Apokalupo—Ioane Ia Abia Herevana 8:1-13
8 Mamoe Natuna+ ese koua gauna namba 7 ia kokia neganai,+ hora kahana ta lalonai, guba dekenai regerege ta be lasi.
2 Bona Dirava vairanai idia gini aneru 7 lau itaia,+ Dirava ese idia dekenai kibi 7 ia henia.
3 Aneru ma ta ia ginidae bona pata helagana badinai ia gini,+ ia ese golo uro ta ia dogoatao. Bona ia dekenai bonana namo muramura bada idia henia,+ terona vairanai ia noho golo pata helagana latanai ia bouboulaia totona,+ unai nega ai danu helaga taudia be edia guriguri idia gwauraia.
4 Vadaeni aneru ena imana amo bonana namo muramura ena kwalahu bona helaga taudia edia guriguri+ be Dirava vairanai idia daekau.
5 To maoromaoro aneru ese pata helagana ena lahi haida amo bonana namo muramura urona ia hahonua bona unai lahi be tanobada dekenai ia negea diho. Vadaeni guba ia boiboi, gado regedia, kevaru,+ bona tano mareremarere idia vara.
6 Bona aneru 7 mai edia kibi 7+ be idia hegaegae kibi idia hiriria totona.
7 Aneru ginigunana ese iena kibi ia hiriria. Bona aisi nadi bona lahi be rara ida idia mikisi bona tanobada dekenai idia negea diho.+ Bona tanobada ena kahana toi amo kahana ta ia araia ore, bona au edia orea toi amo orea ta ia araia ore, bona tubutubu gaudia ibounai ia araia ore.+
8 Aneru iharuana ese iena kibi ia hiriria. Bona gau ta, iena toana be ororo badana mai lahi danu be davara dekenai idia negea diho.+ Bona davara ena kahana toi amo kahana ta be rara ai ia lao.+
9 Bona davara ai idia noho mauri gaudia edia orea toi amo orea ta ia mase,+ bona bouti edia orea toi amo orea ta ia dika.
10 Aneru ihatoina ese iena kibi ia hiriria. Bona hisiu badana ta, ia diaridiari lamepa bamona be guba amo ia moru, bona sinavai edia orea toi amo orea ta latanai ia moru bona idia lohilohi ranu latanai danu.+
11 Unai hisiu ena ladana be Tubutubu Gauna Iditana. Ranu ena kahana toi amo kahana ta be idita gauna ai ia lao bona taunimanima momo be unai ranu amo idia mase, badina ia idita.+
12 Aneru namba 4 ese iena kibi ia hiriria. Bona dina ena kahana toi amo kahana ta+ bona hua ena kahana toi amo kahana ta bona hisiu oreana edia kahana toi amo kahana ta be idia dika, unai amo idia ta ta edia kahana toi amo kahana ta be idia dibura,+ bona dina ena kahana toi amo kahana ta be ia diari lasi, bona hanuaboi danu be unai bamona.
13 Bona guba* ai ia roho ugava lau itaia, bona lau kamonai ia hereva badabada, ia gwau: “Tanobada ai idia noho taudia madi o, madi o, madi o,+ badina aneru toi ese idia do hiriria lasi kibi oredia be kahirakahira do idia hiriria!”+
Futnout
^ Inai Grik herevana ese manu idia roho gabuna ia herevalaia.
