Iosua 17:1-18
17 Bena Manase ena iduhu+ ese gadara ta* amo tano ia abia,+ badina ia be Iosepa ena vara guna natuna.+ Makiri,+ Manase ena vara guna natuna bona Gileada ena tamana be tuari tauna goadana dainai, ia ese Gileada bona Basana ia abia.+
2 Bona Manase ena bese taudia oredia ese nadi gadara amo tano idia abia, edia famili ta ta hegeregerena. Idia be inai: Abiesere ena famili,+ Heleke ena famili, Asariele ena famili, Sekema ena famili, Hepere ena famili, bona Semida ena famili. Unai be Iosepa ena natuna Manase ena bese tatau, edia famili ta ta hegeregerena.+
3 To Selopehada+ ese natudia memero ia havaraia lasi, to kekeni sibona. Selopehada be Hepere ena natuna, ena tubuna tau be Gileada, ena tubuna tamana be Makiri, Manase ena natuna unai. Selopehada ena natudia kekeni edia ladadia be inai: Mahala, Noa, Hogila, Milika, bona Tirisa.
4 Vadaeni idia be hahelaga tauna Eleasara, Nunu ena natuna Iosua, bona iduhu gunalaia taudia dekenai idia lao,+ bona idia gwau: “Iehova ese Mose ia oda henia, ia ese emai iduhu tatau huanai ai dekenai ahuna ia henia totona.”+ Vadaeni Iehova ena oda hegeregerena, idia ese edia tamana ena tadikakadia huanai ahuna idia abia.+
5 Manase iduhu ese tano 10 ia abia, Gileada bona Basana danu, unai be Ioridane ena kahana ta ai,*+
6 bona Manase iduhu hahine bona tatau ese edia ahuna idia abia hebou, bona Gileada tano be Manase iduhu taudia oredia ese idia abia.
7 Bona Manase ena tano hetoana be Asere amo ia lao Mikimetata,+ unai be Sekema ia vaira henia,+ bona ia lao ela bona saut kahana ai,* unai be Ene-Tapua taudia edia tano.
8 Tapua tano+ be Manase bese ese ia abia, to Manase bese ena tano hetoana ai ia noho Tapua siti be Eparaima bese ena.
9 Unai tano hetoana be ia lao ela bona Kanaha Koura, unai be koura ena saut kahana. Eparaima siti be Manase siti huanai idia noho,+ bona Manase tano be koura ena not kahanai ia noho, bona ia be Davara Badana* dekenai ia doko.+
10 Saut kahana be Eparaima ena, bona not kahana be Manase ena, bona iena tano hetoana be Davara Badana.*+ Bona not kahanai Manase ena tano ia lao ela bona Asere dekenai, bona ist kahanai ia lao ela bona Isakara dekenai.
11 Isakara bona Asere edia tano ai, Manase ese inai gabudia ia abia: Bete-seana bona ena badina taonidia, Ibileama bona ena badina taonidia,+ Doro taudia+ bona edia badina taonidia, Ene-doro taudia+ bona edia badina taonidia, Tanaka taudia+ bona edia badina taonidia, Megido taudia bona edia badina taonidia, bona edia ororo gabudia toi.
12 To Manase ena bese taudia be idia hegeregere lasi inai siti idauidau idia abia totona. Kanana taudia idia goada momokani unai tano dekenai idia noho totona.+
13 Israela besena ena goada ia bada neganai, idia ese Kanana taudia be edia igui hesiai taudia ai idia halaoa,+ to idia ibounai be unai tano amo idia lulua lao lasi.+
14 Iosepa ena bese taudia be Iosua dekenai idia gwau: “Dahaka dainai ai dekenai tano ena kahana tamona sibona+ oi henia?* Ai be momo herea, badina Iehova ese ai ia hanamoa ema bona hari.”+
15 Iosua be idia dekenai ia gwau: “Bema umui be momo herea, vadaeni uda gabuna dekenai umui daekau lao bona Perisi+ bona Repaima taudia edia tano+ ai gabu ta umui hagoevaia, badina umui totona Eparaima ena ororo gabudia+ be bada lasi.”
16 Bena Iosepa ena bese taudia idia gwau: “Ororo gabudia be hegeregere lasi ai totona, bona koura tanodia ai idia noho Kanana taudia edia tuari kariota+ edia wili be mai edia tuari kaia,* Bete-seana+ bona ena badina taonidia bona Ieserele Koura ai idia noho taudia dekenai unai bamona kariota idia noho danu.”+
17 Bena Iosua ese Iosepa ena bese taudia, Eparaima iduhu bona Manase iduhu dekenai ia gwau: “Umui be momo herea, bona emui goada be bada dainai, umui ese tano ena kahana tamona sibona do umui abia lasi,+
18 to ororo gabudia danu do umui abia.+ Ena be ia be uda gabuna, to do umui hagoevaia, bona ia be emui tano ena hetoana ai do ia lao. Bona umui ese Kanana taudia do umui lulua, ena be idia be mai edia goada bona edia tuari kariota edia wili be mai edia tuari kaia.”*+
Futnout
^ Unai be, ist kahana ai.
^ Heb., “idiba kahana ai.”
^ Unai be, Meditereinien.
^ Unai be, Meditereinien.
^ Heb., “tano ena kahana ta idia hahetohoa bona gadara ta amo ai dekenai idia henia.”
^ Heb., “kariota mai edia auri.”
^ Heb., “kariota mai edia auri.”
