hereva ita tahua.

•   Bema Iesu ese ena hahediba taudia ia oda henia ena rara do idia inua, unai be hegeregere ia hamaorodia Dirava ese ia atoa rara inua lasi taravatuna idia utua totona. (Genese 9:4; Kara 15:28, 29) To, unai ia karaia lasi, badina rara be helaga bona Iesu ese haida do ia oda henia lasi Dirava ena taravatu idia utua totona.​—Ioane 8:28, 29.

•   Bema aposetolo taudia ese Iesu ena rara momokanina idia inua, do ia gwau lasi: “Inai rara be taunimanima momo edia kara dika gwauatao totona do lau bubua.” Unai ese ia hahedinaraia ena mase be dohore nega vaira ai.​—Mataio 26:28

•   Iesu ena boubou be “nega tamona sibona” ia karaia. (Heberu 9:25, 26) To, bema Lohiabada ena Anibou ai, paraoa bona wain be ena hidio bona rara ai idia lao, unai ena anina be paraoa bona wain idia ania bona inua taudia ese Iesu idia bouboulaia loulou.

•   Iesu ia gwau: “Inai do umui karaia noho lau umui laloatao totona,” ia gwau lasi, “lau umui bouboulaia totona.”​—1 Korinto 11:24.

 Paraoa bona wain be Iesu ena tauanina bona rarana korikorina ai ia lao hahediba herevana idia abia dae taudia idia gwau Baibel ena siri haida ese unai ia hahedinaraia. Hegeregere, Baibel momo lalonai idia hahedinaraia Iesu ese wain be inai bamona ia gwauraia: “Inai be lauegu rarana.” (Mataio 26:28) To, Iesu ena hereva be inai bamona idia hahanaia diba: “Inai be egu rara ia laulaulaia.” b Vaia ena kara, Iesu be taunimanima ia hadibaia neganai parabole ia gaukaralaia momo.​—Mataio 13:34, 35.

 Iehova ena Witnes taudia be Lohiabada ena Anibou idia karaia neganai, haida sibona ese paraoa idia ania bona wain idia inua. Dahaka dainai?

 Iesu ena rara ese“gwaubou matamatana” ia haginia, bona idaunegai Iehova Dirava bona Israela bese huanai idia karaia gwaubou ia hadokoa. (Heberu 8:10-13) Unai gwaubou matamatana lalonai idia noho taudia sibona ese Memorial paraoa idia ania bona wain idia inua. Unai be Keristani taudia ibounai lasi, to Dirava ese “ia boiria taudia” sibona. (Heberu 9:15; Luka 22:20) Unai taudia be guba dekenai Keriso ida do idia lohia, bona Baibel ia gwau taunimanima 144,000 sibona ese unai hahenamo do idia abia.​—Luka 22:28-30; Apokalupo 5:9, 10; 14:1, 3.

 “Orea maragi” taudia be Keriso ida do idia lohia, to ita be “hutuma bada” taudia ida tanobada dekenai mauri hanaihanai do ita abia diba. (Luka 12:32; Apokalupo 7:9, 10) Ena be tanobada helarona idia abia taudia be paraoa bona wain idia abia lasi, to ita totona Iesu ese ena mauri ia bouboulaia dainai, ita tanikiu henia.​—1 Ioane 2:2