Revareva ta Galatia Taudia Dekenai 4:1-31
4 Hari lau hereva inai, bema tamana ena kohu ia abia tauna be ia do maragi, ia be igui hesiai tauna bamona do ia noho, ena be ia be gau ibounai edia biaguna.
2 To ia be naria taudia bona kohu naria taudia henunai ia noho, ela bona ena tamana ese ia abia hidi negana ia ginidae.
3 Unai hegeregerena, ita maragi neganai, ita be tanobada ena hahediba hereva edia igui hesiai henunai ita noho.+
4 To nega korikori ia ginidae neganai, Dirava ese ena Natuna ia siaia, ia be hahine ta amo ia vara+ bona taravatu henunai ia noho,+
5 ia ese taravatu henunai idia noho taudia ia hoia bona ia ruhaia,+ unai amo Dirava ena natudia ai ita lao diba.+
6 Umui be Dirava ena natudia dainai, Dirava ese ena Natuna dekenai ia henia lauma helaga+ be iseda kudouna lalonai ia atoa,+ bona ia boiboi: “Abba,* Tamana!”+
7 Unai dainai hari oi be igui hesiai tauna lasi, to natuna ta, vadaeni Dirava ese oi be tamana ena kohu abia tauna ai ia halaoa.+
8 To Dirava umui diba lasi neganai, umui be dirava koikoidia edia igui hesiai gaukara umui karaia.
9 To hari Dirava umui diba, bona danu Dirava be umui ia diba, dahaka dainai anina lasi hahediba hereva umui badinaia lou+ bona umui ura edia igui hesiai gaukara umui karaia lou?+
10 Umui ese dina, hua, nega,* bona lagani umui laloa bada bona umui badinaia goadagoada.+
11 Lau be umui dainai lau gari, dika umui totona lau hekwarahi kava.
12 Tadikaka e, umui lau noia, lau bamona do umui kara, badina guna lau be umui bamona.+ Umui ese lau dekenai kerere ta umui karaia lasi.
13 To umui diba lau gorere dainai, unai ese dala ia kehoa nega ginigunana umui dekenai sivarai namona lau gwauraia totona.
14 Bona ena be umui dekenai egu gorere be metau gauna bamona, to lau umui dadaraia lasi, eiava lau umui lalodika henia* lasi. To Dirava ena aneru ta bamona lau umui abia dae, Keriso Iesu umui abia dae bamona.
15 Guna umui abia moalena be edeseniai? Badina lau diba, bema unai nega ai dala ia noho, umui ese emui matana do umui kokia bona lau dekenai do umui henia.+
16 Vadaeni umui dekenai hereva momokani lau gwauraia dainai, lau be emui inai tauna ai lau lao, a?
17 Haida idia ura bada edia kahana dekenai umui idia veria lao, badina maorona dainai lasi, to idia ura lau amo umui idia hakaua siri, unai amo do umui ura bada idia umui badinaia.
18 To, bema ta be badina namona dainai ia ura bada ena kahana dekenai umui lao, vadaeni umui dekenai unai bamona ia vara be namo, to umui ida lau noho negadia sibona lasi.
19 Lauegu lalokau natudia e,+ lau be umui dainai hisihisi lau mamia lou, mara ena hisihisi bamona, ela bona Keriso ena kara umui hahedinaraia momokani.
20 Lau ura hari umui ida lau noho bona dala idauna ai umui lau hereva henia, badina lau diba lasi umui totona dahaka do lau karaia.
21 Taravatu henunai umui ura noho taudia e, lau umui hamaoroa, umui ese Taravatu* ena hereva umui kamonai henia, a?
22 Hegeregere, Toretore Helagadia ia gwau, Aberahamo be mai ena natudia memero rua, ta be hesiai hahine amo+ bona ma ta be ura kwalimu hahine amo.+
23 Hesiai hahine ena natuna be taunimanima idia vara dalana amo ia vara,+ to ura kwalimu hahine ena natuna be Dirava ena gwauhamata amo ia vara.+
24 Unai be gabeai do idia vara gaudia idia laulaulaia. Unai hahine rua be gwaubou rua, ta be Sinai Ororo ai idia karaia,+ bona ia henunai idia noho taudia ibounai be igui hesiai taudia, unai be Hagara ia laulaulaia.
25 Hagara ena anina be Sinai,+ Arabia ai ia noho ororo ta. Bona Hagara be hari Ierusalema ia laulaulaia, badina ia bona ena natudia be igui hesiai lalonai idia noho.
26 To ataiai Ierusalema be ura kwalimu hahine, bona ia be iseda sinana.
27 Toretore Helagadia ia gwau: “Natuna ia havaraia diba lasi hahine e, do oi moale. Mara ena hisihisi ia mamia lasi hahine e, mai moale ida do oi boiboi. Badina idia rakatania hahine ena natudia be momo herea, to headava hahine ena natudia be momo lasi.”+
28 Vadaeni tadikaka e, ita be gwauhamata ta dainai ita vara, Isako hegeregerena.+
29 To, taunimanima idia vara dalana amo ia vara natuna ese lauma helaga amo ia vara natuna ia dagedage henia,+ hari danu be unai bamona.+
30 To, Toretore Helagadia be dahaka ia gwau? “Hesiai hahine bona ena natuna do oi lulua, badina hesiai hahine ena natuna be ura kwalimu hahine ena natuna ida tamana ena kohu do ia abia lasi, lasi momokani.”+
31 Unai dainai tadikaka e, ita be hesiai hahine ena natudia lasi, to ita be ura kwalimu hahine ena natudia.
Futnout
^ Heberu eiava Aramia gado herevana, anina be “Tamana e!”
^ Unai be, aria totona idia abia hidi negadia.
^ Eiava “kanudia.”
^ Unai be, Mose Ena Taravatu.
