Sivarai Iharuana 5:1-14
5 Vadaeni Solomona ese Iehova ena ruma dekenai do ia karaia gaukara ibounai ia karaia haorea.+ Bena Solomona be ena tamana Davida ese ia hahelagaia gaudia ibounai ia abidia vareai,+ bona ia ese siliva, golo, bona kohu ibounai be Dirava momokanina ena ruma ai ia atodia, unai be dava bada kohu haboua gabudia dekenai.+
2 Unai nega ai Solomona ese Israela taudia edia tau badadia, edia iduhu kwaradia ibounai, bona Israela ena bese kwaradia ibounai ia haboua. Bena idia be Ierusalema dekenai idia lao Iehova ena Taravatu Maua be Davida Ena Siti, Siona, amo idia abia lao totona.+
3 Vadaeni Israela taudia ibounai be hua namba 7 ai, aria* totona king vairanai idia hebou.+
4 Israela ena tau badadia ibounai idia ginidae neganai, Levi taudia ese Maua idia abia isi.+
5 Bona idia ese Maua, hebou dubu, bona palai ruma ena kohu helagadia ibounai idia abia lao.+ Hahelaga taudia bona Levi taudia ese unai gaudia idia abia lao.
6 King Solomona bona Israela taudia ibounai, ia ida hebou totona ia boiria taudia unai, be Maua vairanai idia gini. Bona idia bouboulaia mamoe bona boromakau be momo herea dainai,+ edia namba idia duahia diba lasi.
7 Bena hahelaga taudia ese Iehova ena Taravatu Maua be ena gabu dekenai idia mailaia, dubu helaga ena lalona momokani daiutuna ai, Helaga Herea Gabuna unai, kerubi edia hanina henunai.+
8 Unai kerubi be Maua latanai idia noho bona edia hanina idia kehoa, unai amo edia hanina ese Maua bona ena huaia audia idia koua.+
9 Unai maua huaia audia be lata herea dainai edia dorina be Helaga Gabuna amo idia itaia diba, unai gabu be lalona momokani daiutuna vairanai ia noho, to murimuri amo unai au idia itadia lasi. Bona idia be unuseniai idia noho ema bona hari.
10 Unai Maua lalonai Mose ese Horeba ai ia udaia nadi palakadia rua sibona idia noho.+ Unai nega ai Israela taudia be Aigupito amo idia raka-lasi+ bona Iehova ese idia ida gwauhamata ta ia karaia.+
11 Hahelaga taudia be helaga gabuna amo idia raka-lasi neganai (badina idia noho hahelaga taudia ibounai be sibona idia hahelagaia,+ herevana idia be edena orea amo),+
12 Levi iduhu ena ane abia taudia ibounai,+ idia be Asapa,+ Hemana,+ Iedutunu+ bona edia natudia memero bona edia tadikaka ese idia gunalaia, idia be dabua namo hereadia idia karaia, simbol,* miusiki gaudia mai edia varo, bona hap* idia dogoatao. Idia be boubou patana ena ist kahanai idia gini, bona idia ida be hahelaga taudia 120, idia danu be kibi idia hiriria.+
13 Kibi hiriria taudia bona ane abia taudia be miusiki regena namona ida Iehova idia hanamoa bona tanikiu henia. Bona kibi, simbol bona miusiki gaudia idauidau edia regena hegeregerena Iehova idia hanamoa, “badina ia be namo, bona iena lalokau* be ia noho hanaihanai,”+ unai nega ai Iehova ena ruma be ori ese ia hahonua.+
14 Unai ori dainai hahelaga taudia ese edia hesiai gaukara idia karaia diba lasi, badina Iehova ena hairai ese Dirava momokanina ena ruma ia hahonua.+
Futnout
^ Unai be, Au Raurau Rumadia Ena Aria.
^ Heberu herevana be auri amo idia karaia miusiki gauna ia herevalaia. Ia be sekol, rua oi pataia hebou neganai, ia rege.
^ Miusiki gauna ta mai ena varo, gita bamona, to ena toana be idau.
^ Eiava “noho hanaihanai lalokauna.” Diksenari itaia.
