Ioane Ena Revareva Ginigunana 3:1-24
3 Mani umui laloa, Tamana ena lalokau ita dekenai be bada herea,+ unai dainai ita idia gwauraia Dirava ena natudia!+ Bona unai be maoro, ita be iena natudia. Unai dainai tanobada taudia be ita idia diba lasi,+ badina idia be Dirava idia do dibaia lasi.+
2 Lalokau taudia e, hari ita be Dirava ena natudia,+ to vaira nega ai ita dekenai dahaka do ia vara be ia do hahedinaraia lasi.+ To ita diba Dirava be ita dekenai ia hedinarai neganai, ita be ia bamona do ita lao, badina ia do ita itaia momokani.
3 Bona ia amo unai helaro idia abia taudia ibounai be sibodia idia hagoevaia,+ unai tauna ia goeva hegeregerena.
4 Kara dika idia karaia noho taudia ibounai be taravatu idia utua noho danu, bona kara dika be taravatu utua karana.
5 Umui diba danu, Iesu be ia hedinarai iseda kara dika ia kokia totona,+ bona ia dekenai kara dika ta be lasi.
6 Ia ida idia hakapua taudia ibounai be idia kara dika lasi.+ Kara dika ia karaia tauna be Iesu ia itaia lasi bona ia diba lasi.
7 Natudia e, namo lasi ta ese umui ia hakaua kerere. Kara maoromaoro ia karaia tauna be kara maoromaoro tauna, Iesu ia kara maoromaoro hegeregerena.
8 Kara dika ia karaia tauna be Diabolo amo, badina Diabolo be matamana negana amo ia kara dika noho.+ Dirava ena Natuna ia hedinarai ena badina be inai, Diabolo ena gaukara ibounai ia haorea momokani totona.+
9 Dirava ena natudia ibounai be kara dika idia karaia noho lasi,+ badina iena lauma helaga be unai taudia lalonai ia noho, bona idia be kara dika idia karaia noho diba lasi, badina idia be Dirava ena natudia.+
10 Dirava ena natudia bona Diabolo ena natudia be inai dala ai ita diba: Kara maoromaoro ia karaia noho lasi tauna bona iena tadikaka ia lalokau henia lasi tauna danu be Dirava amo ia mai lasi.+
11 Matamana amo umui kamonai herevana be inai, namona be ita lalokau heheni.+
12 Namo lasi ita be Kaino bamona, ia be Dika Tauna amo ia mai bona ena tadikaka ia alaia mase.+ Bona dahaka dainai ia alaia mase? Badina ia sibona ena kara be dika,+ to ena tadikaka ena kara be maoromaoro.+
13 Tadikaka e, tanobada taudia ese umui idia inai henia karana dekenai umui hoa lasi.+
14 Ita diba ita be mase ita rakatania bona mauri ita abia,+ badina iseda tadikaka ita lalokau henia.+ Iena tadikaka ia lalokau henia lasi tauna be mase lalonai ia do noho.+
15 Iena tadikaka ia inai henia tauna be ala-ala tauna,+ bona umui diba, ala-ala tauna dekenai mauri hanaihanai ia noho lasi.+
16 Unai amo lalokau ita diba, badina unai tauna ese ita dainai ena mauri ia atoa diho.+ Bona iseda maduna be iseda tadikaka totona iseda mauri do ita atoa diho.+
17 Bema tau ta be mai ena tanobada kohudia, bona ia itaia ena tadikaka be ia dabu, to ia ura lasi ia dekenai hebogahisi ia hahedinaraia, Dirava ena lalokau be ia lalonai ia noho diba, a?+
18 Natudia e, namo lasi iseda lalokau be hereva eiava uduna+ sibona amo, to mai momokani ida iseda kara+ amo ita hahedinaraia.
19 Unai amo do ita diba ita be hereva momokani ena kahanai ita gini, bona iseda kudouna ai do ita diba momokani Dirava ese ita ia lalokau henia,
20 herevana gau haida dekenai iseda kudouna ese ita ia kota henia, namona be ita laloatao Dirava be iseda kudouna ia hereaia bona gau ibounai ia diba.+
21 Lalokau taudia e, bema iseda kudouna ese ita ia kota henia lasi, mai gari lasi ida Dirava ita hereva henia diba.+
22 Bona ita noia gaudia ibounai be ita dekenai do ia henia,+ badina ita be iena taravatu ita badinaia noho bona ia idia hamoalea gaudia ita karaia noho.
23 Oibe, iena taravatu be inai: Iena Natuna Iesu Keriso ena ladana ita abidadama henia+ bona ita lalokau heheni,+ ita ia oda henia hegeregerena.
24 Ma danu, iena taravatu ia badinaia tauna be ia ida ia hakapua, bona ia be unai tauna ida ia hakapua.+ Bona ita dekenai ia henia lauma helagana amo ita diba, ia be ita ida ia hakapua.+
