Revareva Ginigunana Korinto Taudia Dekenai 9:1-27
9 Lau be ura kwalimu tauna, ani? Lau be aposetolo tauna, ani? Lau be iseda Lohiabada Iesu lau itaia, ani?+ Umui be Lohiabada totona lau karaia gaukara ena anina, ani?
2 Ena be ma haida dekenai lau be aposetolo tauna lasi, to umui dekenai lau be momokani aposetolo tauna! Badina umui be lau umui hamomokania taudia, lau be Lohiabada ena aposetolo tauna.
3 Lau idia hahemaoro henia taudia dekenai egu hereva be inai:
4 Ai be mai emai maoro ai aniani bona ai inuinu totona, ani?
5 Ai be mai emai maoro emai Keristani adavadia ese ai idia bamoa totona,+ aposetolo taudia ma haida, bona Lohiabada ena tadikaka,+ bona Kepa*+ hegeregeredia, ani?
6 Eiava lau bona Banaba+ be maoro lasi mauri durua gaudia abia totona ai gaukara, a?
7 Edena tuari tauna ese sibona ena gaukara davana ia karaia? Daika ese vain uma ia karaia bona ena anina ia ania lasi?+ Eiava daika ese mamoe oreana ia naria, bona edia milika sisina ia inua lasi?
8 Lau be taunimanima edia lalohadai hegeregerena inai gaudia lau herevalaia, a? Lasi. Taravatu* ese unai gaudia ia herevalaia.
9 Badina Mose ena Taravatu dekenai ia gwau: “Boromakau be witi ia moia neganai, namo lasi ena uduna oi koua.”+ Umui laloa Dirava ese boromakau edia namo ia laloa, a?
10 Eiava ita ia laloa dainai unai hereva ia gwauraia, a? Momokani, unai hereva be ita totona ia torea, badina tano geia tauna bona witi moia tauna be idia diba momokani edia gaukara ena anina do idia abia.
11 Bema Dirava amo ai abia gaudia be umui huanai ai hadoa, vadaeni umui amo tauanina durua gaudia ai abia be maoro lasi, a?+
12 Bema ma haida be mai edia maoro umui amo unai gaudia idia abia, ai danu be mai emai maoro umui amo unai gaudia ai abia totona, ani? Ai be unai maoro ai gaukaralaia lasi,+ to gau ibounai ai haheaukalaia, unai amo gau ta ese Keriso ena sivarai namona harorolaia karana do ia koua lasi.+
13 Umui diba lasi, a? Gaukara helagadia idia karaia taudia be dubu helaga amo aniani idia abia, bona hanaihanai boubou patana dekenai idia gaukara taudia be boubou patana amo boubou gauna ena kahana idia abia, ani?+
14 Unai hegeregerena danu, Lohiabada ese sivarai namona harorolaia taudia dekenai oda ia henia, idia be sivarai namona amo edia mauri durua gaudia do idia abia.+
15 To lau be unai gaudia ta lau gaukaralaia lasi.+ Oibe, unai hereva lau torea lasi, unai gaudia lau abia totona. Lau mase be namo, to tau ta ese lau heagi ena badina ia kokia be namo lasi!+
16 Bema hari lau be sivarai namona lau harorolaia, lau heagi be anina lasi, badina unai be egu maduna. Oibe, bema sivarai namona lau harorolaia lasi, lau madi o!+
17 Bema mai ura ida unai lau karaia, lau be mai egu ahuna. Herevana bema unai be egu ura dainai lau karaia lasi, to lau dekenai idia henia maduna lau do karaia noho.+
18 Vadaeni, egu ahuna be dahaka? Unai be sivarai namona lau harorolaia lalonai, sivarai namona lau hadibaia davana lasi, unai amo sivarai namona dekenai egu maoro do lau gaukaralaia kerere lasi.
19 Ena be taunimanima ibounai dekenai lau be maduna lasi, to lau sibona be taunimanima ibounai edia igui hesiai tauna ai lau lao, unai amo taunimanima momo be Keriso ena dala dekenai lau hakaua mai diba.
20 Iuda taudia dekenai lau be Iuda tauna ai lau lao, unai amo idia be Keriso ena dala dekenai lau hakaua mai.+ Bona ena be taravatu henunai lau noho lasi, to taravatu henunai idia noho taudia dekenai, lau be taravatu henunai lau noho tauna ai lau lao, unai amo idia be Keriso ena dala dekenai lau hakaua mai.+
21 Ena be Dirava ena taravatu lau badinaia bona Keriso ena taravatu henunai lau noho, to taravatu lasi taudia dekenai lau be taravatu lasi tauna ai lau lao, unai amo idia be Keriso ena dala dekenai lau hakaua mai.+
22 Manoka taudia dekenai lau be manoka tauna ai lau lao, unai amo idia be Keriso ena dala dekenai lau hakaua mai.+ Gau ibounai lau karaia vadaeni taunimanima idauidau lau durua totona, unai amo dala idauidau ai haida lau hamauria diba.
23 Sivarai namona totona gau ibounai lau karaia, unai amo ma haida dekenai sivarai namona lau harorolaia diba.+
24 Umui diba lasi, a? Heau helulu taudia ibounai be idia heau, to tamona sibona ese ahuna do ia abia. Namona be unai bamona do umui heau, umui kwalimu totona.+
25 Heau helulu lalonai idia heau taudia ibounai be gau ibounai lalonai sibodia edia ura idia biagua. Oibe, idia be unai bamona idia karaia, ia dika diba korona idia abia totona,+ to ita be ia dika diba lasi korona do ita abia.+
26 Unai dainai, lau be dala ia diba lasi bona ia heau kava tauna bamona lau heau lasi.+ Bona lau be hodahoda ia paisia kava tauna bamona, lau paisi lasi.
27 To egu tauanina lau botaia*+ bona igui hesiai tauna bamona lau hakaua, badina dika ma haida lau haroro henia, to unai murinai Dirava ena lalonamo lau abia lasi.
