Revareva ta Galatia Taudia Dekenai 6:1-18
6 Tadikaka e, bema tau ta be dala kererena ai ia raka bona ia diba lasi, namona be umui lo Keristani taudia ese unai tauna be mai manau ida umui hamaoromaoroa.+ To umui naria namonamo,+ dika umui danu be hedibagani umui davaria.+
2 Umui ta ta umui durua noho emui metau umui huaia totona,+ unai amo Keriso ena taravatu umui hagugurua.+
3 Bema ta ia laloa ia be mai anina bada, to momokani ia be anina lasi,+ ia be sibona ia koia noho.
4 To namona be ta ta ese sibona ena kara do ia tahua namonamo,+ vadaeni ia sibona dekenai do ia moale, bona ma ta ida sibona do ia hahegeregerea lasi.+
5 Badina ta ta ese sibona ena maduna do ia huaia.+
6 Danu, namona be Dirava ena hereva ia dibaia tauna ese ena hadibaia tauna ida gau namodia ibounai do idia abia hebou.+
7 Umui laloa kerere lasi, Dirava ita koia diba lasi. Tau ta ese ia hadoa gauna, unai gauna sibona do ia abia.+
8 Badina tauanina ena ura dikadia hegeregerena ia hadoa tauna be unai ura dikadia dainai dika do ia abia, to Dirava ena lauma hegeregerena ia hadoa tauna be Dirava ena lauma amo, mauri hanaihanai do ia abia.+
9 Vadaeni ita hesiku lasi kara namodia ita karaia noho totona, bema ita hesiku lasi, nega korikori ai ita ese huahua do ita abia.+
10 Dala ia kehoa negadiai,* namona be taunimanima ibounai dekenai kara namo ita karaia, to gau badana be iseda abidadama tamona taudia dekenai kara namo ita hahedinaraia.
11 Umui itaia, egu imana amo inai revareva be umui dekenai leta badadia amo lau torea.
12 Idia ura ma haida idia hamoalea taudia ibounai ese emui lalona idia veria emui kopina do umui utua, unai idia karaia Keriso Iesu ena hisihisi auna* dainai dagedage idia davaria lasi totona.
13 Kopina idia utua taudia danu be Taravatu* idia badinaia lasi,+ to idia ura umui ese emui kopina umui utua, unai amo do idia heagi badina emui lalona idia veria emui kopina umui utua totona.
14 Lau ura lasi lau heagi, to iseda Lohiabada Iesu Keriso ena hisihisi auna* sibona dainai do lau heagi.+ Iena mase dainai, tanobada be au dekenai idia kokoa kau bamona, to tanobada taudia dekenai, lau be au dekenai idia kokoa kau bamona.
15 Kopina utua eiava kopina utua lasi karana be anina lasi,+ to Dirava ese ia havaraia gau matamata be mai anina bada.+
16 Unai hakaua hereva idia badinaia taudia ibounai, Dirava ena Israela unai, latanai maino bona hebogahisi ia noho be namo.+
17 Hari inai nega amo, namo lasi ta ese lau dekenai hekwakwanai ia henia, badina egu tauanina dekenai maka idia noho, unai ese idia hahedinaraia lau be Iesu ena igui hesiai tauna ta.+
18 Tadikaka e, umui hahedinaraia lalohadai namona dainai, Lohiabada Iesu Keriso ena hebogahisi hereadaena umui abia. Amen.
