Ioane Ena Revareva Iharuana 1:1-13
1 Lau, elda tauna,* ese Dirava ia abia hidi hahinena lau tore henia bona ena natudia lau tore henia danu. Lau sibona ese idia lau lalokau henia lasi, to hereva momokani idia diba taudia ibounai danu ese idia lalokau henidia,
2 badina hereva momokani be iseda kudouna lalonai ia noho, bona ita ida do ia noho ela bona hanaihanai.
3 Dirava iseda Tamana bona ena Natuna Iesu Keriso edia hariharibada,* hebogahisi bona maino do ita abia, hereva momokani bona lalokau danu.
4 Lau moale bada herea, badina lau kamonai emu natudia haida be hereva momokani lalonai idia raka noho,+ Tamana amo ita abia taravatu hegeregerena.
5 Vadaeni hahine e, oi lau tore henia bona lau noia, ta ta dekenai lalokau do ita hahedinaraia. Oi dekenai taravatu matamata lau henia lasi, to ia be matamana amo ita abia gauna.+
6 Bona lalokau ena anina be inai, iena taravatu hegeregerena do ita raka noho.+ Unai taravatu be inai, matamatana amo umui kamonai hegeregerena, namona be lalokau lalonai do umui raka noho.
7 Badina koikoi taudia momo be tanobada dekenai idia hedinarai vadaeni,+ idia abia dae lasi Iesu Keriso be taunimanima ta bamona ia mai.+ Unai bamona tauna be koikoi tauna bona Keriso inai henia tauna.*+
8 Umui naria namonamo, unai amo emai gaukara amo ai hagugurua gaudia do umui haboioa lasi, to emui davana do umui abia guguru.+
9 Keriso ena hadibaia herevadia ia badinaia lasi bona hadibaia hereva kereredia ia hadibaia tauna be Dirava ena lalonamo ia abia lasi.+ To Keriso ena hadibaia herevadia ia badinaia tauna be Tamana bona Natuna edia lalonamo ia abia.+
10 Bema tau ta be umui dekenai ia mai bona unai hadibaia herevadia ia gwauraia lasi, emui ruma dekenai ia umui abia dae lasi+ eiava ia umui hanamoa lasi.
11 Badina unai tauna dekenai hanamoa hereva ia gwauraia tauna ese iena kara dika ia durua.
12 Ena be lau ura umui dekenai hereva momo lau torea, to lau ura lasi revareva amo umui lau hereva henia, to lau ura umui dekenai lau mai bona umui ida lau herevahereva, unai amo do umui moale momokani.
13 Oiemu kakana, Dirava ese ia abia hidi hahinena, ena natudia ese oi dekenai edia hanamoa hereva idia siaia.
