King Taudia Iharuana 16:1-20
16 Remalaia ena natuna Peka ena lohia lagani namba 17 ai, Iuda ena king Iotama ena natuna Ahasa+ be king ai ia lao.
2 Ahasa ena mauri lagani be 20 neganai, king ai ia lao, bona lagani 16 lalonai Ierusalema ai ia lohia. Ia ese ena Dirava, Iehova ena vairanai kara maoromaoro ia badinaia lasi, iena sene tauna Davida hegeregerena ia kara lasi.+
3 To, Ahasa be Israela ena king taudia edia kara dika ia badinaia,+ bona ena natuna be lahi lalonai ia gabua,*+ bona idau besedia edia kara dika rohorohodia ia tohotohoa, Israela taudia edia vairana amo Iehova ese ia lulua lao besedia unai.+
4 Danu, ia ese ataiai gabudia* dekenai, ororo ataiai, bona au badadia edia henunai boubou gaudia ia do bouboulaia+ bona gabua bouboudia edia kwalahu be ena dirava dekenai idia daekau noho.+
5 Unai nega ai Suria ena king Resini bona Israela ena king Peka, Remalaia ena natuna unai, be Ierusalema tuari henia totona idia daekau lao.+ Idia ese Ahasa ia noho siti idia hagegea to siti idia abia lasi.
6 Unai nega ai Suria ena king Resini ese Edoma taudia totona Elata siti ia abia lou,+ bena Iuda taudia be Elata siti amo ia luludia raka-lasi. Bona Edoma taudia be Elata hanua dekenai idia vareai, bona unuseni idia noho ema bona hari.
7 Vadaeni Ahasa ese gwaukau taudia be Asuria ena king Tigolata-pilesere+ dekenai ia siaidia, ia gwau: “Lau be emu hesiai tauna bona emu natuna.* Oi daekau mai bona Suria ena king bona Israela ena king edia imana amo lau oi hamauria, idia be lau idia tuari henia noho.”
8 Bena Ahasa be Asuria ena king ena lalona ia veria totona, Iehova ena ruma bona king ena ruma ai idia noho dava bada kohudia, hegeregere siliva bona golo ibounai ia abidia bona ia dekenai ia siaia.+
9 Asuria ena king ese iena noinoi herevana ia abia dae, bona Damaseko dekenai ia daekau lao bona ia abia bona ena taunimanima be Kiri dekenai ia abidia lao,+ bona ia ese Resini ia hamasea.+
10 Bena King Ahasa ia lao Damaseko dekenai Asuria ena king Tigolata-pilesere ia hedavari henia totona. Bona King Ahasa be Damaseko dekenai boubou patana ia itaia neganai, hahelaga tauna Uraia dekenai boubou patana ena laulau ia siaia, unai laulau ese boubou patana karaia dalana ia hahedinaraia.+
11 Hahelaga tauna Uraia+ be boubou patana ta ia haginia,+ king Ahasa ese Damaseko amo ia siaia hadibaia hereva hegeregerena. King Ahasa be Damaseko amo ia do giroa mai lasi neganai, hahelaga tauna Uraia be boubou patana ia karaia haorea.
12 King be Damaseko amo ia giroa lou bona boubou patana ia itaia neganai, boubou patana dekenai ia lao bona boubou gaudia ia henia.+
13 Bona boubou patana latanai gabua boubou gaudia bona aniani boubou gaudia ia karaia noho. Danu ia ese boubou patana latanai ena wain be boubou gauna bamona ia bubua bona maino karaia totona ia bouboulaia animal ena rara be sisina sisina ia negea lao mai.
14 Bena ia ese kopa boubou patana,+ Iehova ena dubu vairanai ia noho gauna, be unuseni amo ia kokia. Unai be ena boubou patana bona Iehova ena ruma huanai ia noho gabuna amo ia kokia, bona iena boubou patana be not kahana dekenai ia atoa.
15 King Ahasa ese hahelaga tauna Uraia+ ia oda henia: “Boubou patana badana latanai daba ena gabua boubou oi karaia+ bona ena kwalahu do ia daekau, bona dina ena diho ena aniani boubou, king ena gabua boubou bona ena aniani boubou danu.+ Bona taunimanima ibounai edia gabua bouboudia, aniani bouboudia, bona wain bouboudia oi bouboulaia danu. Namona be oi ese gabua boubou ibounai edia rara bona oi bouboulaia gaudia ma haida edia rara be boubou patana latanai sisina sisina oi negea lao mai. To kopa boubou patana dekenai gau ta do oi karaia lasi, unai be lau ese do lau abia hidi dahaka lau karaia totona.”
16 Bona hahelaga tauna Uraia ese gau ibounai ia karaia, King Ahasa ese ia oda henia hegeregerena.+
17 Ma danu, King Ahasa ese treila edia haba ia utudia+ maragi bona edia disi ia kokidia,+ bona ia ese ranu disi badana ladana Davara be idia dogoatao kopa boromakau amo ia kokia+ bona nadi amo idia karaia floa dekenai ia atoa.+
18 Bona ia ese dubu kahirakahira idia haginia bona Sabati ai idia gaukaralaia raka gabuna mai ena guhi ia kokia, bona king ena vareai gabuna amo Iehova ena ruma ia lao henia dalana ia koua. Asuria ena king dainai unai bamona ia karaia.
19 Ahasa ena sivarai ibounai, ia karaia gaudia ibounai danu, be Iuda ena king taudia edia buka lalonai idia torea, ani?+
20 Bena Ahasa be ia mase,* bona ena sene taudia idia guria gabuna ai idia guria, unai be Davida Ena Siti dekenai. Bona ena natuna Hesekaia*+ be king ai ia lao.
Futnout
^ Heb., “ena natuna be lahi lalona amo ia abia hanai.”
^ Ta ese ta ia gwauraia “emu natuna” be hemataurai karana.
^ Heb., “ena sene taudia ida ia hekure.”
^ Anina be “Iehova be Goada Ia Henia.”
