Filemona 1:1-25
1 Lau Paulo, be Keriso Iesu dainai dibura rumana ai lau noho, lau be iseda tadikaka Timoteo ida, bona inai revareva be Filemona dekenai lau torea noho. Filemona be iseda lalokau tauna bona ia be ita ida ia gaukara hebou.
2 Danu, inai revareva be iseda taihuna Apia, bona ita ida ia tuari hebou tauna Akipo, bona oiemu ruma ai idia hebou kongrigeisen taudia dekenai lau torea.
3 Namona be Dirava iseda Tamana bona Lohiabada Iesu Keriso amo, hebogahisi hereadaena bona maino umui abia.
4 Lauegu guriguri lalonai emu ladana lau gwauraia negadiai, nega ibounai egu Dirava lau tanikiu henia,
5 badina lau kamonai noho, Lohiabada Iesu dekenai oi abidadama, bona ia bona helaga taudia ibounai oi lalokau henia.
6 Vadaeni lau guriguri, oi bona ma haida dekenai ia noho abidadama tamona ese oi do ia durua, Keriso amo ita abia gau namodia ibounai oi abia dae totona.
7 Emu lalokau ena sivarai lau kamonai dainai lau moale bada bona goada lau abia, badina tadikaka e, oi dainai helaga taudia be edia lalona* ai, goada matamata idia davaria.
8 Lau be Keriso ena aposetolo tauna dainai, ena be mai gari lasi ida oi lau oda henia diba kara maorona oi karaia totona,
9 to oi hahedinaraia lalokauna dainai oi lau noia sibona. Lau be Paulo, bona egu mauri lagani ia bada vadaeni, oibe, Keriso Iesu dainai hari lau be dibura rumana ai lau noho.
10 Lauegu noinoi be egu natuna Onesimo totona. Dibura rumana ai lau noho neganai, lau be tamana ta bamona ia dekenai.
11 Guna ia be anina lasi oi dekenai, to hari ia be mai anina bada oi bona lau dekenai.
12 Oibe, egu lalokau tauna be oi dekenai lau siaia lou.
13 Lau ura ia be lau ida ia noho, bona sivarai namona dainai dibura rumana ai lau noho lalonai, ia ese oiemu gabu ia abia bona lau do ia durua noho.
14 To bema oi amo gwaumaoro lau abia lasi, lau ura lasi gau ta lau karaia. Lau ura oi sibona emu ura dainai inai kara namona oi karaia, to lau ese oi lau doria dainai lasi.
15 Reana unai badina dainai ia ese nega sisina oi ia rakatania, unai amo ia do oi abia lou bona oi ida hanaihanai do ia noho.
16 Hari ia be igui hesiai tauna ta sibona lasi, to igui hesiai tauna ia hereaia. Ia be iseda lalokau tadikaka, bona ia lau lalokau henia. To oi ese ia do oi lalokau henia bada, igui hesiai tauna ta bona Keristani tadikaka ta bamona.
17 Unai dainai bema oi laloa lau be emu abidadama tamona tauna, lau do oi abia dae hegeregerena, ia do oi abia dae.
18 Ma danu, bema ia be oi dekenai kerere ta ia karaia eiava oi amo ia abitorehai, vadaeni iena abitorehai be egu ladana dekenai oi torea.
19 Lau Paulo, lau sibona egu imana amo inai revareva lau torea. Unai abitorehai be lau ese do lau haloua. Badina oi danu be mai emu abitorehai lau dekenai, unai be oiemu mauri, to lau ura lasi unai lau herevalaia.
20 Oibe tadikaka, ita ruaosi be Keriso ena hahediba taudia dainai, lau ura oi amo heduru lau abia, bona oi lau noia Keriso ena hahediba tauna ta bamona, egu lalona* oi hagoadaia.
21 Lau diba momokani egu hereva do oi badinaia, unai dainai inai revareva be oi dekenai lau torea noho, badina lau diba lau noia gaudia sibona lasi, to gau ma haida do oi karaia danu.
22 Bona danu egu noho gabuna do oi hegaegaelaia, badina lau ura emui guriguri dainai lau do idia ruhaia, unai amo umui lau hesiai henia diba.
23 Lauegu bamona Epafra, Keriso Iesu dainai lau ida dibura rumana ai ia noho tauna, ese oi dekenai ena hanamoa herevana ia siaia,
24 bona egu gaukara hebou taudia Mareko, Arisitako, Dema, bona Luka danu.
25 Namona be umui hahedinaraia lalohadai namona dainai, Lohiabada Iesu Keriso amo hebogahisi hereadaena umui abia.
