King Taudia Iharuana 23:1-37
23 Vadaeni king be hereva ia siaia, bona Iuda bona Ierusalema ena tau badadia ibounai idia boiria.+
2 Unai murinai, king be taunimanima ibounai, maragidia bona badadia, ida Iehova ena ruma dekenai ia daekau lao. Iuda ena tatau ibounai, Ierusalema ai idia noho taudia ibounai, hahelaga taudia, bona peroveta taudia idia lao. Idia ibounai edia vairanai king ese Iehova ena ruma ai+ idia davaria taravatu bukana+ ia duahia.+
3 King be du badinai ia gini bona Iehova vairanai gwaubou ta ia karaia,+ ia ese Iehova bona iena oda herevadia, iena hadibaia herevadia, bona iena taravatu be mai kudouna ibounai bona mauri* ibounai ida ia badinaia, unai amo buka lalonai idia torea hereva ibounai hegeregerena ia karaia. Bona taunimanima ibounai be unai gwaubou dekenai idia lalotamona.+
4 King ese hahelaga tauna badana Hilekaia,+ hahelaga taudia ma haida, bona iduara idia naria taudia ia oda henia Iehova ena dubu lalonai idia noho Bala totona idia karaia kohu, au helagana*+ edia kohu bona guba gaudia edia kohu ibounai do idia abia raka-lasi. Bena Ierusalema murimuri ai ia noho Kiderona Kourana dekenai ia gabudia, bona edia kahu be Betele dekenai ia abia lao.+
5 Vadaeni ia ese idau diravadia edia hahelaga taudia ia lulua raka-lasi, idia be Iuda ena king taudia ese idia abia hidi Iuda siti bona Ierusalema badinai idia noho siti edia ataiai gabudia* ai gabua bouboudia edia kwalahu idia karaia. Danu Bala dirava, dina, hua, hisiu bona guba gaudia ibounai dekenai gabua bouboudia edia kwalahu idia karaia taudia ia lulua raka-lasi.+
6 Ia ese Iehova ena ruma amo au helagana*+ ia kokia bona Ierusalema murimuri ai ia noho Kiderona Kourana dekenai ia gabudia+ bona edia kahu be ogogami taudia edia guria gabuna ena kahana ibounai dekenai ia negea.+
7 Danu dubu lalonai tatau be tatau ida idia mahuta hebou daiutudia ia hadikaia,+ unai be Iehova ena ruma lalonai bona unuseniai hahine taudia ese au helagana* ena palai dabuadia idia turia.
8 Bena ia ese Iuda edia siti ibounai amo hahelaga taudia ibounai ia abia raka-lasi, bona Geba+ amo ela bona Bere-sieba+ ai idia noho ataiai gabudia,* hahelaga taudia ese idia gabua boubou gaudia edia kwalahu idia karaia gabuna unai, ia hadikadia. Danu ia ese ataiai gabudia ia hadikaia, unai be Iosua, siti ena biaguna ena vareai geiti, ena lauri kahana ai idia noho.
9 Ataiai gabudia edia hahelaga taudia be Ierusalema ai Iehova ena boubou patana dekenai hesiai gaukara idia karaia lasi,+ to idia be hahelaga taudia* ma haida ida isti lasi paraoa idia ania.
10 Danu ia ese Topete*+ tomadihona ia hadikaia, unai be Hinoma* Ena Natuna Memero Kourana ai,+ unai amo ta be ena natuna mero eiava kekeni be Moleka dekenai ia henia lasi lahi lalonai ia gabua totona.*+
11 Bona ia ese Iuda ena king taudia ese dina totona idia hahelagaia hosi ibounai ia koua, unai amo ofesa tauna Natana-meleka ena aniani gabuna amo Iehova ena ruma dekenai do idia vareai lasi, unai aniani gabuna be dubu ena raka vareai gabuna ai ia noho. Bona ia ese dina dekenai idia hahelagaia kariota be lahi lalonai ia gabudia.+
12 Danu king be Iuda taudia edia king ese idia haginia boubou patadia, Ahasa ena ataiai daiutuna ena guhi ai idia haginia patadia unai,+ ia veria diho, bona Manase ese Iehova ena ruma ena ariara rua ai ia haginia boubou patadia danu ia veria diho.+ Ia ese ia hamakohidia bona edia kahu be Kiderona Kourana dekenai ia negea lao mai.
13 Bona king ese Ierusalema ena vaira kahana ai tomadiho totona idia gaukaralaia ataiai gabudia ia hadikaia, unai be Hadikaia Ororo ena saut kahana dekenai. Unai ataiai gabudia be Israela ena king Solomona ese ia haginia, Sidono taudia edia dirava hahine dika rohorohona Asatorete totona, bona Moaba taudia edia dirava dika rohorohona Kemoso totona, bona Amono taudia edia dirava dika rohorohona+ Milekoma+ totona.
14 Ia ese nadi du helagadia ia hamakohia maragimaragi bona au helagadia*+ ia utua diho bona edia guri be taunimanima edia turia amo ia hahonudia.
15 Danu ia ese Betele ai ia noho pata ia hadikaia, unai be Nebata ena natuna Ieroboama ese ia haginia ataiai gabuna* bona Israela taudia ia hakaua idia kara dika.+ Ia ese unai pata bona ataiai gabuna ia veria diho murinai, ataiai gabuna be lahi amo ia gabua, bona kahu ai ia lao, bona au helagana* ia gabua.+
16 Iosaia ia giroa bona ororo ai mase taudia idia guria gabudia ia itaia neganai, ia ese unai guri amo turia ia abidia bona pata latanai ia gabudia, unai amo do idia tomadiho henidia lasi. Unai be Iehova ena hereva hegeregerena ia vara, ena peroveta tauna amo ia gwauraia herevadia unai.+
17 Bena ia gwau: “Lau ese unuseniai guria gabuna ta lau itaia. Unai be daika ena guria gabuna?” Bena siti ai idia noho taudia be ia dekenai idia gwau: “Unai be Dirava momokanina ena hesiai tauna ena guria gabuna, ia be Iuda amo,+ bona ia ese Betele ena boubou patana dekenai do oi karaia gaudia ia perovetalaia.”
18 Vadaeni ia gwau: “Ta ese ena turia ia dogoatao lasi, umui rakatanidia.” Bena iena turia idia rakatanidia, bona Samaria amo ia mai peroveta tauna ena turia danu idia rakatanidia.+
19 Danu Iosaia ese Samaria ena siti dekenai ataiai gabudia ai idia haginia tomadiho rumadia ibounai ia kokidia,+ unai be Israela ena king taudia ese idia haginidia Dirava habadua totona. Ia ese Betele ai ia noho ataiai gabuna ia hadikaia hegeregerena, unuseniai danu unai bamona ia karaia.+
20 Vadaeni ia ese ataiai gabudia dekenai idia gaukara hahelaga taudia ibounai be pata latanai ia bouboulaidia, bona edia latanai taunimanima edia turia ia gabua.+ Unai murinai Ierusalema dekenai ia giroa lou.
21 King ese taunimanima ibounai ia oda henia: “Iehova emui Dirava dekenai Pasova umui karaia,+ taravatu bukana ai idia torea hegeregerena.”+
22 Guna Israela ena hahemaoro taudia eiava Israela taudia edia king bona Iuda taudia edia king edia nega amo ema bona unai nega, unai bamona Pasova* idia karaia lasi.+
23 To King Iosaia ena lohia lagani namba 18 ai, Ierusalema ai inai Pasova ariana be Iehova dekenai idia karaia.
24 Danu Iosaia ese mase taudia edia lauma idia hereva henia taudia, vaira nega gwauraia taudia,+ edia ruma bese ena dirava idauidau,*+ kaivakuku dika rohorohodia, bona Iuda bona Ierusalema ai idia noho gau dika rohorohodia ibounai ia kokidia, Taravatu bukana ena hereva hegeregerena,+ unai buka be hahelaga tauna Hilekaia ese Iehova ena ruma ai ia davaria.+
25 Guna king ta be Iosaia hegeregerena lasi, ia be mai ena kudouna ibounai bona mai ena mauri*+ ibounai bona mai ena goada ibounai ida Iehova dekenai ia giroa lou, Mose ena Taravatu lalonai idia noho herevadia hegeregerena. Bona iena murinai idia lohia king ta be ia bamona lasi.
26 To, Iehova ese Iuda taudia dekenai ena badu mai siahuna ia hahedinaraia noho, badina Manase ese ia karaia karadia ibounai be Dirava ia habadua.+
27 Iehova ia gwau: “Lau ese Iuda danu be egu vairana amo do lau kokia,+ lau ese Israela lau kokia hegeregerena.+ Bona lau abia hidi siti, Ierusalema, bona dubu totona lau gwau, ‘Egu ladana be unuseni do ia noho’ gabuna be do lau dadaraia.”+
28 Iosaia ena sivarai ibounai, bona ia karaia gaudia ibounai, edia sivarai be Iuda ena king taudia edia buka lalonai idia torea, ani?
29 Iena nega lalonai, Aigupito ena king Farao Neko be Euperate Sinavai ena kahana dekenai ia lao Asuria ena king durua totona. Bona King Iosaia ia lao Neko ia tuari henia totona. To Neko ese Megido dekenai ia itaia neganai, ia hamasea.+
30 Vadaeni Iosaia ena hesiai taudia ese iena mase tauanina be kariota dekenai idia udaia bona Megido amo Ierusalema dekenai idia abia lao bona ena guri gabuna ai idia guria. Bena Iuda taudia ese Iosaia ena natuna Iehoahasa idia abia bona idia horoa bona king ai idia halaoa.+
31 Iehoahasa+ ena mauri lagani be 23 neganai, king ai ia lao, bona ia be hua toi Ierusalema ai ia lohia. Iena sinana ena ladana be Hamutala,+ ia be Libina tauna Ieremia ena natuna kekeni.
32 Ia be Iehova ena matana ai kara dika ia karaia matamaia, iena sene taudia idia karaia hegeregerena.+
33 Farao Neko+ ese ia be Hamata tanona ai Ribila+ ena dibura ruma dekenai ia atoa, unai amo Ierusalema ai do ia lohia lasi, bena Iuda taudia ia doria unai tano ena davana totona 100 siliva talent* bona golo talent ta bamona do idia henia.+
34 Danu, Farao Neko ese Iosaia ena natuna Eliakimi be king ai ia halaoa bona ena ladana ia haidaua Iehoiakimi. To ia ese Iehoahasa be Aigupito dekenai ia abia lao,+ bona unuseniai ia mase.+
35 Iehoiakimi ese Farao dekenai siliva bona golo ia henia, to taunimanima amo takisi ia gogoa, unai amo Farao ese ia gwauraia siliva moni ena davana do ia henia. Iuda taudia ese do idia henia takisi moni hegeregerena, Iehoiakimi ese taunimanima ta ta amo siliva bona golo ia gogoa Farao Neko dekenai ia henia totona.
36 Iehoiakimi+ ena mauri lagani be 25 neganai, king ai ia lao, bona ia be lagani 11 lalonai Ierusalema ai ia lohia.+ Iena sinana be Sebida, ia be Rumaha tauna Pedaia ena natuna kekeni.
37 Ia be Iehova ena vairanai ia kara dika noho,+ iena sene taudia idia karaia hegeregerena.+
Futnout
^ Heb., “tadikakadia.”
^ Ierusalema murimuri ai ia noho gabuna ta, unuseniai Israela ena aposteit taudia be natudia idia bouboulaia.
^ Heb., “ena natuna be lahi lalona amo ia abia hanai.”
