Revareva ta Heberu Taudia Dekenai 10:1-39
-
Animal edia rara be kara dika ia kokia lasi (1-4)
-
Taravatu be laulau sibona (1)
-
-
Keriso be nega tamona sibona ia henia (5-18)
-
Mauri ia lao henia dala matamata (19-25)
-
Iseda hebou karana rakatania lasi (24, 25)
-
-
Mai ura ida kara dika ita karaia ena sisiba (26-31)
-
Haheauka totona abidadama be mai anina bada (32-39)
10 Taravatu* be do idia mai gau namodia+ edia laulau sibona,+ to ia be unai gaudia edia toana korikori lasi. Unai dainai hahelaga taudia ese hanaihanai lagani ta ta ai idia henia boubou gaudia amo, Dirava idia tomadiho henia taudia be goevadae taudia ai idia halaoa diba lasi.+
2 Bema unai boubou gaudia dainai idia goevadae, vadaeni boubou gaudia idia henia noho be anina lasi, ani? Badina hesiai gaukara helagana idia karaia taudia be idia goeva momokani, do idia laloa lou lasi idia be kara dika taudia.*
3 To unai boubou gaudia ese lagani ta ta ai idia ia hadibaia loulou idia be mai edia kara dika,+
4 badina boromakau bona nanigosi edia rara ese kara dika idia kokia diba lasi.
5 Unai dainai Keriso be tanobada dekenai ia mai neganai, ia be Dirava dekenai ia gwau: “‘Boubou gaudia bona harihari gaudia oi ura henia lasi, to lau totona tauanina ta oi hegaegaelaia.
6 Oi be gabua bouboudia bona kara dika bouboudia oi abia dae lasi.’+
7 Bena lau gwau: ‘Dirava e, lau mai vadaeni emu ura lau karaia totona. Lokua toretore lalonai idia noho herevadia be lau totona idia torea.’”+
8 Iena hereva ginigunana ai, ia gwau: “Oi be boubou gaudia, harihari gaudia, gabua bouboudia, bona kara dika bouboudia oi ura henia lasi bona oi abia dae lasi.” Unai be Taravatu hegeregerena idia henia boubou gaudia.
9 Bena ia gwau: “Lau mai vadaeni emu ura lau karaia totona.”+ Ia ese gau ginigunana ia kokia, unai amo gau iharuana ia haginia diba.
10 Unai “ura”+ amo ita be ita helaga, badina Iesu Keriso ese nega tamona sibona ena tauanina ia bouboulaia.+
11 Danu, dina ta ta ai hahelaga taudia ibounai be edia gabu dekenai idia gini, hesiai gaukara helagana idia karaia totona,+ bona nega momo boubou gauna tamona idia henia,+ to unai gaudia ese kara dika idia kokia momokani lasi.+
12 To unai tauna be iseda kara dika dainai nega tamona sibona boubou gauna ia henia bona Dirava ena idiba kahanai ia helai vadaeni,+
13 unai nega amo ia naria noho ela bona Dirava ese ena inai taudia be iena aena atoa gauna ai do ia halaoa.+
14 Ia ese ia henia boubou gauna tamona sibona amo, idia helaga vadaeni taudia be goevadae taudia ai ia halaoa+ ela bona hanaihanai.
15 Bona lauma helaga ese ita dekenai inai ia gwauraia hedinarai danu, guna ia gwau:
16 “Iehova* ia gwau, ‘Unai dinadia murinai, lau ese idia ida gwaubou do lau karaia. Lauegu taravatu be edia kudouna ai do lau atoa, bona edia lalona ai do lau torea.’”+
17 Bena ma ia gwau: “Bona edia kara dika bona edia taravatu utua karadia do lau laloatao lou lasi.”+
18 Vadaeni bema Dirava ese unai kara dika ibounai ia gwauatao, kara dika dainai idia henia boubou gaudia be anina lasi.
19 Unai dainai tadikaka e, Iesu ena rara dainai, ita gari lasi helaga gabuna ia lao henia dalana ita gaukaralaia totona.+
20 Bona ita totona ia kehoa dalana be mauri ia lao henia dala matamatana. Bona keten ia hanaia karana amo unai ia karaia,+ unai keten be iena tauanina.
21 Ita be mai iseda hahelaga tauna badana, ia ese Dirava ena ruma taudia ia naria dainai,+
22 namona be mai iseda kudou maorona ida, bona abidadama momokani ida Dirava dekenai ita lao. Iseda kudouna idia goeva bona iseda lalomamina idia namo vadaeni+ bona ranu goevana amo iseda tauanina idia hagoevaia.+
23 Namona be iseda helaro gwauraia hedinarai karana ita dogoatao auka bona ita gini goada,+ badina unai gwauhamata ia karaia tauna ita abidadama henia diba.
24 Bona namona be ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia.+
25 Iseda hebou karana ita rakatania lasi,+ haida ese idia karaia bamona, to ita hagoadaia heheni,+ bona unai kara do ita habadaia noho, badina umui itaia dina be ia kahirakahira noho.+
26 Bema hereva momokani ena diba maoromaoro ita abia murinai, mai ura ida kara dika ita karaia noho,+ vadaeni kara dika totona boubou gauna ta be lasi.+
27 To mai gari ida hahemaoro do ita naria, bona badu mai siahuna ese Dirava idia inai henia taudia do ia haorea momokani.+
28 Bema tau ta ese Mose ena Taravatu ia dadaraia, bona taunimanima rua eiava toi ese unai idia hamomokania, ia do idia hebogahisi henia lasi bona do idia hamasea.+
29 Vadaeni dahaka umui laloa? Bema tau ta ese Dirava ena Natuna ia moia bona gwaubou ena rara,+ ia ia hahelagaia gauna unai, ia laloa maragi, bona danu, Dirava ena lauma helaga, hebogahisi hereadaena ia henia laumana unai, ia gwauraia dika, vadaeni unai tauna ese panisi badana ia abia be maoro, ani?+
30 Badina inai hereva ia gwauraia Diravana ita diba, ia gwau: “Dika ena davana be lauegu, lau ese davana do lau haloua.” Bona ma ia gwau, “Iehova* be iena taunimanima do ia hahemaoro henia.”+
31 Mauri Diravana ena imana amo panisi ita abia be gari gauna.
32 To, namona be nega gunadia do umui laloa noho, unai negadia ai diari umui abia murinai,+ hahetoho bada umui haheaukalaia.
33 Nega haida, taunimanima ibounai edia vairanai umui idia dagedage henia bona umui idia hahemaraia, bona nega ma haida ai umui ese unai bamona hisihisi idia abia taudia umui durua.
34 Umui ese dibura lalonai idia noho tadikaka umui hebogahisi henia bona ena be emui kohu idia henaoa to umui moale noho,+ badina umui diba umui be mai emui kohu namona, ia noho hanaihanai gauna.+
35 Unai dainai, mai gari lasi ida do umui hereva noho, badina unai be mai ena davana namona.+
36 Umui haheauka noho be namo,+ unai amo Dirava ese ia gwauhamatalaia gauna do umui abia. To Dirava ena ura umui karaia guna be namo.
37 Badina “nega sisina lalonai,”+ bona “do ia mai tauna be do ia ginidae bona do ia leiti lasi.”+
38 “To kara maoromaoro tauna be ena abidadama dainai do ia mauri,”+ bona “bema gari dainai lau amo ia raka siri, lau be ia dekenai do lau moale lasi.”+
39 Ita be mai gari ida Dirava amo ita raka siri bona dika ita davaria taudia lasi,+ to ita be abidadama taudia, bona unai abidadama dainai iseda mauri do ita haboioa lasi.
Futnout
^ Unai be, Mose Ena Taravatu.
^ Eiava “edia kara dika dainai lalomamina dikana do idia abia lou lasi.”
