Hahemaoro Taudia 12:1-15
12 Bena Eparaima tatau idia haboua bona not kahana ia aru lao sinavai amo idia hanaia lao Sapona,* bona Iepeta dekenai idia gwau: “Amono taudia tuari henia totona oi lao neganai, dahaka dainai ai oi boiria lasi oi ida ai lao totona?+ Oi be emu ruma ida do ai gabua.”
2 To Iepeta be idia dekenai ia gwau: “Lau bona egu taunimanima be Amono taudia ida tuari badana ai karaia. Lau be umui dekenai heduru totona lau noinoi, to idia amo lau umui hamauria lasi.
3 Lau itaia umui ese lau do umui hamauria lasi neganai, egu mauri* lau laloa lasi bona Amono taudia lau tuari henia,+ bena Iehova ese idia be egu imana dekenai ia atoa. Vadaeni dahaka dainai hari umui mai lau umui tuari henia totona?”
4 Iepeta ese Gileada tatau ibounai ia haboua,+ bona Eparaima taudia idia tuari henia. Bona Gileada taudia ese Eparaima taudia idia halusia, idia be guna idia gwau: “Ena be umui, Gileada taudia, be Eparaima bona Manase taudia edia tano lalonai umui noho, to umui be Eparaima amo umui heau siri taudia.”
5 Gileada taudia be Eparaima taudia amo idia lao guna bona Ioridane ena dobu lasi kahadia idia abia.+ Bona Eparaima tatau idia ura heau mauri neganai, idia gwau, “Ia namo lau hanaia?” Bena Gileada tatau ese unai taudia ta ta idia nanadaia, “Oi be Eparaima tauna, a?” Bema ia gwau, “Lasi,”
6 vadaeni ia dekenai do idia gwau, “Mani oi gwau Shibolet.” To ia gwau, “Sibolete,” badina ia hegeregere lasi unai ladana ia gwauraia maoro totona. Bena Gileada taudia ese ia idia dogoatao bona Ioridane ena dobu lasi kahana dekenai idia alaia mase. Unai nega ai Eparaima taudia 42,000 idia mase.
7 Iepeta be Israela ai lagani 6 lalonai hahemaoro gaukara ia karaia, unai murinai Gileada tauna Iepeta ia mase bona iena siti Gileada ai idia guria.
8 Ia murinai be Betelehema tauna Ibisana, ia be Israela ai hahemaoro gaukara ia karaia.+
9 Iena natudia memero be 30 bona natudia kekeni be 30. Ia ese ena natudia kekeni ia siaia iduhu idau memero idia adavaia totona, bona kekeni 30 ia mailaia ena natudia memero idia adavaia totona. Ia be lagani 7 lalonai Israela ai hahemaoro gaukara ia karaia.
10 Bena Ibisana ia mase bona Betelehema ai idia guria.
11 Ia murinai be Sebuluno tauna Elona, ia be lagani 10 lalonai Israela ai hahemaoro gaukara ia karaia.
12 Bena Sebuluno tauna Elona ia mase bona Sebuluno tano Aialono dekenai idia guria.
13 Ia murinai be Piratono tauna Hilele ena natuna, Abidona, ia be Israela ai hahemaoro gaukara ia karaia.
14 Iena natudia memero be 40 bona tubudia memero be 30, bona doniki ibounai 70 latanai idia guia loaloa. Ia be lagani 8 lalonai Israela ai hahemaoro gaukara ia karaia.
15 Bena Piratono tauna Hilele ena natuna, Abidona, ia mase bona Piratono ai idia guria, unai be Eparaima tano ai, Amaleka taudia edia ororo dekenai.+
Futnout
^ Eiava reana, “not kahana dekenai idia hanaia.”
